Shpenzime të larta të përdorimit të veturave, telefonave, në mëditje e udhëtime zyrtare, u tha në Komisionin për buxhet

Shpenzime të larta të përdorimit të veturave, telefonave, në mëditje e udhëtime zyrtare, u tha në Komisionin për buxhet

Prishtinë, 13 tetor 2005 /TN /QIK - Komisioni për Buxhet dhe Financa i Kuvendit të Kosovës, i kryesuar nga Naser Osmani, kryetar i Komisionit, në kuadër të nismës që ndërmori kohë më parë, që Qeverisë së Kosovës t'i propozohet një Program i kursimit të shpenzimeve, në mbledhjen e sotme, në të cilën merrnin pjesë edhe zëvendësministri dhe drejtori i Departamentit të Buxhetit të Ministrisë së Ekonomisë dhe Financave, përkatësisht Muharrem Ibrahimi dhe Agim Krasniqi, zhvilloi një debat të gjerë rreth mundësive të racionalizimit të shpenzimeve nga ana e organizatave buxhetore.
Megjithëse disa diskutues ishin të mendimit se para se të fillojë debati do të ishte mirë që të kenë si mbështetje një material, i cili në mënyrë më specifike do të tregonte se në cilët lëmenj shpenzohet në mënyrë të paarsyeshme, ata u përpoqën të identifikojnë segmentet ku vërehen lehtë shpenzime të larta.

Në këtë vështrim u tha se shpenzime të larta hetohen gjatë përdorimit të veturave, në mëditje, reprezentacione, udhëtime zyrtare etj. Konstatime të ngjashme kishin edhe përfaqësuesit e Ministrisë së Ekonomisë dhe Financave.

Në pajtim me këtë u propozua që të bëhet një normativ lidhur me kriteret e shpenzimeve në këta lëmenj, për të bërë reduktime të mëdha. Kontrolli i shpenzimeve është më se i nevojshëm, ndërsa në praktikën e deritashme, sidomos mëditjet, nuk i nënshtrohen kurrfarë kontrolli.
U fol edhe për shpenzimet në mallra, shërbime dhe në investimet kapitale. Edhe këtu ka vend për racionalizim, por duhet të kihet parasysh se reduktimet e tilla nuk duhet të shkojnë në dëm të funksionimit dhe mirëmbajtjes së investimeve.
Debati ishte edhe një kontribut i rëndësishëm në prag të përgatitjeve të Planit të Buxhetit të Kosovës për vitin 2006, i cili do të jetë 14 milionë më i vogël se buxheti i sivjetshëm. Nga përfaqësuesit e Ministrisë u theksua se drafti i Buxhetit për vitin e ardhshëm do të jetë shumë më i detajizuar, për të parë se në cilët lëmenj duhet kërkuar racionalizimin e shpenzimeve.