Presidenti Rugova, në takimin me nënsekretarin Bërns, kërkoi njohjen direkte të pavarësisë së Kosovës

Presidenti Rugova, në takimin me nënsekretarin Bërns, kërkoi njohjen direkte të pavarësisë së Kosovës

Prishtinë, 13 tetor 2005 /TN /QIK - Presidenti i Kosovës dr.Ibrahim Rugova, i ka kërkuar sot Nënsekretarit amerikan të shtetit Nikolas Bërns, fuqizimin e përkrahjes së SHBA-ve për përcaktimin e statusit të Kosovës, ndërsa i ka kërkuar edhe njohjen direkte të pavarësisë së vendit.

Presidenti Rugova këto kërkesa ia bëri gjatë takimit në rezidencën e tij në Velani nënsekretarit amerikan të Shtetit Nikolas Bërns.
Presidenti Rugova pas takimit tha se nënsekretarin Bërns e ka njoftuar me gjendjen stabile në vend dhe vlerësimi pozitiv shkon në favor të njohjes së pavarësisë.
"Presim vlerësimin pozitiv të gjendjes në Kosovë, që të hapen bisedimet e mundshme, takimi i mundshëm për të ardhmen e Kosovës, që për ne është pavarësia dhe në këtë rast ne po përgatitemi", tha Presidenti.
Ai gjithashtu rikujtoi se në rast të negociatave është krijuar Grupi negociator, të cilin do ta përbëjnë, “ekspertët dhe njerëzit e jetës politike të Kosovës.
Presidenti Rugova përsëriti insistimin e tij para Nënsekretarit amerikan Bërns për njohjen e drejtpërdrejtë të pavarësisë së Kosovës. "Unë insistoj për njohje direkte nga SHBA-të, BE-ja, që do të qetësonte këtë pjesë të Evropës dhe të botës, një Kosovë në strukturat euroatlantike dhe në miqësi permanente me SHBA-të", nënvizoi Presidenti Rugova ndërsa ka kërkuar përkrahjen e SHBA-ve në këtë proces.
"Gjithsesi unë i kërkova përkrahjen e SHBA-ve, që të marrë pjesë në këto procese më shumë se deri tash, sepse është ndër vendet e para që është interesuar për neve dhe që na ka ndihmuar dhe edhe tash presim përkrahjen", u shpreh në fund Presidenti Rugova.
Ndëkaq, nënsekretari Bërns nënvizoi se është e drejtë e qytetarëve të Kosovës që të dinë se cili është fati i vendit të tyre.
"Ne mendojmë se qytetarët e Kosovës kanë të drejtë të dinë se cila do të jetë e ardhmja e tyre, sepse gjashtë vjet e gjysmë pas përfundimit të luftës është arritur një progres, por njerëzit nuk e dinë se cila do të jetë e ardhmja e Kosovës", tha ai, duke iu drejtuar Presidentit Rugova, për të cilin tha se është një mik i madh i SHBA-ve dhe e respektohet shumë.
Nënsekretari Bërns tha se SHBA-të i japin mbështetje të fortë vendimit të Sekretarit të Përgjithshëm të OKB-së, Kofi Ananit, për fillimin e bisedimeve për statusin final të Kosovën. Z.Bërns tha se bisedimet pritet të fillojnë në një periudhë të shkurtër kohore, "në nëntor ose në dhjetor, sigurisht brenda vitit 2005", u shpreh ai.

Bërns shtoi se SHBA-të së shpejti do të emërojnë të dërguarin e tyre special për ta ndihmuar OKB-në në procesin e negociatave për Kosovën, pa prejudikuar rezultatin e tyre. "Qeveria ime do të jetë shumë aktive në këto negociata dhe do të emërojmë një të dërguar special për të ndihmuar Kombet e Bashkuara në këto bisedime dhe ne nuk favorizojmë asnjë rezultat", tha ai.
Bërns tha se institucioneve i takon krijimin e kushteve për bisedime, ndërsa nuk i takon SHBA-së përcaktimi i statusit të Kosovës, por në negociatat, tha ai, duhet të ketë edhe kompromise.
"Nuk i takon SHBA-ve që të përcaktojnë statusin e ardhshëm të Kosovës, është detyra juaj që të krijoni kushte për të zhvilluar këto bisedime, për të mbështetur këto negociata dhe se kompromiset duhet të jenë pjesë e këtyre bisedimeve dhe se rezultati përfundimtar, duhet të jetë ai i cili do të mundësojë që të gjithë qytetarët e Kosovës të jetojnë në paqe me njëri tjetrin, si për komunitetin shqiptar ashtu edhe për serbët", tha nënsekretari Bërns.
Në lidhje me opsionet për statusin, Bërns rikujtoi deklaratën e një jave më parë të z.Anan se, "edhe pavarësia është një opsion, por edhe autonomia". "Kjo është për qytetarët e Kosovës dhe qeverinë në Beograd të vendosin së bashku, sepse kosovarët dhe qeveria e Beogradit duhet të jenë pjesë e bisedimeve", tha nënsekretari amerikan, Qeveria e të cilit tha se do ta mbështesë këtë proces në baza shumë transparente.