Bërns: Do të kishim bërë gabim nëse do t'ua shkurtonim të drejtën njerëzve të vendosin për statusin e Kosovës

Bërns: Do të kishim bërë gabim nëse do t'ua shkurtonim të drejtën njerëzve të vendosin për statusin e Kosovës

Londër, 13 tetor 2005 /TN /QIK - Tani është momenti për negociata për statusin e Kosovës, sepse "populli i Kosovës tash gjashtë vjet e gjysmë pret të mësojë se cila do të jetë ardhmëria e tij". "Do të kishim bërë gabim nëse do t'ua shkurtonim të drejtën njerëzve në Kosovë që të vendosin për statusin përfundimtar", deklaroi nënsekretari amerikan i Shtetit Nikolas Bërns në prag të vizitës së tij në Kosovë.
"Çdo popull ka të drejtë të dijë se në çfarë vendi do të jetojë.

Ne nuk përkrahim status kuonë, por do të përkrahim çdo zgjidhje me marrëveshje të cilën e arrijnë pjesëmarrëst e bisedimeve. Me vite kemi folur - standardet para statusit. Mendoj se kemi ardhur në përfundim se duhet thënë - standardet dhe statusi.

Nëse marrin parasysh emocionet dhe pritjet e njerëzve në Kosovë, do të kishim bërë gabim nëse do t'ua shkurtonim të drejtën që të vendosin për statusin përfundimtar. Ata për këtë kanë të drejtë edhe gjashtë vjet e gjysmë nga lufta këtë edhe e kanë merituar", tha për BBC-në Nikolas Bërns.
Duke komentuar një deklaratë të sekretarit të përgjithshëm të Kombeve të Bashkuara Kofi Anan se për statusin e Kosovës ekzistojnë dy skenarë të mundshëm - pavarësi dhe autonomi, Bërns shprehu mendimin se këto janë alternativa logjike, por shtoi se u mbetet qytetarëve të Kosovës, edhe serbëve edhe shqiptarëve, si dhe qeverisë së Beogradit të japin përgjigje në këtë çështje.

"Nuk është punë e bashkësisë ndërkombëtare që të japë projektin e statusit të ardhshëm të Kosovës. Përgjegjësia jonë është që të organizojmë bisedimet dhe të marrim pjesë në to, por vendimet do t'i marrin njerëzit që jetojnë atje. Qeveria ime në këtë proces do të jetë e përfshirë aktivisht, sepse konsiderojmë se për shkak të ngjarjeve në vitin 1999, jemi përgjegjës për këtë", tha Bërns.
Duke komentuar qëndrimet diametralisht të kundërta të Prishtinës dhe Beogradit për pavarësinë, Nënsekretari i Shtetit, tha se është e domosdoshme që Beogradi dhe Prishtina të bisedojnë njëri me tjetrin, sepse ky është kuptmi i negociatave. "Do të jetë e domosdoshme që autoritetet e Beogradit të ulen pranë një tryeze me serbët e Kosovës e me shqiptarët dhe të negociojnë. Zgjidhje tjetër nuk ka.

Bashkësia ndërkombëtare dhe Kombet e Bashkuara nuk do të pranojnë kurrfarë pretekstesh se nuk është koha e duhur për fillimin e bisedimeve. Tani është momenti i vërtetë", shprehet nënsekretari Bënës në prag të vizitës në Kosovë.