Anëtarët e Grupit negociator mirëpresin përkrahjen e SHBA-ve për zgjidhjen e statusit të Kosovës

Anëtarët e Grupit negociator mirëpresin përkrahjen e SHBA-ve për zgjidhjen e statusit të Kosovës

Prishtinë, 13 tetor 2005 /TN /QIK - Anëtarët e Grupit Negociatorë të Kosovës janë shprehur të kënaqur me përkrahjen e SHBA-ve për përshpejtimin e zgjidhjes së çështjes së Kosovës, pas takimit me nënsekretarin amerikan Nikolas Bërns, në një takim në ambasadën amerikane në Prishtinë.
Kryeministri Bajram Kosumi tha se është biseduar se si do të mund të organizohet përmbyllja e statusit të Kosovës. Numri një i Qeverisë së Kosovës, tha se përfaqësuesit e institucioneve dhe të partive politike të Kosovës, janë të inkurajuara nga takimi, pasi edhe qendrat perëndimore evropiane, e veçanërisht Uashingtoni kërkojnë që delegacioni i Kosovës duhet ta karakterizojë bashkimi i fuqishëm. Sipas Kosumit, diplomati amerikan Bërns i ka përmendur edhe disa prej rreziqeve me të cilat mund ballafaqohet procesi, si zgjatja e procesit.
"Por në këtë rast kushdo që të jetë i dërguari i Kofi Annanit, paraprakisht duhet ta ketë një strategji të qartë dhe ta dijë se si do të sillet mënyra dhe sa do të zgjasin bisedat, në mënyrë që kjo çështje ta ketë fundin e vet dhe të mos bllokohen bisedimet", tha Kosumi.

Vet kryeministri është shprehur opitimist për unitetin e fuqishëm të delegacionit të Kosovës.

"Diskutuam për shumë gjëra themelore lidhur më këtë çështje, por ajo që ishte më e rëndësishmja, folëm për delegacionin e Kosovës, që është delegacion i unitetit të tërë spektrit politik në Kosovë, që është kushti i parë më i rëndësishmi dhe më i domosdoshmi për sukses", tha Kosumi.
Ndërsa, kryetar i PDK-së, Hashim Thaçi tha se është e mirëseardhur ajo që "SHBA-të janë në favor që qytetarët e Kosovës të vendosin për fatin e vet".
"Unë besoj se ashtu siç ka ndodhur në vitet 1998/99, ku rolin kryesor e kishte SHBA-ja në procesin e çlirimit të Kosovës edhe tash, SHBA-të duhet të vazhdojnë të luajnë rolin e tyre në ruajtjen kohezivitetit ndërkombëtar për procesin e Kosovës, por edhe për zgjidhjen përfundimtare të këtij statusi", tha ai. Nënsekretari Bërns është takuar edhe me deputetë serbë të Kuvendit të Kosovës, ndërkohë që në fund të vizitës pritet të flasë edhe para gazetarëve.