Mustafaj tha se statusi final i Kosovës duhet të bazohet në vullnetin e lirë të popullit të Kosovës

Mustafaj tha se statusi final i Kosovës duhet të bazohet në vullnetin e lirë të popullit të Kosovës

Budapest 12 tetor 2005 /TN /QIK - Shqipëria e vlerëson statusin e Kosovës si një çështje thelbësore që kërkon një zgjidhje imediate, ndërkaq status kuoja aktuale është e papërshtatshme për një paqe të qëndrueshme në rajon, deklaroi ministri i Punëve të Jashtme Besnik Mustafaj në një takim në Budapest.
"Mendoj se statusi final i Kosovës duhet të bazohet në vullnetin e lirë të popullit të Kosovës, duke garantuar respektimin e plotë të të drejtave të minoriteteve dhe siguruar paqe dhe stabilitet jo vetëm në Kosovë por në të gjithë rajonin", theksoi shefi diplomacisë shqiptare.
Mustafaj shprehu bindjen se e ardhmja e Kosovës, ashtu si e të gjithë rajonit është integrimi i plotë në strukturat europiane dhe euroatlantike.
Ai edhe me këtë rast përsëriti qëndrimin për një pavarësi të kushtëzuar të Kosovës.
"Zgjidhja më e mirë, alternativa më e mirë do të ishte pavarësi e Kosovës, një pavarësi e kushtëzuar sipas akteve dhe praktikave ndërkombëtare, e monitoruar ngushtë nga komuniteti ndërkombëtar për të garantuar ndërtimin e një shteti ligjor e demokratik. Kjo zgjidhje do të kontribuonte për një stabilitet afatgjatë të rajonit", është shprehur Mustafaj.
Ai u bëri thirrje përfaqësuesve të komunitetit serb të vlerësojë drejt fazën serioze në të cilën po hyn historia e Kosovës. "Kosova, është dhe vendi i tyre i pamohueshëm. Rruga më e sigurtë për të garantuar të drejtat e tyre sot e në të ardhmen është pjesëmarrja në këto negociata në përbërje të grupit me të cilin do të përfaqësohet atje Kosova", ka thënë ministri shqiptar.
Gjithashtu, ai përshëndeti dorëzimin e raportit për Kosoven nga ambasadori Kai Aide, duke shprehur bindjen e plotë për neutralitetin dhe objektivitetin që zoti Aide ka treguar në mbledhjen e fakteve dhe hartimin e raportit. Njëherit ai shpreh bindjen se vendet anëtare të Këshillit të Sigurimit do ta vleresojnë këtë moment për të dhënë dritën jeshile për çeljen sa më shpejt të negociatave për statusin final të Kosovës.
Këto vlerësime ministri i Punëve të Jashtme Besnik Mustafaj i bëri në takimin e ministrave të jashtëm të Partnershipit Rajonal dhe Ballkanit Perëndimor më 11 tetor në Budapest.