Serbët Kosovës gëzojnë favore më shumë se çdo minoritet tjetër në Evropë, i tha Daci ambasadori italian në OSBE

Serbët Kosovës gëzojnë favore më shumë se çdo minoritet tjetër në Evropë, i tha Daci ambasadori italian në OSBE

Prishtinë, 12 tetor 2005 /TN /QIK - Në takimin që ka pasur sot kryetari i Kuvendit të Kosovës, Nexhat Daci, me ambasadorin e Italisë në OSBE, Françesko Baskone (Francesco Bascone) është biseduar për rrjedhat në Kosovë para fillimit të bisedimeve për përcaktimin e statusit të vendit, për marrëdhëniet e institucioneve të Kosovës me mekanizmat ndërkombëtarë, sidomos me OSBE në dhe për sigurinë dhe të drejtat e minoriteteve.
Kryeparamentari Daci është shprehur se që nga ardhja në Kosovë e kryeadministratorit Petersen, marrëdhëniet e institucioneve të vendit me ndërkombëtarët nuk kanë shënuar asnjë divergjencë. Ai, ndërkaq, ka lavdëruar punën e Zyrës Italiane në Prishtinë dhe atë të përfaqësuesit italian në Grupin e Kontaktit. Daci ka vlerësuar edhe angazhimin e OSBE së, sidomos për mbajtjen e zgjedhjeve të suksesshme në Kosovë dhe ka shfaqur shpresën se ajo do të ndihmojë edhe në hartimin e një ligji të mirë për zgjedhjet e ardhshme dhe përgjithësisht për zbatimin e legjislacionit të miratuar në Kuvend.
Duke folur për të sigurinë e qytetarëve të Kosovës dhe për të drejtat e minoriteve, Daci ka thënë se serbët Kosovës gëzojnë favore më shumë se çdo minoritet tjetër në Evropë.

Megjithëse refuzojnë të marrin pjesë në institucione dhe në procesin e decentralizimit, serbët me vetëm pesë për qind të popullsisë kanë arsim deri edhe universitar, kurse serbishtja është njëra nga gjuhët zyrtare në Kosovë, ka pohuar kreu i legjislativit të vendit. Por që të jetë më e mirë siguria për të gjithë qytetarët tanë, urgjentisht duhet të krijohen Ministria e Drejtësisë dhe ajo e Punëve të Brendshme, ka nënvizuar Daci.
Ambasadori i Italisë në OSBE, Françesko Baskone është shprehur se nuk mund të thuhet se është bërë pak në Kosovë. Ai është shprehur i kënaqur për raportet e ndërmjet institucioneve të vendit dhe atyre ndërkombëtare në Kosovë, ka vlerësuar punën e legjislativit në miratimin e ligjeve dhe ka shtuar se edhe vendet me tradita ligjvënëse kanë probleme në implementimin e ligjeve të miratuara.