Shefi i diplomacisë turke tha se Presidenti Rugova është një personalitet historik

Shefi i diplomacisë turke tha se Presidenti Rugova është një personalitet historik

Prishtinë, 11 tetor 2005 /TN /QIK - Presidenti i Kosovës Ibrahim Rugova priti sot zv.kryeministrin dhe ministër i Punëve të Jashtme të Turqisë Abdullah Gyl, me të cilin bisedoi për zhvillimet aktuale në Kosovë, për progresin e shënuar dhe gjendjen stabile.
Po ashtu në këtë takim është diskutuar për zgjerimin e marrëdhënieve në të gjitha fushat ndërmjet dy vendeve.
Presidenti Rugova u shpreh se pas raportit të ambasadorit Aide mund të fillojë rruga ndërkombëtare drejt të ardhmes së Kosovës - pavarësisë.
"Pas pas raportit të ambasadorit Kai Aide që do të dalë para Këshillit të Sigurimit pritet që të fillojë rruga ndërkombëtare dhe të bisedohet për të ardhmen e Kosovës e që për ne është pavarësia", tha Presidenti Rugova pas takimit, për të shtuar se megjithatë insiston për një njohje të direkte të pavarësisë.
"Pra një Kosova e integruar për të gjithë qytetarët në Bashkimin Evropian, në NATO dhe në miqësi permanente me Shtetet e Bashkuara të Amerikës", theksoi Presidenti Rugova.
Me këtë rast ai falënderoi ministrin Gyl për ndihmën që ka dhënë Turqia me prezencën e saj ushtarake dhe civile në Kosovë.
Nga ana e tij ministri Gyl tha se me Presidentin Rugova kishin biseduar për të ardhmen e Kosovës, ndërkaq vizitën e vlerësoi me rëndësi të veçantë në prag të diskutimit të raportit të Aides në Këshillin e Sigurimit.
Turqia, tha ai, mbështet procesin e Kombeve të Bashkuara, por edhe vullnetin e popullit të Kosovës. "Turqia e mbështet procesin e Kombeve të Bashkuara, po ashtu edhe të vullnetin e popullit të Kosovës".
Ministri Gyl premtoi se vendi i tij do të angazhohet për zhvillimin e bashkëpunimit të dyanshëm në mes Turqisë dhe Kosovës. Ai njëherit shprehu besimin se Ballkani do të jetë rajon i stabilitetit, tolerancës dhe bashkëpunimit.
"Në emër të Turqisë dua të them se ne jemi të gatshëm të ofrojmë ndihmë për Kosovën në zhvillimin ekonomik dhe të fushave të tjera", tha shefi diplomacisë turke, duke shprehur kënaqësinë që takoi Presidentin Rugova dhe për të tha se "është një personalitet historik që ka marrë pjesë në një proces historik".


Turqia përkrah zgjidhjen e çështjes së Kosovës në përputhje me vullnetin e popullit

Prishtinë, 11 tetor 2005/TN /QIK - Kryekuvendari Nexhat Daci dhe Kryeministri Bajram Kosumi kanë pritur në takime të veçanta ministrin e Jashtëm të Turqisë Abdullah Gyl, i cili shoqërohej nga një delegacion i gjerë, i përbërë ehde nga deputet të pozitës dhe opozitës. Shefi i diplomacisë turke tha se Turqia favorizon zgjidhjen e çështjes së Kosovës sipas vullnetit të qytetarëve për vetëvendosje, parim ky themelor i demokracisë.
Kryekuvendari Daci shfaqi shpresën se Turqia do të luajë rol të rëndësishëm në këtë proces, dhe poashtu me potencialet e saj të mëdhaja ekonomike e shkencore mund ta ndihmojë zhvillimin e Kosovës. Një rol të veçantë tha se do të mund ta luante Turqia me hapjen e arkivave të saj, në këtë proces, ashtu siç ka luajtur rol të rëndësishëm në rasti e Bosnjes dhe në raste të tjera.
"I shpreha kënaqësinë e Kosovës që Turqia, me potencialet e saj krijuese dhe rezultatet e saj, të jetë në Ballkan dhe do të doja që Turqia të jetë një lokomotivë, e cila mbërrin e para në Bruksel dhe me vete ta marrë Ballkanin", tha Daci, pas takimit me delegacionin turk. "Turqia është faktor i rëndësishëm i NATO-s dhe do të ndihmojë Kosovën në rrugën e saj të integrimit euroatlantik", Daci.
Ndërkaq Kryeminstri Kosumi pas takimit me ministrin Gyl, tha se Kosova është e vendosur që të shkojë drejt njohjes së pavarësisë, e cila beson se do të përmbyllet, përkundër vështirësive në qershorin e ardhshëm. "Në qershor të vitit 2006 kur do të përmbyllet ky proces, Kosova do të bëjë hapin më të rëndësishëm në historinë e vet, si shtet demokratik, evropian, sikur të gjitha shtetet tjera të rajonit”, tha kryeministri Kosumi.
Kryeministri Kosumi ka uruar Turqinë për fillimin e negociatave të saj për anëtarësim në BE. Ministri turk z.Gyl tha se dëshira e Turqisë është që Kosova të jetë më e pasur, më e qetë. "Dhe ne si Turqi jemi të gatshëm të ofrojmë ndihmë zhvillimore në të gjitha aspektet", tha ai, duke u shprehur se në Kosovë ka sjellë përshëndetjen e gjithë popullit turk.
Ai tha se vullneti i qytetarëve të Kosovës do të përcakothet sipas dëshirës së tyre në bazë të normave demokratike. "Ne do të jemi pranë Kosovës, do ta ndihmojmë atë në çdo fushë të jetës, si në aspektin politik, ekonomik apo social", premtoi diplomati Gyl.

Turqia do t'i mbështesë proceset nëpër të cilat po kalon Kosova dhe do ta përkrahë vullnetin e qytetarëve të saj, cilido qoftë ai. Edhe pse nuk u shpreh qartë pro pavarësisë së Kosovës, Gyl tha se Turqia do ta respektojë përcaktimin e qytetarëve të Kosovës. "Padyshim se zhvillimet do të shkojnë kah respektimi i vullnetit dhe ky vullnet do të realizohet ashtu si në çdo shoqëri demokratike", përfundoi Gyl.
Ministri Abdullah Gyl është takuar edhe me kryeadministratorin Soren Jessen Petersen, dhe poashtu me përfaqësuesit e grupit parlamentarë të tjerët. Ai pritet ta vizitojë edhe Mamushën, njësinë e re komunale, që banohet kryesisht nga komuniteti turk.