Mbi 19 mijë të vdekur nga tërmeti në Azinë Jugore

Mbi 19 mijë të vdekur nga tërmeti në Azinë Jugore

10 tetor 2005 /TN

Zëri i Amerikës (09.10.2005)

Pakistani bëri të ditur se tërmeti la të vrarë më shumë se 19 mijë persona dhe zyrtarët paraljmëruan se numri mund të rritet, ndërkohë që skuadrat e shpëtimit vazhdojnë të hyjnë në zonat e tragjedisë.

Presidenti Pervez Musharraf vizitoi zonat e shkatërruara nga tërmeti i ditës së djeshme dhe i bëri thirrje të gjitha vendeve të botës për ndihmë. Ai tha se nevojiten më shumë helikopterë për të arritur tek njerëzit në zonat e largëta ku rrugët ishin zënë nga rrëshqitjet e dheut.

Tërmeti 7.6 ballësh e kishte epiqendrën në pjesën e Kashmirit të kontrolluar nga Pakistani dhe ishte një nga goditjet më të fuqishme në rajon. Ministri i Brendshëm i Pakistanit Aftab Ahmed Sherpao i tha Zërit të Amerikës se fshatra të tëra janë shkatërruar.

Në të gjithë Pakistanin, njerëzit po gërmonin me duar për të gjetur të dashurit e tyre, ndërsa autoritetet po përpiqeshin të largoning grumbujt e gërmadhave me mjete ndërtimi. Skenat televizive paraqitën nëna që qanin afër shkollave të shkatërruara, ku qindra fëmijë besohet se kishin mbetur të mbuluar nga rrënojat.

Dëshmitarët thanë se thirrjet e fëmijëve për ndihmë dëgjoheshin edhe 24 orë pasi ndërtesa ishte rrëzuar. Në Indinë fqinje zyrtarët njoftuan për 600 të vdekur, shumica në pjesën e Kashmirit. Kryeministri indian Manmohan Sing foli në telefon me gjenaralin Musharraf dhe të dy udhëheqësit i ofruan ndihma vendeve të njeri tjetrit.

Përgjigja ndërkombëtare pas tërmetit

Ndërkohë komuniteti ndërkombëtar po i përgjigjet thirrjes urgjente për ndihmë për viktimat e tërmetit në Azinë Jugore. Banka Botërore ofroi 20 milion dollarë për Pakistanin ndërsa Bashkimi Evropian do të japë 3 milion e gjysëm dollarë.

Kombet e Bashkuara kanë dërguar bashkërenduesit e tyre në rajon. Japonia dhe Turqia, të cilat janë vende ku ndodhin më shumë tërmete po dërgojnë skudra të ndihmave.

Tokio-ja po dërgon më shumë se 200 mijë dollarë ndihma materiale. Australia premtoi 400 mijë dollarë në ndihma mjekësore, ndërsa Kina ka dërguar një skuadër 49-anëtarëshe.

Shtetet e Bashkuara po dërgojnë helikopterë për të ndihmuar përpjekjet e kërkimit dhe shpëtimit; edhe Britania, e cila ka një komunitet të madh nga Azia Jugore, ofroi një skuadër mjekësh dhe 175 mijë dollarë ndihma. Edhe Afganistani po dërgon helikopterë dhe ilaçe në Pakistanin fqinjë.// lk

Presidenti Bush: Shtetet e Bashkuara do të dërgojnë ndihma në Pakistan

10 tetor 2005 /TN

Zëri i Amerikës (09.10.2005)

Presidenti Bush tha se Shtetet e Bashkuara po dërgojnë para, paisje dhe tetë helikopterë në Pakistan për të ndihmuar në përpjekjet e kërkimit dhe shpëtimit pas tërmetit.

Presidenti foli para gazetarëve sot në Shtëpinë e Bardhë pas një bisede telefonike me presidentin pakistanez Pervez Musharraf dhe një mbledhjeje me diplomatë pakistanezë. Presidenti Bush dha ngushëllimet e tij më të thella dhe tha se Shtetet e Bashkuara duan të ndihmojnë në çdo mënyrë që do të jetë e mundur.

Ai tha se helikopterët po dërgohen meqenëse Pakistani kishte shprehur shqetësim në lidhje me mungesën e mjeteve ajrore në zonat e goditura më rëndë nga tërmeti. Ushtria amerikane planifikon gjithashtu të dërgojë aeroplanë me batanije, tenda, çarçafë dhe ujë të pijshëm.

Presidenti Bush e konsideron Pakistanin si aleatin kryesor në luftën e kryesuar nga Shtetet e Bashkuara kundër terrorizmit. Pakistani ishte një prej shumë vendeve që i ofroi ndihmë Shteteve të Bashkuara për uraganin Katrina.