Berisha: Qeveria e Shqipërisë mbështet zgjidhjen e problemit të Kosovës në përputhje me vullnetin e popullit të saj

Berisha: Qeveria e Shqipërisë mbështet zgjidhjen e problemit të Kosovës në përputhje me vullnetin e popullit të saj

Tiranë, 1O tetor 2005 /TN /QIK - Kryeministri i Shqipërisë Sali Berisha ka thënë se mbështet plotësisht deklaratën e ministrit të Punëve të Jashtme, Besnik Mustafaj, për pavarësi të kushtëzuar të Kosovës. Këto komente Berisha i bëri dje në Tiranë gjatë prezantimit të stafit të këshilltarëve të tij, duke u përgjegjur interesimit të gazetarëve lidhur me qëndrimin e Shqipërisë për pavarësisë e Kosovës.
"E kam theksuar dhe e theksoj se, nëse është fjala për kushte, unë në fakt nuk di pavarësi të pakushtëzuar. Natyrisht duhet të jemi realistë. Këtu mund të ketë disa udhëzime specifike, të cilat absolutisht nuk cënojnë aspak lirinë e qytetarëve të Kosovës dhe shtetit të Kosovës", ka sqaruar Berisha.
Kryeministri shqiptar theksoi se qeveria që ai drejton mbështet zgjidhjen e këtij problemi madhor në përputhje me vullnetin e popullit të Kosovës dhe në bashkëpunim me autoritetet ndërkombëtare që, sipas tij, në të gjitha variantet, qytetarët e Kosovës janë përcaktuar për pavarësi.
"Komuniteti ndërkombëtar nuk është shprehur kundër kësaj ëndrre legjitime të qytetarëve të Kosovës, por natyrisht komuniteti ndërkombëtar insiston në disa kushte, të cilat, mendoj unë, veçse e maturojnë më shumë pavarësinë e një vendi që synon të integrohet në BE", është shprehur Berisha, i cili ka mbështetur plotësisht raportin e ambasadorit Kai Eide për Kosovën, duke e cilsuar si "një dokument shumë të rëndësishëm, të ekulibruar, i cili jo vetëm paraqet një analizë të hollësishme dhe të shkëlqyer të zhvillimeve në rajon, por edhe hap një kapitull të ri drejt paqes, stabilitetit dhe integrimit të Kosovës dhe rajonit në BE".

"Kam bindjen se ecja drejt statusit final në përputhje me vullnetin e popullit të Kosovës dhe në bashkëpunim të ngushtë me komunitetin ndërkombëtar shënon një arritje të madhe jo vetëm për qytetarët e Kosovës, por për mbarë rajonin e Ballkanit e më gjerë", tha Berisha.