10 Tetor: Dita Botërore per Shëndetin Mendor - Deklaratë e Qendrës Shqiptare për Rehabilitim të Traumës dhe Torturës

Deklaratë e Qendrës Shqiptare për Rehabilitim të Traumës dhe Torturës

10 Tetor: Dita Botërore per Shëndetin Mendor

9 tetor 2005 /TN

Solidaritet, në emër të humanizmit për personat me probleme të shëndetit mendor!

Që ata të mos mbeten të izoluar dhe të braktisur nga shoqëria!

Në ditët e sotme, një numër i konsiderueshëm personash vuajnë nga probleme të shëndetit mendor; të tjerë përjetojnë stres si pasojë e varfërisë, shpërnguljes, dhunës, dhe shfrytëzimit. Abuzimi me substancat dhe probleme të tjera të sjelljes ndikojnë jetën e adoleshentëve, të të rinjve dhe të moshuarve. Gra dhe fëmijë të cilët vuajnë pasoja të tmerrshme nga abuzimi. Të gjitha këto, preçedentë të shqetësimeve mendore.

Të gjithë këta persona kanë nevojë për mbështetje, përkrahje dhe për një vend të caktuar në shoqëri. Të gjithë e dimë se mundësitë e tyre janë të pakta. Sot ata ndihen të braktisur, pa përfituar trajtimin e duhur mjekësor, psikologjik e social, pa mundësinë për të fituar jetesën, duke jetuar çdo ditë me ankthin e të nesërmes, keqardhjen për varësinë e tejskajshme nga të tjerët dhe frikën konstante të të mbeturit vetëm.

Kush do të kujdeset për ta!? A ndihet dikush i detyruar qoftë moralisht apo ‘ligjërisht’ për t’i respektuar si qënie njerëzore, duke u ofruar kujdes shëndetësor, punë, mundësi jetese dhe integrimi në shoqëri.
Nga ana tjetër, Shqipëria është dukë u rimëkëmbur nga kaosi dhe dhuna e përjetuar gjatë për më tepër se 45 vjet izolim, duke kufizuar ekstremisht aftësitë e profesionistëve të shëdetit mendor për të ndjekur modalitetet bashkëkohore në diagnostikim dhe trajtim.

Një ‘Ligj për Shëndetin Mendor’ është aprovuar nga Parlamenti Shqiptar në Mars të vitit 1996.

Ligji shprehet qartë, e drejta për përkujdesje ndaj personave me probleme të shëndetit mendor. Në këtë ligj qartësohen edhe detyrimet që kanë mjekët e veçanërisht institucionet përkatëse shtetërore për mbrojtjen e të drejtave .

Nëse ky ligj do të zbatohej, nuk do të ekzistonin persona të cilët mbeten pafundësisht dyerve të spitaleve psikiatrike, të stigmatizuar e të lodhur, pa pasur alternativë tjetër, duke urryer zgjidhjen e vetme, ‘shtëpinë burg’ ...

Duke u mbajtur pa vullnetin e tyre në kushtet e një izolimi total, dhunohen në çdo moment të drejtat e këtyre personave, ligji dhe parimet etike profesionale.

QSHRT, fton të gjithë aktorët të cilët punojnë në fushën e shëndetit mendor dhe të të drejtave të njeriut të ngrenë zërin dhe të bashkërendojnë përpjekjet në mbrojtje të personave me probleme të shëndetit mendor duke kërkuar:

Marrjen e përgjegjësisë nga ana e instancave shtetërore, për vënien në zbatim të Ligjit për Shëndetin Mendor.

Zhvillimi i mëtejshëm një sistemit komunitar të ndryshëm nga ai ekzistues i bazuar në hospitalizimin e këtyre personave. Ndërtimi i qendrave të kujdesit komunitar, në kushtet e të cilave personat mund të rehabilitohen në komunitet, duke ndjerë se dikush është pranë tyre dhe se kanë një vend në shoqëri.

Duke konsideruar faktin se Shqipëria si anëtare e OKB, është subjekt i monitorueshëm edhe përsa i përket Mbrojtjes së Personave me Probleme Mendore, sipas legjislacionit ndërkombëtar për të drejtat e njeriut të ratifikuar nga Shqipëria, keqtrajtimi i personave me probleme të shëndetit mendor përbën dhunim të të drejtave të njeriut. Pra dhunimi i të drejtave, po përfshin të paktën 600 persona me probleme të shëndetit mendor, të cilët meritojnë kushte njerëzore jetese dhe trajtimi.

Për të ushtruar një presion më këmbëngulës mbi autoritetet për respektimin e të drejtave të pacientëve të hospitalizuar të cituar edhe në legjislacion.

Të ndihmojmë në fuqizimin e përdoruesve, Shoqatave të Familjarëve të të Sëmurëve Mendorë me synim që ata të ngrenë zërin për denoncimin e problemeve dhe kërkimin me këmbëngulje të zgjidhjes së tyre.