Papilloni - S. Limani

OPINIONE

Papilloni

06 tetor 2005 / TN

Skënder LIMANI

Është kafiteri interesante në Prishtinë. Në dukje të parë, duket sikur ato kafiteritë ku ti, thjeshtë, shkon aty për nja kafe ose makiato, ku kalon pushimin e drekës ose ku e lexon gazetën ditore, aty ku shihesh me shokun ose shoqen, me të dashurën ose dashurin, etj., etj. Po, Papilloni i ka të gjitha këto tipare të zakonshme të një kafiterie të zakonshme, por prapë, ofron më shumë sesa një vend për kafe e relaksim.

Pas kohës së luftës edhe qytetin e Prishtinës e vërshuan refugjatë nga anembanë Kosova. Këta njerëz e familje mund të thirren refugjatë sipas statusit të menjëhershëm që merret në momentin kur ndërrohet vendbanimi.

Paskëtaj, ai që ka ndërruar vendbanimin ka nevojë për disa mësime të përshtatjes në vendbanimin e ri. Ka nevojë që të njihet me rrethinën, fqinjësinë, pra, bashkësinë e re në përgjithësi.

Askush nuk ka pritur që qyteti i Prishtinës të vërshohet aq shumë nga ardhacakë nga pjesë të tjera të Kosovës. Natyrisht, këtu ndihma e përkohshme e vendosjes për shkak të kushteve të vështira ekonomike nuk llogaritet. Ata kanë ardhur këtu, thjeshtë, për të jetuar.

Askush këtu në Prishtinë nuk ka organizuar ndonjë orë mësimi për ardhacakët e ri, që t’iu shpjegohen disa veti të të jetuarit në Prishtinë, të mënyrës së të jetuarit këtu. Jo pse Prishtina është qytet me kulturë të zhvilluar dhe atë botërore, por thjeshtë, këto mësime të zhvillohen e të shërbejnë për shkak të lehtësimit të komunikimit mes fqinjëve të ri, pra, për shkak të lehtësimit të jetesës së përbashkët.

Ka shumë thashetheme për Prishtinën. Nuk është me rëndësi nëse ato janë të vërteta ose jo. Prishtina, pra qytetarët e Prishtinës, fajësohen për të gjitha, për çkado që dikujt i bie ndërmend, si për dështimet politike, ekonomike, arsimore, kulturore etj., etj. Sillen thua se vetë qytetarët e Prishtinës vendosin për të gjitha. E ndonjëherë ndodhesh në një situatë ku thua se e tërë Kosova është nga Prishtina. Këdo që e ndalon në rrugë, si në Prishtinë, Pejë, Gjakovë, Gjilan etj., etj., do të të thotë se është nga Prishtina. Sic!

Prishtina është vend i rok-end-rollit, muzikës, sportit, politikës, kulturës në përgjithësi, sepse këto gjëra janë pjesë përbërëse natyrore të të jetuarit në kryeqytet. Vend ku beli i shpalosur i femrave është përditshmëri, ku prostitucioni është normal, kur sharja, mallkimi, vrasjet, plaçkitjet janë normale.

Vend ku fillon dhe mbaron zhvillimi i kulturës në përgjithësi. Vend ku, tek e fundit, filloi edhe lufta për Kosovën dhe më pas u përhap në pjesë të tjera të Kosovës. Së pari rok-en-rolli ishte përhapëse e fuqishme e kësaj ideje. Ajo që nuk u arrit përmes çiftelisë u zëvendësua lehtë nga kitara elektrike.

Prishtina është qytet që asnjëherë nuk u qeverisë nga Prishtinalitë. E ky është edhe mallkimi më i madh i saj. Vend ku ardhacakët marrin rol aktiv në vendimmarrje për Prishtinën dhe krejt Kosovën.

Të shkruarit për Prishtinën nuk përfundon asnjëherë. Por vendet si Papilloni janë të mirëseardhura sepse aty edhe ardhacakët e rinj që vijnë për të studiuar në Prishtinë, e që asnjëherë nuk kthehen në shtëpi të tyre për të zhvilluar bashkësinë e tyre, lehtë mund të marrin mësime për integrimin që pastaj më lehtë të integrohen më tutje, p.sh. në Bashkimin Evropian (BE).

Pse ne nga Prishtina do të kemi gjithnjë këtë rol?