Ministri sllovak thotë se bisedimet për statusin duhet të rezultojnë me vullnetin e popullit të Kosovës

Ministri sllovak thotë se bisedimet për statusin duhet të rezultojnë me vullnetin e popullit të Kosovës

Prishtinë, 6 tetor 2005 /TN /QIK - Bisedimet për çështjen e statusit të Kosovës duhet të përfundojnë në pajtim me vullnetin e popullit të Kosovës dhe me inkurajimin e paqes rajonale, ka deklaruar sot ministri i Punëve të Jashtme të Sllovakisë, Eduard Kukan pas takimit me kryeministrin e Kosovës Bajram Kosumi dhe shefin e UNMIK-ut Soren Jesen Petersen.
Gjatë takimit shefi i diplomacisë sllovake, z.Kukan, i ka ofruar ndihmë kryeministrit Kosumi, në ndërtimin e sektorit financiar dhe bankar.
Sipas kryeministrit Kosumi çështja që është disktuar me interes të veçantë, është çështja e bisedimeve, fazën e re në të cilën po hyn Kosova, pas dorëzimit të raportit të ambasadorit Eide. "Biseduam për pikëpamjet tona dhe mundësitë tona që të ecim dhe të përfundojmë këtë proces me sukses, si dhe për angazhimin e Qeverisë së Sllovakisë në kuadër të Bashkimit Evropian", tha Kosumi.

Kryeministri përsëriti qëndrimin se Qeveria e Kosovës dhe popullit të Kosovës që të bisedojë me bashkësinë ndërkombëtare për krijimin e shtetit të Kosovës, ndërsa me Beogradin "për të zgjidhur disa probleme që janë thelbësore në mes Kosovës dhe Serbisë, siç është çështja e minoritetit serb në Kosovë, ajo e trashëgimisë kulturore, fetare".
Kryeministri është shprehur pozitivisht ndaj ofertës së diplomatit sllovak për të ndihmuar në ngritjen e sistemit finaciar dhe bankar të Kosovës, sipas modelit të Sllovakisë, që sipas informacioneve të Kryeministrit, ajo ka një prej sistemeve më të përkryera financiare, jo vetëm në rajon, por gati në gjithë Evropën. "Ministri Kukan ofroi shërbimin e mirë, gatishmërinë e ekspertëve sllovakë që të vijnë këtu në bashkëpunim me Qeverinë e Kosovës që të ndihmojnë në perfeksionimin e sistemit financiar", tha Kosumi.
"Ofrova ndihmesën e mundshme të Sllovakisë në ndërtimin e sektorit financiar dhe bankar në Kosovë, për shkak se ne kemi një përvojë të freskët në këtë aspekt pas ndarjes së ish-Çekosllovakisë", tha ministri sllovak Kukan.
Diplomati sllovak, tha se vendi i tij dëshiron që të jetë aktiv në rajonin e Ballkanit, i cili rajon është mesin e prioriteteve të diplomacisë sllovake, dhe se në këtë kontekst vendi i tij dëshiron të luajë një rol në zgjidhjen e situatës në këtë pjesë të Ballkanit.
Sllovakia, e cila është anëtare e BE-së, pret që nga një janari i vitit të ardhshëm të zgjedhet edhe anëtare e Këshillit të Sigurimit të OKB-së. "Ky është shkaku, pse është shumë e rëndësishme për ne që të dimë dhe të marrim sa më shumë informata që është e mundshme, në mënyrë që të marrim një pozicion të përgjegjshëm në bisedimet e ardhshme", tha ai, duke konfirmuar se është për një zgjidhje proevropiane.
"Ne duam që të jemi të inkuadruar në këto bisedime shumë serioze që duhet të rezultojnë me kurajimin e stabilitetit në rajon dhe duhet të jenë në pajtim me vullnetin e popullit të Kosovës", tha ministri Kukan. Ai ka tërhequr vërejtjen se domosdoshmërisht duhet të tregohet përgjegjësi e lartë, sepse "çështja që duhet të zgjidhet mund të ndikojë shumë në situatën në këtë rajon dhe mund të ketë konsekuenca edhe në tërë kontinentin e Evropës".
Shefi i diplomacisë sllovake fillimisht pati një takim me kryeadministratorin Soren Jesen Petersen, të cilin e vlerësoi të qëlluar, në kohën kur i duhet Kosovës.
Kukan tha se Sllovakia do të jetë aktive gjatë bisedimeve të ardhshme për statusin përfundimtar të Kosovës, por siç tha, ndërkohë duhet të merren parasysh shumë faktorë si dhe të respektohet vullneti i popullit, tha Kukan pas takimit me Petersenit.
"Ne konsiderojmë se negociatat e ardhshme kanë rëndësi të madhe për popullin e Kosovës, për vendet e rajonit dhe për dimensionet më të gjera evropiane", tha Kukan.
Pyetjes direkte nëse Sllovakia e mbështet pavarësinë e Kosovës, Kukan u përgjegj duke thënë se duhet respekuar vullnetin e popullit. "Ne do të jemi aktivë në negociata dhe pas tyre situata do të jetë më e qartë dhe mendoj se zgjidhja përfundimtare duhet të jetë e pranueshme nga të gjithë. Ndryshe nëse bëhet pa vullnetin e disa grupeve atëherë do të krijojë probleme potenciale në të ardhmen", u shpreh Kukan.
Petersen tha se BE do të luajë një rol të madh dhe në këtë drejtim edhe Sllovakia si anëtare e saj, prandaj edhe minsitrit Kukan është bërë në këtë kohë, tha Petersen.
Ministri i Jashtëm sllovak Eduard Kukan u takua edhe me kryeparlamentarin Nexhat Daci, ndërkaq pasdite takohet me Presidentin Ibrahim Rugova.