Presidenti Rugova priti ministrin e Punëve të Jashtme të Finlandës, Erkki Tuomioja

Presidenti Rugova priti ministrin e Punëve të Jashtme të Finlandës, Erkki Tuomioja

Prishtinë, 5 tetor 2005 /TN /QIK - Presidenti i Kosovës dr.Ibrahim Rugova, priti sot në rezidencën e tij në Velani, ministrin e Punëve të Jashtme të Finlandës, z.Erkki Tuomioja.
Presidenti Rugova pas takimit me shefin e diplomacisë finlandeze, tha se e ka njoftuar mysafirin me progresin në Kosovë dhe po ashtu me qëndrimin për njohje të drejtpërdrejtë të pavarësisë së Kosovës, që siç u shpreh, do të ishte në shërbim të paqes në rajon e më gjerë.
Presidenti Rugova bisedën me ministrin finlandez e vlerësoi të suksesshme për rrugën që do të ndjekë Kosova pas raportit të ambasadorit Eide për Kosovën, që tashmë ia ka dorëzuar sekretarit të Përgjithshëm të OKB-së Kofi Anan.
"Me ministrin e Jashtëm të Finlandës patëm një bisedë të frytshme. E njoftova për gjendjen stabile që kemi në Kosovë, pastaj për progresin që kemi bërë dhe natyrisht për rrugën ndërkombëtare tash pas vlerësimit të raportit të ambasadorit Eide, që mund të hapet rruga për një takim ndërkombëtar, pra biseda për të ardhmen e Kosovës, që është pavarësia", u shpreh Presidenti Rugova, duke theksuar se ai insiston në njohjen direkte të pavarësisë së Kosovës, që do ta qetësonte këtë pjesë të Evropës e të botës: "Një Kosovë e integruar në Bashkimin Evropian, në NATO, dhe në miqësi permanente me SHBA-të".
Presidenti tha se po bëhen përgatitjet për bisedime ndërkombëtare dhe se tashmë është gjithëçka gati. "Por, ne po bëjmë përgatitjet për rrugën ndërkombëtare që jemi gati", tha Dr. Rugova dhe falënderoi Finlandën për ndihmën që i ka dhënë Kosovës në planin ushtarak, civil dhe të tjera dhe se përkrahje pret edhe në të ardhmen "për çështjen e Kosovës, për pavarësinë e Kosovës", u shpreh Presidenti Rugova.
Shefi i diplomacisë finlandez tha pas takimit se është i lumtur që po e shihte Presidentin Rugova në kryerjen e detyrave të tij dhe shfaqi besimin për rolin e veçantë që do të luajë në procesin e negociatave, sikur që ka kryer rol të rëndësishëm për Kosovën deri më tash dhe se do t'ia dalë në përmbylljen e këtij procesi. "Ne besojmë se Presidenti Rugova ka për të luajtur një rol të rëndësishëm në negociatat e ardhshme, ndërsa puna që ka bërë për vendin e tij duhet të përmbyllet.

Na vjen mirë që ai është në gjendje që t'i kryejë funksionet e tij", tha ministri Tuomioja. Finalanda është e përgatitur për të gjitha çështjet që e shqetësojnë ballkanin Perëndimor, tha ai më tej, e në veçanti për çështjen e Kosovës që po shkon drejt zgjidhjes, meqë vendi i tij do të marrë kryesimin e BE-së në gjysmën e dytë të vitit të ardhshëm.
"Për këtë arsye është me rëndësi për ne që të dëgjojmë nga afër, të gjitha palët, sepse ne kemi interesa të përbashkëta evropiane, për paqen stabilitetin dhe përparimin. Ne do të ndihmojmë zgjidhje të pranueshme për të gjithë, me besim për integrimin e të gjithë rajonit në BE", tha ministri finlandez Tuomioja. Ai tha se është i impresionuar me perspektiven evropiane të të gjithëve, dhe uroi që kjo të bëhet e mundur edhe me kontributin e vendit të tij.



Presidenti Rugova thërret për nesër takimin e Grupit Negociator

Prishtinë, 5 tetor 2005 /TN /QIK – Në Rezidencën e Presidentit të Kosovës, Ibrahim Rugova mbahet takimi i Grupit Negociator për statusin e Kosovës, njofton zyra e Presidentit.

Takimi do të mbahet në orën 12.00, ndërsa në takimin e anëtarëve të Grupit Negociator për statusin e Kosovës janë ftuar: kryeparlamentari Nexhat Daci, kryeministri Bajram Kosumi, kryetari i PDK-së Hashim Thaçi dhe kryetari i Partisë ORA Veton Surroi. Në këtë takim pritet të diskutohet rreth përgatitjeve për zgjidhjen e statusit të Kosovës. Ky është takimi i parë i këtij grupi, i cili mblidhet pas një sërë konsultimesh që janë bërë ditëve të fundit.