Sot në Mitrovicë me nderime të larta u varros Faruk Spahija

Sot në Mitrovicë me nderime të larta u varros Faruk Spahija

Prishtinë, 4 tetor 2005 /TN /QIK - Sot në varrezat e qytetit në Shipol të Mitrovicë me nderime të larta u varros kryetari i Komunës së Mitrovicës Faruk Spahia, ku merrnin pjesë udhëheqës të lartë të institucioneve dhe të partive, familjarë dhe mijëra qytetarë.
Figurën e Faruk Spahisë, i cili ndërroi jetë dje nga një sëmundje e rëndë, e vlerësuan lart si figurë atdhetare, politike dhe humane. Telegramin e ngushëllimit me rastin e vdekjes së Spahisë të Presidentit të Kosovës dr.Ibrahim Rugova e lexoi para të pranishmëve, këshilltari i tij, Sali Cacaj.
Ministri Pushtetit Lokal, Lutfi Haziri, njëherit anëtar i Kryesisë së LDK-së, anëtar i së cilës ishte edhe Faruku, në ceremoninë e varrimit, tha se vdekja e tij, është humbje e madhe jo vetëm për familjen Spahiu, por edhe për Kosovën dhe institucionet, të cilave ia kushtoi jetën. Haziri e përshkroi të ndjerin Spahiu, që la pas vetës tre fëmijë, si një "burrë të dinjitetshëm dhe institucionalist të pashembullt".

Ai përkujtoi punën e përbashkët me Farukun në LDK, para dhe pas luftës në Kosovë. "Faruku do të na mungojë të gjithëve”, tha Haziri, ndërsa e ngushëlloi në emër të LDK-së dhe Qeverisë së Kosovës, familjen Spahiu dhe të gjthë të pranishmit. I falemi kujtimit të tij të përjetshëm", tha Haziri. Ndërkaq, kryetari i komunës së Prishtinës, Ismet Haziri, në emër të Asociacionit të Komunave, të cilin e drejton ai, tha se lajmi për vdekjen e Farukut ishte pikëllues, dhe ka lënduar zemrat e të gjithëve.

Dhembja ishte më e madhe, sipas Beqirit, pasi ishte krijuar bindja se Faruku do t'ia arrinte ta sfidonte edhe këtë sëmundje të rëndë, siç ia ka arritur të sfidojë vështirësitë në politikë. Beqiri, figurën e Farukut, familja e të cilit tradicionalisht është dalluar për patriotizëm të lartë, e vlerësoi si punëtor të shquar, këmbëngulës në realizimin e aspiratave të përbashkëta.

"Jemi krenarë që kishim në mesin tonë një njeri si ti", tha Beqiri, i cili nuk arrinte ta fshihte dot dhembjen, dhe as lotët, duke shtuar ndjenjën e pikëllimit tek miqtë dhe dashamirët e Spahisë. "Kryet detyrën më të rëndë pas luftës në politikë", tha Beqiri, gjihëherë duke iu drejtuar shpirtit të Farukut, ndërsa ka ngushëlluar familjen Spahia për, siç tha ai, personalitetin e shquar të Farukut. "AKK-ja përherë do ta kujtojë këtë personalitet", tha Beqiri.
Nënkryetari i Kuvendit Komunal të Mitrovicës, Mursel Ibrahimi, figurën e Faruk Spahisë e vlerësoi si pedante, të thjeshtë, plot mirësi, që ideal kshte bashkimin e Mitrovicës dhe arritjen e pavarësisë, të cilat qëllime vdekja ia ndërpreu. Ndërsa, në emër të Bashkësisë Islame të Kosovës, Nexhmedin Hoxha ngushëlloi familjen Spahija dhe të gjithë të pranishmit.

Ai tha se të flitet për Farukun, do të thotë të flasësh për një njeri të rrallë në histori. Edhe ish-kolegët e punës, përkatësisht të termocentralit Kosova A, ku kishte punuar nga vitet 1975-1992, ngushëlluan familjen Spahija dhe gjithë të pranishmit, duke e vlerësuar sit ë veçantë bashkëpunimin me Farukun.
Gjithashtu familjes Spahia i kanë dërguar telegrame të shumta ngushëllimi, nga ministritë si ajo e Pushtetit Lokal, degët e LDK-së në diasporë, kuvendet komunale, Ferizaji, Istogu, familjet si Zemaj, Manaj etj.
Ndërkaq para ceremonisë së varrimit, në shtëpinë e kulturës, "Rexhep Mitrovica", në Mitrovicë u mbajt komemoracioni kushtuar Faruk Spahisë, kryetar i komunës në dy mandate, ndërsa të dytin nuk arriti ta përmbyllte për shkak të vdekjes së parakohshme, në moshën 53 vjeçare, 25 qershor 1952- 3 tetor 2005.
Ndërkaq para ceremonisë së varrimit, në shtëpinë e kulturës, "Rexhep Mitrovica", në Mitrovicë u mbajt komemoracioni kushtuar Faruk Spahisë.
Nënkryetari i LDK-së Kolë Berisha tha se vdekja e Farukut e bën më të vogël LDK-në e në veçanti Mitrovicën. "Ne si shoqëri në përgjithësi, dhe LDK-ja në veçanti, prej sot, jemi më të zvogëluar, më të pakët, më të vetmuar dhe më të varfër edhe për një njeri; jemi më të goditur edhe për një bashkëluftëtar dhe bashkëushëtar në rrugën tonë drejt realizmit të aspiratave tona shekullore", tha z.Berisha.

Ai theksoi se nuk ndjehet aspak mirë për detyrën që të flasë për mikun e vdekur. "Jam vërtetë fatkeq, që nga kolegët e mi mu nda ky rol kaq i rëndë, që ara jush, të dal me këtë fajlë rasti, ngase, jam i vetëdijshëm se, në këso lloj tubimesh, më shumë flet heshtja dhe fyyrat e ngrysura të pjesëmarrësve, më shumë flet loti dhe dhebja, se sa cilado fjalë e shkruar, qoftë ajo edhe nga pena më e hollë e letrave tona. Kur flet loti, heshtë fjala", tha z.Berisha.

Ai më pastaj përkujtoi detyrat e vështira të Spahisë. Udhëheqja e LDK-së në Mitrovicë Spahisë i qe besuar për disa vjet me radhë, pas vrasjes së profesor Latif Berishës nga forcat serbe.
"Ndërkaq nga vitit 1998, duke qenë anëtar i Kryesisë Qendrore të Lidhjes Demokratike të Kosovës, Faruku ishte njëri nga bashkëpunëtorët e afërt të Presidentit Rugova", tha z.Berisha. Ai tha se kishte fatin që për tetë vjet ta njihte dhe të punonte nga afër me Farukun, duke e vlerësuar si "njërin nga bashkëpunëtorët më të afërt, më të respektuar dhe politikisht e kombëtarisht, më të përgatitur, në Kryesinë e Lidhjes Demokratike të Kosovës, nga 15 marsi i vitit 1998, e deri në kohën kur sëmundja ia pamundësoi të jetë aktiv".
"Vdekja e hershme e ndau nga aktiviteti politik e komëbtar mu në kohën kur më së shumti prisnim prej tij", tha Berisha.
Ndërsa, nënkryetari i komunës Mursel Ibrahimi, farkun e quajti engjëll të qytetit të Mitrovicës. Ai portretin e Farukut e vlerësoi të çiltër, krenarë dhe dinjitozë, por njëherit tha se ishte njeri me energji vullkanike. Ai tha se në nderim të kësaj figure madhështore të Mitrovicës, 4 tetori është shpallur ditë zie në Mitrovicë, ndërsa Faruku është shpallur qytetar nderi i saj.


Faruk Spahija arriti ta shijojë lirinë e Kosovës, por jo edhe pavarësinë e saj, tha Kolë Berisha

Prishtinë, 4 tetor - Me rastin e vdekjes së anëtarit të Kryesisisë qendrore të LDK-së dhe kryetarit të Komunës së Mitrovicës, Faruk Spahija, Lidhja Demokratike e Kosovës mbajti sot në Teatrin Kombëtarë të Prishtinës një mbledhje komemorative, në shenjë përkujtimi për jetën dhe veprën e tij.
Merrnin pjesë familjarë të të ndjerit, bashkëpunëtorë e zyrtarë të lartë të LDK-së dhe të institucioneve të Kosovës.
Për jetën, veprën dhe figurën prej politikani e atdhetari të Faruk Spahisë, foli nënkryetari i LDK-së Kolë Berisha. Ai theksoi se Faruku pati fatin që në fëmijërinë dhe rininë e tj të hershme, t'i ndjekë mësimet e para në shkollën kombëtare nga lënda e historisë, gjuhës dhe të traditës shqipe; të njihet me fatin e nëpërkëmbur të popullit të cilit i takonte dhe të brymosej me ndjenjën e shenjtë të atdhedashurisë.
Ngjarjet tragjike të zhvilluara, sidomos gjatë dy dekadave të fundit të shekullit të kaluar, tha më tej Berisha, sikundër për çdo shqiptar tjetër edhe për Farkun, ishin rasti më sublim, për të dhënë provimin e pjekurisë së tij politike dhe kombëtare. "Dhe, Faruk Spahija, vërtet e dha, madje me sukses humë të lartë atë provim", tha nënkryetari i LDK-s.
Duke folur për vlimet politike në Kosovë kah fundi i viteve të '80-ta dhe fillimi i të '90-tave të shekullit të kaluar, Berisha tha se Farukun e gjeti sekretar të Degës së sapothemeluar të LDK-së në Mitrovicë, si njërin ndër bashkëpunëtorët më të afërt, në mos më i afërti, i profesorit të nderuar, poetit të shquar dhe martirit të lirisë dhe të pavarësisë së Kosovës, Latif Berisha.

Pas vrasjes së profesor Berishës nga forcat serbe, tha më tej ai, udhëheqja e Degës në Mitrovicë, për disa vite me radhë, iu besua Faruk Spahiut, sikundër që, për dy mandate me radhë, në zgjedhjet e lira dhe demokratike, iu besua detyra e Kryetarit të Komunës së Mitrovicës. Ndërkaq, nga viti 1998, duke qenë në të njëjtën kohë, edhe anëtar i Kryesisë Qendrore të LDK-së, Faruku ishte njëri nga bashkëpunëtorët më të afërt të Presidentit Rugova.
Kolë Bersha tha se për gati tetë vite të plota, Farukun e ka pasur njërin ndër bashkëpunëtorët më të afërt e më të respektuar dhe më të përgatitur në Kryesinë e LDK-së deri në kohën kur sëmundja ia pamundësoi të jetë aktiv.
Vdekja e hershme e ndau nga aktivitetet politike e kombëtare mu në kohën kur më së shumti prisnim nga ai, tha Berisha, duke shtuar se ndryshe "nga shumë bashkëkombas tanë, Faruku arriti që, sado pak, ta shijojë lirinë e Kosovës, por, për fat të keq, jo edhe pavarësinë e saj."
Telegramin e ngushëllimit të Presidentit Ibrahim Rugova dërguar familjes Spahija e lexoi këshilltari i tij, Sali Cacaj.
Në emër të Kuvendit Komunal të Mitrovicës, në këtë mbledhje komemorative foli Fatmire Berisha, duke shprehur mirënjohje për punën e tij të palodhshme në krye të qytetit të Mitrovicës.

AAK ngushëllon familjen Spahija, KK të Mitrovicës dhe Presidentin Rugova

Prishtinë, 4 tetor 2005 /TN /QIK - Me rastin e vdekjes së kryetarit të Kuvendit Komunal të Mitrovicës dhe veprimtarit Faruk Spahija, kryesia e Aleancës për Ardhmërinë e Kosovës ka ngushëlluar familjen Spahija, KK të Mitrovicës dhe Presidentin e Kosovës, Ibrahim Rugova.
"AAK me pikëllim të thellë ka marrë lajmin për vdekjen e kryetarit të Kuvendit Komunal të Mitrovicës dhe veprimtarit të shquar të çështjes sonë, z. Faruk Spahija.
Duke ndarë dhembjen me bashkëfamiljarët e të ndjerit, kolegët e tij dhe të gjithë qytetarët e Mitrovicës, AAK vlerëson se z. Spahija do të kujtohet përherë për përkushtimin e lartë, si në përgjegjësinë e tij si kryetar i KK të Mitrovicës, ashtu edhe në punën e tij prej veprimtari të palodhshëm në shërbim të realizimit të aspiratave tona të përbashkëta për një Kosovë të lirë, shtet sovran e të pavarur", thuhet në një telegram ngushëllimi të AAK-së.