Sot në grevë janë hedhur punëtorët e arsimit dhe të shëndetësisë publike

Sot në grevë janë hedhur punëtorët e arsimit dhe të shëndetësisë publike

Prishtinë, 3 tetor 2005 /TN /QIK - Pas thirrjes nga Kryesia Ekzekutive e BSPK së, sot në grevë pa afat kanë hyrë të gjitha nivelet e sektorit të arsimit dhe të shëndetësisë publike. Punëtorët e arsimit dhe të shëndetësisë kërkojnë nivelizimin e pagave dhe zbatimin e Kontratës kolektive bashkë me anekset.
Të gjithë të punësuarit në Qendrën Klinike Universitare të Prishtinës janë duke bërë në grevë, ndërkohë që vetëm mjekët kujdestarë kanë si detyrimr të punojnë sipas orarit, si dhe disa reparte: emergjenca, kujdesi intensiv, dializa, salla e lindjes, transfuzioni, kuzhina dhe mirëmbajtësi i gjeneratorëve.
Këshilli grevist i QKU shprehet i bindur se greva do të vazhdojë deri në plotësimin e kërkesave të tyre. Po ashtu edhe punëtorët e arsimit po bëjnë grevë dhe mësimi nuk po zhvillohet në asnjë shkollë të kryeqytetit. Arsimtarët janë të detyruar të repesktojnë orarin dhe të qëndrojnë në shkollë, kurse nxënësve nuk u është lejuar hyrja në shkolla.
Grupi parlamentar i Partisë ORA në seancën e sotme të Kuvendit të Kosovës ka kërkuar që si çështje urgjente të dabatohet për grevën e punëtorëve të arsimit dhe shëndetësisë, por një propozim i tillë nuk u përkrah nga grupet e tjera parlamentare. Megjithatë kryeparlamentari Nexhat Daci kërkoi që dy komisionet parlamentare - për Arsim dhe Shëndetësi - të trajtojnë grevën e sotme.