Presidenti Rugova ka dekoruar Bardhyl Çaushin me Medaljen e Pavarësisë

Presidenti Rugova ka dekoruar Bardhyl Çaushin me Medaljen e Pavarësisë

Prishtinë, 3O shtator 2005 /TN /QIK - Presidenti i Kosovës, Dr. Ibrahim Rugova, me dekret të veçantë e ka dekoruar Profesor Bardhyl Çaushin me Medaljen e Artë të Pavarësisë për merita të Tij për lirinë dhe pavarësinë e Kosovës gjatë viteve '90.
Ky dekorim bëhet me rastin e gjetjes së eshtrave dhe varrimit të Prof. Bardhyl Çaushit.
Dorëzimi i Medaljes do të bëhet së shpejti në një ceremoni të veçantë.



Në Gjakovë sot u zhvillua ceremonia mortore e varrimit të 13 martirëve

Gjakovë 3O shtator 2005 /TN /QIK - Sot në Gjakovë u bë ceremonia e varrimit të 13 e martirëve nga ky qytet, trupat e të cilëve ditë më parë u sollën nga Serbia.

Në mesin e tyre ishte edhe prof. Bardhyl Çaushi, ish-dekan i Fakultetit Juridik në Prishtinë dhe veprimtar i njohur i çështjes kombëtare. Me këtë rast u mbajt një tubim përkujtimor kushtuar prof.Çaushit, në të cilin foli Prof. Fatmir Sejdiu.
Ndërkaq në Palestrën e Sporteve u mbajt një ceremoni mortore tjetër kushtuar 13 martirëve, në të cilën foli kryetari i KK të Gjakovës Aqif Shehu.
Ndërkaq sot në Pejë bëhet varrimi i 12 martirëve të ksaj komune.


Kryeministri ngushëllon familjen e prof. Bardhyl Çaushit

Prishtinë, 3O shtator 2005 /TN /QIK - Kryeministri Bajram Kosumi i ka dërguar një telegram ngushëllimi familjes së profesor Bardhyl Çaushit me rastin e identifikimit të trupit, të cilin gjatë luftës e patën kidnapuar forcat vrastare serbe.
"Profesor Çaushi ishte një intelektual i kalibrit të lartë, i cili gjithë jetën e vet punoi për edukimin e rinisë kosovare, si dhe punoi me përkushtim në vënien e bazave të shtetësisë së Kosovës.

Profesor Çaushin do ta kujtojmë përherë në Kosovë si pedagog dhe si njëri nga veprimtarët më të dalluar politik të viteve 90 ta, i cili kudo që paraqitej ngjallte shpresë dhe optimizëm", thuhet në telegramin e kryeministrit Kosumi.