Kryeministri Kosumi u bëri thirrje arsimtarëve që të mos nguten me greva

Kryeministri Kosumi u bëri thirrje arsimtarëve që të mos nguten me greva

Prishtinë, 30 shtator 2005 /TN /QIK - Kryeministri Bajram Kosumi tha se Qeveria e ka tërhequr në rishqyrtimin sistemin e pagave dhe u bëri thirrje arsimtarëve që të mos nguten me greva, pasi sipas tij ky problem nuk mund të zgjidhet duke bërë greva dhe protesta.
Ai tha se grupet punuese janë duke bërë analizën e sistemit të ri të pagave, duke parë saktësisht se ku janë lëshimet dhe sa para duhen shtesë për ta bërë këtë dhe a mund ta përballojë buxheti i Kosovës këtë sistem të ri, apo duhet ta ndryshojmë dhe ta reduktojmë vende-vende. Kryeministri Kosumi i bëri këto komente pas takimit të KEF-it.

BSPK ja shpall grevë të përgjithshme më 3 tetor

Prishtinë, 30 shtator 2005 /TN /QIK - Kryesia Ekzekutive e BSPK së pas shqyrtimit të kërkesave të disa sindikatave të pavarura për mbajtjen e grevës, vendosi që ta riaktivizojë vendimin mbi pezullimin e grevës së datës 9 qershor 2005, si reagim i moszbatimit të marrëveshjeve të nënshkruara nga Qeveria e Kosovës.
Pra, me këtë BSPK ja shpall grevë më 3 tetor 2005, me theks të veçantë në shërbimet civile të Kosovës dhe në ndërmarrjet publike.
Kërkesat e grevës do të jenë vetëm dy: zbatimi i Kontratës Kolektive me anekset plotësuese dhe nivelimi i pagave në shërbimet civile, në mënyrë retroaktive prej 1.07.2005.
Për organizimin e grevës më 3 tetor, Kryesia Ekzekutive e BSPK së zgjodhi edhe Këshillin Grevist, të cilën e përbëjnë pesë përfaqësuesit e shërbimeve civile dhe atyre publike, si dhe njëri nga nënkryetarët e BSPK së. Këshilli Grevist sot do të mbajë konferencë me gazetarë, ku do të precizojë mënyrën dhe modalitetet e organizimit të grevës në shërbimet civile dhe ato publike në Kosovë.