Fakultetet e mësuesisë dhe të drejta e njeriut

Fakultetet e mësuesisë dhe të drejta e njeriut

29 shtator 2005 /TN

Çerçiz Loloçi

Është zhvilluar dje konferenca kombëtare “Të drejtat e njeriut në universitete” ku kanë marrë pjesë përfaqësues të shoqërisë civile, të ministrisë së Arsimit, të botës akademike universitare dhe Institutit të Studimeve Pedagogjike. Drejtore e QSHDNJ-së, Kozara Kati, në fjalën e mirëseardhjes, ka shpjeguar detaje nga ky projekt pesëvjeçar që synonte të implementonte të drejtat e njeriut në të gjitha ciklet shkollore por sidomos në fakultetet e mësuesisë në sistemin universitar.

Nën moderimin e prof.Maringlen Spiro, kanë referuar specialistët e të drejtave të njeriut Yllka Hida, Ema Tërshana, Robert Xhedija, Erleta Mato, ndërsa e kanë pasuruar këtë konferenvë edhe diskutime të dekanëve të universiteteve në Shkodër, Korçë, Vlorë, Elbasan, Gjirokastër si dhe drejtues të shkolave tetëvjeçare dhe të mesme nga disa rrethe të vendit. Konferenca rekomandon disa propozime që do t’u dërgohen shkollave të larta, drejtorive arsimore, ministrisë së Arsimit
dhe komisionit parlamentar të arsimit.

Organizatorët e këtij projekti thonë se QSHDNJ-ja ka nisur qysh prej 1993-shit që të përfshijë të drejtat e njeriut në lëndë të ndryshme në ciklin e ulët dhe tetëvjeçar. Më pas, në vitin 2000 ky program u shtri në nivelet universitare, në fakultetet pedagogjike.

Një nga projektet që QSHDNJ-ja zbaton që nga viti 2000, është “Edukimi me të drejtat e njeriut në universitete”. Ky projekt ka gjetur shtrirje në rrethet Shkodër, Elbasan, Gjirokastër, Vlorë dhe Korçë. Shoqëria e hapur demokratike dikton koncepte dhe vlera konkuruese për të cilat QSHDNJ-ja është investuar prej vitesh në programin “Edukimi me të Drejtat e Njeriut”. Në kuadër të këtij programi janë ofruar dhe janë pranuar modele, në lidhje me metodologjitë dhe taktikat bashkohore konfort me stadartet ndërkombëtare.

Sot, këto standarde janë pjesë e sistemit arsimor në vend. Gjatë këtyrë 12-viteve, në kuadër të programit “Edukimi me të drejtat e njeriut”, QSHDNJ ka sjellë disa ndryshime të konsiderueshme. Një vend të rëndësishëm në këtë projekt kanë zënë trajnimet që synonnin përfshirje morale, praktike dhe institucionale. Komuniteti i mësuesve i pranoi në mënyrë të natyrshme format e reja me të cilat u trajnuan. Trajnimet sollën jo vetëm njohuri për bazën e të drejtave të njeriut, por dhe forma interaktive dhe metodologji e taktika të reja.

Zhvillimi i projektit ka sjellë edhe ndryshime të tjera si përfshirja në kurrikulën zyrtare të ciklit të ulët, tetëvjecar dhe në atë universitar (fakultetet pedagogjike) të lëndëve për të drejtat e njeriut; ngritja dhe zhvillimi i burimeve njerëzore e qendrave për të drejtat e njeriut me një shpërndarje në të gjithë vendin si dhe zhvillimi i ekspertizës për edukues dhe aktivistë për të drejtat e njeriut. Nga ky projekt u mbështetën 43 shkolla tetëvjeçare në të gjithe vendin, të cilat u transformuan në 43 shkolla pilot për edukimin e të drejtave të njeriut.

QSHDNJ-ja, thonë organizatorët ka një eksperiencë 13 vjecare bashkëpunimi dhe kooperimi me Ministrinë e Arsimit dhe te Shkencës, me institute te ndryshme kombëtare, me universitetet e të gjitha rretheve (fakultetet pedagogjike), me shkollat 8-vjeçare si dhe me aktorë të komuniteteve të ndryshme.