Petersen e Kosumi përshëndetën miratimin e deklaratës së Presidentit Rugova në Kuvendin e Kosovës

Petersen e Kosumi përshëndetën miratimin e deklaratës së Presidentit Rugova në Kuvendin e Kosovës

Prishtinë, 28 shtator 2005 /TN /QIK - Kryeadministratori Soren Jesen Petersen dhe Kryeministri Bajram Kosumi përshëndetën miratimin e deklaratës së Presidentit Ibrahim Rugova në Kuvendin e Kosovës.
Petersen tha se procesi i statusit i takon tërë shoqërisë dhe mirëpret nismën për përfshirjen e minoriteteve dhe të shoqërisë civile në grupet punuese për statusin.
Ndërkaq Kosumi tha se miratimi i sotëm i jep shtytje fillimit të punës për negociatat rreth statusit, duke u zotuar për vazhdimin e angazhimit të Qeverisë në përmbushjen e standardeve. "Në qeveri jemi duke e menduar një formë të organizimit të një nëngrupi, ose në një formë tjetër që ende është e padefinuar, ku do të përfshihen përfaqësuesit e të gjitha minoriteteve dhe të strukturave të tjera të shoqërisë, të cilat do të marrin pjesë në hartimin e të gjitha dokumenteve gjatë këtij procesi", tha kryeministri Kosumi, duke theksuar se Kosova po hyn në fazën më të rëndësishme për ardhmen e saj.
Petersen përshëndeti nismën e qeverisë për përfshirjen e pakicave në procesin negociator, duke thënë se ky proces i takon tërë shoqërisë kosovare si dhe komuniteteve.
"Kosova dhe përgatitjet për status nuk u takojnë vetëm disa udhëheqësve politikë, ndonëse ata kanë rol shumë të rëndësishëm. Por ky proces i takon tërë shoqërisë kosovare dhe kjo do të thotë, të gjitha komuniteteve, përfshi pakicat dhe të gjitha grupet e shoqërisë civile. Prandaj e mirëpres këtë iniciativë të qeverisë".
Po ashtu Petersen shprehu bindjen se Kosova do të shkojë e bashkuar në bisedimet për statusin. Në lidhje me abstenimin e sotëm të deputetëve të opozitës gjatë votimit të deklaratës së Presidentit Rugova, shefi i UNMIK-ut tha se nuk mund ta marrë memend se dikush në Partinë Demokratike të mos synojë të jetë pjesë e procesit drejt statusit të Kosovës.