|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Deputetët e Kuvendit të Kosovës miratuan deklaratën e Presidentit Rugova rreth përgatitjeve të ekipit negociator

Prishtinë, 28 shtator 2005 /TN /QIK - Deputetët e Kuvendit të Kosovës me shumicë votash miratuan në seancën e sotme deklaratën e Presidentit të Kosovës Ibrahim Rugova rreth përgatitjeve të ekipit negociator për bisedimet eventuale për statusin e Kosovës.

 

Fillimisht kryeparlamentari Daci vlerësoi se ekipi negociator është gjithëpërfshirës dhe se përfaqëson interesat e të gjithë qytetarëve të Kosovës. Daci në fjalën e tj u angazhua për një unitet të subjekteve politike për të gjitha çështjet, duke shtuar se procesi do të jetë gjithëpërfshirës dhe konform votës së popullit të Kosovës. Kuvendi i Kosovës, tha më tej a, do të veprojë në kohë të duhur për ratifikimin dhe miratimin e përcaktimeve strategjike.

"Presidenti i Kosovës, në bazë të funksionit dhe kompetencave që i ka, do t'i prijë këtij procesi. Secili nga ne i ka kompetencat dhe detyrat që dalin nga votat e popullit. Kuvendi i Kosovës do të miratojë këtë përcaktim dhe do të bëjë ratifikimin në kohë të duhur të gjitha përcaktimeve strategjike dhe të marrëveshjeve eventuale apo të shpalljes së Pavarësisë së Kosovës, duke shprehur vullnetin e lirë dhe vetëm vullnetin e popullit të Kosovës", nënvizoi Daci.

Mirëpo shefat e grupeve parlamentare patën pikëpamje të ndryshme rreth deklaratës së Presidentit Rugova.
Duke dalë i pari në foltore, shefi i Grupit parlamentar të PDK së, Jakup Krasniqi, tha se kjo parti gjithmonë është angazhuar që për çështjet madhore për Kosovën të shprehen qëndrime të unifikuara.

 

Sipas tij, deklarata e Presidentit Rugova është e njëanshme dhe se është bërë pa konsultim e pa konsensus paraprak me partitë kryesore. Krasniqi tha se deklaratës i mungon baza e një platforme të qartë politike dhe ajo nuk ka lënë kohë dhe hapësirë për konsultime. Krasniqi kërkoi që në ekipin negociator të përfshihen edhe përfaqësues të komuniteteve dhe të qytetarëve me ndikim.

Nga ana e tij, shefi i Grupit parlamentar të LDK së, Dr. Alush Gashi konstatoi se gjendja e tanishme është e paqëndrueshme. "Vonesa e pavarësimit të plotë me sovranitetit bashkëkohore dhe formulimet e mjegulluara për status të ardhshëm, në vend të statusit përfundimtar si dhe lojërat pa kufi të atyre që bënë gjenocid në Kosovë i kërcënojnë arritjet e përbashkëta në Kosovë", tha ai.

Pasi theksoi se me shumë respekt është shqyrtuar deklarata Presidentit Ibrahim Rugova të publikuar më 13 shtator, Gashi tha se ajo ka të bëjë me vendimin për krijimin e ndjenjës së unitetit me emërimin e ekipit që do të punojë për të ardhmen e vendit tonë.

"Eshtë për t'u mirëpritur dhe mbështetuar angazhimi institucional për krijimin e unitetit institucional në kohën e mohimit të plotë që i bëhet Kosovës në përfaqësimin ndërkombëtar", tha Gashi.

Ai theksoi se "kërkesa dhe gatishmëria e Kosovës për të marrë përgjegjësi të plota vendore dhe të përfaqësimit ndërkombëtar nuk është kërcenim, por është shprehje e përgjegjësisë së lartë, është kërkesë për liri të mbështetur në përgjegjësi".

LDK ja kërkon sjellje në kuadër të Deklaratës se Pavarësisë se vitit 1990, të Referendumit të vitit 1991 si dhe të obligimeve elektorale të cilat i mandatojnë përfaqësuesit e Kosovës te të gjitha niveleve për pavarësi të plotë të Kosovës, u shpreh shefi i Grupit parlamentar të LDK-së.

Shefja e grupit të AAK-së Gjylnaze Syla tha se përcaktimi i statusit të Kosovës është moment vendimtar për popullin e Kosovës dhe se ky moment kërkon përgatitje dhe përkushtim të madh politik. Ajo shprehu përkrahjen e plotë të partisë së saj për krijimin e ekipit negociator dhe kërkoi nga deputetët dhe qytetarët e Kosovës të respektojnë vendimin e presidentit Rugova.

"Grupi parlamentar i AAK së e mbështet dhe e mirëpret vendimin e presidentit dhe konsideron se ekipi negociator ka legjitimitetin e plotë të popullit të Kosovës për të përgatitur platformën dhe bisedat për statusin e Kosovës. Grupi parlamentar i AAK së fton deputetët e Kuvendit dhe qytetarët e Kosovës të përkrahin vendimin e presidentit dhe punën e ekipit negociator", tha zonja Syla.

Kryetari i partisë ORA, Veton Surroi e cilësoi si të panevojshëm deklarimin e grupeve parlamentare rreth deklaratës së Presidentit. Ai tha se hollësitë duhet të shqyrtohen brenda grupit themeltar e pastaj të kalojnë në Kuvend për miratim.

"Ne nuk do të duhej të deklaroheshim këtu për këto hollësi, sepse këto janë hollësi që do të mund të ngatërronin çështjen themeltare... Duhet të vendoset grupi bazik, ashtu siç e ka propozuar kryetari e pastaj të përpunohen detalet dhe këto detale të sillen në parlamentin e Kosovës për miratim së bashku me platformën", tha Surroi.

Edhe Mahir Jagxhilar në emër të Grupit parlamentar të minoriteteve joserbe në Kuvend përkrahu deklaratën e Presidentit Rugova rreth përgatitjeve për bisedimet eventuale për statusin.

Ndërkaq, deputeti i LPK së, Emrush Xhemajli dhe ai i PLK së, Gjergj Dedaj shfaqën pakënaqësi, sepse kryeparlamentari Daci nuk ua mundësoi të flasin diskutimeve të shefave të grupeve parlamentare dhe pas votimit të deklaratës.

Ndërkaq Partia e Drejtësisë, e përfaqësuar me një deputet në kuvend, nëpërmjet një komunikate thotë se "refuzimi i Kryetarit të Kuvendit për t'ua dhënë fjalën deputetëve të subjekteve politike, që nuk janë pjesë e grupeve parlamentare, paraqet shkelje të Rregullores së Kuvendit të Kosovës".

 

Sipas PD, në situatën kur të gjitha subjektet politike, të përfaqësuara në Kuvendin e Kosovës ishin deklaruar për përkrahjen, në parim, të Deklaratës së Kryetarit Rugova, kryetari i Kuvendit e prishi konsenzusin e domosdoshëm politik, duke dëmtuar imazhin e Kosovës.

Seanca i vazhdon punimet nesër me shqyrtimin dhe miratimin e disa projektligjeve.

 |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |