Petersen thotë se bisedimet për statusin e Kosovës do të fillojnë deri në fund të këtij viti

Petersen thotë se bisedimet për statusin e Kosovës do të fillojnë deri në fund të këtij viti

Prishtinë, 27 shtator 2005 /TN /QIK - Pas qëndrimit disaditësh në Nju-Jork, shefi i UNMK-ut Soren Jesen Petersen dje pasdite është kthyer në Kosovë.

Me të arritur në aeroportin e Prishtinës, Petersen ka thënë se bisedimet për statusin e Kosovës do të fillojnë deri në fund të këtij viti, duke nënvizuar se status quoja për Kosovën është e dëmshme.

Petersen ka theksuar se me rekomandimin e Kofi Ananit, Këshilli i Sigurimit të OKB-së pritet të mblidhet në muajin tetor dhe pritet që t'i hapë rrugë bisedimeve për statusin final të Kosovës.

Ai ka shtuar se gjatë takimeve në Nju-Jork është arritur koncensues ndërmjet gjithë faktorëve relevantë ndërkombëtar që procesi të ec për përpara.
"Raporti i ambasadorit Aide është meritor. Jam i bindur se ne po lëvizim drejt bisedimeve për statusin final të Kosovës", ka thënë Petersen.
Ai po ashtu ka bërë të ditur se njeriu më i përfolur për postin e të dërguarit të OKB-së për bisedimet rreth statusit të Kosovës është ish-presidenti finlandez Marti Athisari.

Sipas tij ende nuk ka ndonjë vendim, por është e qartë se fokusimi është shtuar në Marti Athisarin dhe ka shtuar se gjërat do të qartësohen pas mbledhjes së KS të OKB-së, e cila pritet të mbahet në mes të muajit tetor.

Sipas kreut të UNMIK-ut fillimi i bisedimeve për statusin final jo vetëm që është në interesin e kosovarëve, por edhe në interesin e shumë shteteve të rajonit. Ai u shpreh optimist se ky proces do të përfundojë brenda vitit 2006. Sot në mesditë Petersen takohet me Presidentin Rugova.