Luan Krasniqi: Ne do të jemi kampion botëror

Nesër, më 28 shtator 2005, në Hamburg zhvillohet meçi historik i boksierit Luan Krasniqi me Lamon Brewster

Luan Krasniqi: Ne do të jemi kampion botëror

Meçi historik i boksit që zhvillohet në Hamburg më 28 shtator të këtij viti, para mëse 16 mijë shikuesve pritet me interesim të madh. Cili do të jet kampion i ardhshëm botëror, bartësi i deritashëm i tullit Lamon Brewsteri amerikan apo Luan Krasniqi, shqiptari me shtetësi gjermane. Të gjithë ekspertët deklarohen se ky meç do të jet tejet interesant ndaj edhe cilësohet si “luftë e vitit”.

Çerkin BYTYÇI
Rottweil (Gjermani), 27 shtator 2005

Asnjëri nga artikujt që botohen në vazhdimësi në gazetat gjermane dhe raportet që emetohen në radiot dhe qendrat televizive, nuk japin parashikime për fituesin e mundshëm në duelin e ardhshëm për titullin e kampionit botëror në boks. Kjo nga arsyeja se që të dy-Brewsteri dhe Luani, janë të mirënjohur me cilësitë e boksierëve të mrekullueshëm.

Natyrisht me kënaqësi shprehet dëshira e zjarrtë që Luan Krasniqi të dal fitimtar në duelin e ardhshëm dhe kështu të sjell titullin e kampionit botëror në boks pas plot 75-vitesh sërish në Gjermani. Konsiderohet se kjo ishte një periudhë tejet e gjatë që Gjermania, shteti me traditë të mirëfilltë në sportin e boksit, nuk u nderua me titullin e më të mirit në botë pas legjendës Max Schmeling, i cili vdiq në moshën 99-vjeçare (5 shkurt 2005). Tashti, më 28 shtator, në ditëlindjen e 100-të të tij, për respektin ndaj meritave sportive të kampionit botëror të dikurshëm në boks, zhvillohet në Arenën Color-Line në Hmaburg meçi historik që i bën nder jo vetëm Gjermanisë.

Plakatat që paralajmërojnë këtë duel janë shpërndarë në tërë Gjermaninë dhe të thuash janë si dekor i mirë që nxisin bisedat mes njerëzve. Interesimi për këtë ngjarje tejet të çmueshme sportive është i madh dhe biletat janë shitur pothuaj të gjitha. Ndërkaq, aktorët e kësaj ngjarje të madhe tashmë kanë arritur në Hamburg.

Përgatitje u zhvilluan nën udhëheqjen e trajnerit Torsten Schmitz

Luan Krasniqi , boksieri i njohur shqiptar me shtetësi gjermane, muajve të shkuar bëri përgatitje intensive për meçin e ardhshëm për titullin e kampionit botëror në boks. Në Gym-sallën në Rottweil u përmbushën të gjitha planet e përcaktuara dhe Luani tashti është në formën më të mirë. Testimet e bëra dëshmuan një lartësi të dukshme kondicionale, fizike dhe taktike që janë parakushte që shtojnë optimizmin për suksesin e pritur në meçin e ardhshëm.

Ndaj në taborin përgatitor të këtij boksieri mbretëron një optimizëm i lartë, kurse te vet Luani një disponim i mrekullueshëm dhe vetëbesim me të cilin shkon drejt ngjarjes më të madhe sportive të karrierës së tij. Nga fakti se ditëve të shkuara Luani tregoi një vullnet të pathyeshëm dhe disiplinë vetëmohuese që manifestoi një përgatitje të shkëlqyeshme, në ekipin e tij, tek shokët dhe miqtë që e njohin mirë virtytin e këtij sportisti të nivelit më të lartë, mbretëron gjithsesi një bindje reale se Luani do të ngadhënjejë. Ndaj, gjermanët dhe simpatizuesit e shumtë anë e kënd botës, të entuziazmuar me Luanin-Max Schmelingun e dytë, me optimizëm të madh presin ta festojnë këtë ndodhi kolosale.

Nëse Luani i fortë, boksieri i shkathtësive të shkëlqyeshme atletike, edhe në duelin e ardhshëm vazhdon me intensitetin e treguar në meqin e zhvilluar kohë më parë në Stuttgart s`ka dyshim se do të jet i dyti pas legjendës Max Schmeling nga Gjermania me titullin e kampionit botëror. Max Schmelingu, para vdekjes vetëm disa muaj para se ti mbush plot 100 vjet, deklaroi se ka dëshirë të flaktë ta shoh një të dytë-Luanin, pas tij nga Gjermania me këtë titull. Luani premtimin që ia dha legjendës së boksit, si duket do ta bëj realitet.

Me këtë do ti bëj nder të madh Gjermanisë, vendit të deutscheve ngjyrat e të cilit i mbron, por edhe vendit të shqipeve, nga e ka prejardhjen. Do të jet ky moment historik dhe me rëndësi të shumëfishtë sepse Kosova dhe trevat shqiptare, nëse do të fitoj, për herë të parë do ta kenë një kampion botëror në boks kurse Gjermania, për herë të dytë, pas Max Schmelingut, fituesit të titullit më 1928 e 1930, (pas 75-vjetësh) do të rikthej titullin e kampionit botëror. Për ta fituar këtë titull nga shqiptarët, askush nuk e pati rastin të luftoj deri më tash, kurse nga gjermanët u përpoqën disa.


Max Schmelingu kampioni i parë botëror nga evropianët dhe i vetmi deri më tash nga Gjermania

Max Schmelingu, më 12 qershor të vitit 1930, pas diskualifikimit të Jack Sharkey (1902-1994) në rundin e katërt fiton në Nju Jork për herë të parë nga evropianët titullin kampion botëror kurse më 3 qershor të vitit 1931 e mbron titullin kundër amerikanit Young Stribling (1904-1933).

Ndërkaq, më 21 qershor të vitit 1932, në New York, në meçin për mbrojtjen e titullit e humbi atë pas 15 rundave, kundruall Sharkey. Në qershor të vitit 1938, Schmelingut iu dha edhe një rast në Nju Jork të luftoj për t`u bërë kampion botëror sepse Joe Louis (1914-1981), i cili në vitin 1937, me fitoren kundër James Braddock u bë kampion botëror, dëshironte revanshin për luftën e humbur më 19 qershor të vitit 1936 derisa nuk ishte kampion botëror. Por, kjo nuk i shkoi përdore dhe se ky ishte meçi i tij i fundit në SHBA.


Mark Mildenberg, Axel Schulz e Willi Fischer nga Gjermania luftuan për titullin e kampionit botëror

Nga Gjermania, pas Max Schmelingut u përpoqën edhe tre boskier të mirënjohur për titullin e kamiopnit botëror. Kështu, Mark Mildenberg, pas 53 fitoreve, 6 humbjeve dhe 3 barazimeve, më 10 shtator të vitit 1966 humbi nga Muhamed Aliu në Frankfurt në rundin e 12-të, kurse Axel Schulz, më 26 fitore, 4 humbje dhe një barazim, u përpoq jo më pak se tri herë për të arritur këtë titull.

Në Las Vegas, më 22 prill 1995, humbi kundër Georg Foreman, më 9 dhjetor 1995 kundër Francois Botha në Stuttgart dhe herën e tretë kundër Michael Moorer më 22 qershor 1996 në Dortmund. Poashtu për titullin e kampionit botëror u angazhua Willi Fischer, me 31 fitore, 6 humbje e një barazim i cili në Norwich të Anglisë, më 26 shtator të vitit 1998 humbi kundër Herbie Hide.

Ndërkaq, Luan Krasniqi, me 28 fitore, 14 prej tyre me K.O., një humbje dhe një barazim, është i katërti në rradhë për të dëshmuar vendosmërinë e tij që ta fitoj këtë titull. Kësaj i parapriu ngadhënjimi kundruall Lance Whitakerit. Këtë, më parë askush nuk e parashikoi dhe konsiderohet se ndodhi një mrekulli për t’ia mundësuar Luanit avancimin drejt titullit të ëndërruar kaherë.

Por edhe Lamon Brewster ka arsye të madhe të angazhohet për ta sfiduar këtë bokser të talentuar. Para së gjithash nga fakti se pas fitores nga Vlladimir Klitçko, dëshiron me këmbngulësi ta mbaj edhe mëtej titullin e më të mirit në botë por aq më parë do të dëshironte tashti ti revanshohet Luanit për goditjet që ia dha që në kohën e boksit amator në vitin 1994, në turneun ndërkombëtar të organizuar në Bayroth të Gjermanisë. Pra që atëherë zë fillë rivaliteti i tyre.


Kush është Lamon Tajuan Brewster

Lamon Tajuan Brewster alias Relentless u lind më 05.06.1973 në Los Angeles. Trajneri i tij është Jesse Reid kurse menaxher Sam Simon. Ai është njëherit klient i Don Kingut. Më10 prill të vitit 2004, në Las Vegas, në rundën e pestë arriti fitore me K.O., nga bokserin Vladimir Klitçko (47 meçe, 44 fitore nga të cilat 40 me K.O.) dhe kështu fitoi titullin e kampionit botëror. Pas kësaj fitoreje, më 4 shtator, 2004, amereikani Browster, në Las Vegas, titullin e mbrojti kundër Kali Meehan i Australisë (Kalivath Gerald Meehan i lindur më 09.03.1970, me 32 meçe të zhvilluara nga të cilat 29 fitore dhe nga to 23 me K.O.).

Ndërkaq, më 21 maj të këtij viti, në meçin e zhvilluar në Çikago, kundër polakut Andrew Golota (i lindur më 05.01.1968, me 46 meçe të zhvilluara, 38 fitore nga të cilat me K.O.,-31), e mbrojti me sukses titullin e kampionit duke ngadhënjyer në sekondën e 53, me një K.O., teknik, para 20 mijë shikuesve, pas goditjeve serike të cilat kundërshtarin e bënë të gjunjëzohet dhe në sekondën e 13 dhe atë 33 e detyruan të lëshohet në dysheme. Ishte ky madje më i shpejtë se kampioni i dikurshëm Lennox Lewis, i cili me rastin e mbrojtjes së titullit para tetë vjetësh, arriti ta fitoj Golotën tek në sekondën e 93. Kampioni 31-vjeçar Browster, me këtë fitore, arriti që ta mbroj titullin dhe kështu nga 34 meçet, kjo ishte fitorja e 32-të e tij nga të cilat 28 u realizuan me K.O.


Letra e telegrame të shumta nga gjithë trojet shqiptare

Në prak të meçit të 28 shtatorit, bokserit potencial për titullin e kampionit botëror në boks Luan Krasniqit, po i arrijnë brenda ditës qindra letra, telegrame dhe e-maila nga mbarë bota. Tifosët e përgëzojnë për suksesin e deritashëm por dhe janë të bindur se edhe në meçin e rradhës ai do të del fitimtar dhe kështu do ti gëzoj edhe më shumë të gjithë sportëdashësit.

Përmbajtja e postës që arrin ngërthen në vehte dëshirën e vetme të të gjithëve që ky bokser të ngadhnjejë dhe të realizoj qëllimin e tij dhe dëshirën e dashamirëve të boksit që L. Krasniqi të bëhet edhe legjendë e boksit botërorë. Ndërkaq, letërshkruesit nga trojet shqiptare e veçojnë entuziasmin e tyre për faktin se ky është bokseri i parë që i bën nder vendit të shqipeve me suksesin e deritashëm sportiv të arritur si kampion i trefishtë evropian në boks dhe synimin për tu bërë kampion botëror.
Deri të mërkurën e ardhshme duhet të presim dhe pastaj gjithsesi do të themi: NE JEMI KAMPION BOTËROR.
…………………………………………

Ç’thot Luani për meçin e rradhës:

Luan, ja arrin edhe dita e një ngjarje historike. Çfarë paraqet kjo për një bokser që synon titullin e më të mirit në botë?

- Meçi i ardhshëm për mua paraqet një nga ngjarjet më të mëdha sportive të karrierës time. Prandaj jam përgatitur mirë dhe jam i vendosur për të realizuar qëllimin tim jetësor. Njëkohësisht kam vullnet e dëshirë të madhe ti nderoj me fitore të gjithë simpatizuesit, sportëdashësit dhe shokët e miqtë e mi, që gjithnjë më mbështetën për të arritur deri këtu.

Takoheni me Brewsterin amerikan, bartësin e titullit aktual të kampionit botëror. Çka do të thot kjo për ty?

- Unë kam respekt ndaj Brewsterit sepse ai është një luftarak i mirë dhe i shpejtë, por pa modesti, unë jam më i shkathtë se ai.

Nëse do të fitoni do të jeni Max Schemlingu i dytë.

- Natyrisht i dyti pas legjendës Max Schmeling me këtë titull në Gjermani dhe i pari nga trojet shqiptare. Kjo do të ishte për mua një ndodhi e madhe, e papërshkrueshme.

Këto ditë nga ekspertët e boksit jeni cilësuar më shumë si strateg. Çka e pret Brewsterin?

- Unë edhe kësaj here do të praktikoj taktikën që më sjell suksesin. Vështroj dhe konstatoj se cilin mjet e formë vërë në veprim. Kësaj here gjithësesi diç më tepër se rëndomë.

Do të thot se ne do të jemi kampion i ardhshëm?

- Unë për këtë do të jap maksimumin. Për një gjë të tillë jam përgatitur ndaj jam edhe optimist.

.......................................
Than për Luanin:

Klaus-Peter Kohl, menagjer: „Luanin e kam vizituar në ushtrime dhe me kënaqësi kam konstatuar se ai është në formën më të mirë për duelin e ardhshëm, i cili është historik dhe ndodhë vetëm njëherë, mu në ditëlindjen e 100 të legjendës Max Schmeling.”

Don King, menagjer i Lamon Brewster: „Luani me fitoren e kaluar klundër Whitakerit, i dha një fizonomi të rëndësishme meçit të ardhshëm. Mbrojtja e titullit nga Brewster kundër boksierit tejet të sukseshëm Luan Krasniqit, paraqet rrezik. Ndaj, më 28 shtator do të shënohet historia e boksit botëror”.

Theodor „Ted“ Lackner-kotrajner i Luanit nga Austria: „Pesë raundat e para do të jenë me rëndësi. Ato Luani do ti përballoj me sukses dhe të tjerat do ti sigurojnë titullin e kampionit botëror”

Jean-Marcel Nartz, udhëheqës teknik i Boks Universumit : “Askush nuk beson se dueli në mes dy bokserëve të fortë e të sukseshëm do të mbaroj pas 12 raundave dhe se fituesi do të përcaktohet me pikë.

Volker Grill, udhëheqës i ekipit të Luanit: “Ne duam të fitojmë. Ne do të fitojmë”.

Lamon Brewster, kundërshtar i Luanit: “Ai është një luftarak i mirë, por unë shkoj në Hamburg për të dëshmuar se jam më i miri në botë.

Torsten Schmitz, trajner i Luanit: “Unë e kam vetëm një bokser të kategorisë së rëndë, Luanin, me të cilin mburrem. Në luftën e fundit ai ka treguar vetëm 80 përqind të gjithë asaj që mundet”.

Agim Krasniqi, kootrajner i Luanit: “Luani ka arritur shkallën më të lartë të përgatitjeve dhe se është i përkushtuar për të shënuar fitoren aq shumë të dëshiruar”.
………………………

Kronologji nga biografia e Luan Krasniqit:

Më 1971 u lind në fshatin Junik të Kosovës
1977 në moshën 6-vjeçare u regjistrua në shkollën fillore të vendlidnjes
1985 mbaroi shkollimin fillor
1987 mbaroi klasën e dytë të gjimnazit
1987 arriti në Gjermani
1988 u regjistrua në Klubin e boksit në Rottweil dhe se deri në vitin 1996 11 herë rradhazi ishte kampion i Baden Württembergutr
1993 mbaroi shkollën ekonomike
1994 iu pranua shtetësia gjermane
1994 kampion i Gjermanisë
1994 për herë të parë përfaqësoi Gjermaninë në boks në turneun ndërkombëtar në Liverpool, ku arriti të fitoj medaljen e artë
1995 zuri vendin e dyte ne Kampionatin Boterore ne Berlin
1995 e kreu shërbimin ushtarak në Germersheim të Karlsruhes
1996 kampion evropian në Velje të Danimarkës
1996 mori pjesë në Lojërat Olimpike në Atlantë.Fitoi medaljen e bronztë për peshën e rëndë në boks.
1997 kaloi tek ekipi i boksit Panix Promotion, në të cilin ishte edhe bokseri i famshëm Lennox Lewis.
2000 kaloi në Hamburg, në Universum Box-Promotion,
2001 kampion i Gjermanisë në boks;
2001 nënshkroi kontratën tri vjeçare me Universum Box-Promotion.
2002 më 5 janar 2002 në Magdeburg të Gjermanisë fitoi titullin Kampion i Evropës kundër Rene Monse.
U bë kampion i parë i Evropës për Gjermaninë, që prej 29 vitesh.
2002 Humbje e titullit të kampionit evropian në duelin e 20.07, me Prezemyslaw Saleta
2004 Më 14.02., u takua me Sinan Samil Sam. Rikthim i titullit Kampion i Evropës
2004 Mbrojti Titullin e Evropës kundër Rene Monses dhe Timo Hoffmanit
2005 Pas fitores me Whitakerin amerikan u kualifikua për të boksuar për titullin e kampionit botëror

Më 28 shtator 2005, në Hamburg bokson për titullin e Kampionit Botëror në boks. Gjat boksit amator zhvilloi 130 ndeshje nga të cilat i fitoi 112, kishte një barazim dhe 17 humbje.
Në boksin profesional, deri më tash zhvilloi 30 duele nga të cilat i fitoi 28, 14 me K.O., përjetoi vetëm një humbje dhe një barazim.