Përfundoi vizitën dyditëshe në Kosovë delegacioni i ambasadorëve të 21 vendeve anëtare të BE-së

Përfundoi vizitën dyditëshe në Kosovë delegacioni i ambasadorëve të 21 vendeve anëtare të BE-së

Prishtinë, 22 shtator 2005 /TN /QIK - Përfundoi vizitën dyditëshe në Kosovë delegacioni i ambasadorëve të 21 vendeve anëtare të BE-së, pasi janë takuar me Kryetarin e Kuvendit Nexhat Dacin, me udhëheqës të opozitës, Hashim Thaçin, Veton Surroi dhe me përfaqësuesit serbë vendorë Oliver Ivanoviq dhe Rangjell Nojkiq.
Përfaqësuesit politikë shqiptarë u kanë thënë ambasadorëve të vendeve të BE-së se Kosova është e gatshme të marrë detyrimet ndërkombëtare si shtet i pavarur, kurse përfaqësuesit e serbëve kanë thënë se presin një pako detyrimesh ndërkombëtare për instituconet e Kosovës.
Duke shfaqur bindjen se raporti i ambasadorit Kai Aide do të jetë pozitiv, Kryetari i Kuvendit të Kosovës, Nexhat Daci tha se ambasadorëve të BE-së ua kishte bërë të qarta disa qëndrime të institucioneve rrethe aspektit politik të Kosovës, që sipas tij janë unike në këtë qëndrim.
"Kosova nuk e negocion pavarësinë e saj me askend, sepse mandat për tjetërsend nuk kanë institucionet e Kosovës, por rruga e kompletimit të kësaj pavarësie duhet të bisedohet me bashkësinë ndërkombëtare edhe me Serbinë si vend fqinj", ka thënë Daci. Ai tha se të drejtat njerëzore dhe të drejtat pronësore, reperacionet e luftës dhe të gjitha çështjet e tjera mund të negociohen.

Ai nënvizoi se nuk do të pranohet në asnjë mënyrë propozimi për decentralizim asimetrik në Kosovë, që do të thotë kontakti i drejtëpërdrejt i serbëve të Kosovës me Beogradin. Ai kishte kërkuar nga diplomatët e BE-së që Serbia të mos e pengojë ashtu siç nuk do ta pengojë Kosova Serbinë për integrime në strukturat evroatlantike.
Kryeparlamentari Daci ka kërkuar nga diplomatët BE-së që të mos e paraqesin Kosovën si palë të dobët për gjoja mosunitet të brendshëm, në veçanti në mesin e shqiptarëve. Ai tha se për çështjet strategjike shqiptarët gjithmonë kanë unitet të plotë. Daci tha se institucionet e Kosovës janë të gatshme që të sigurojnë lirinë e lëvizjes për pakicat, por kjo nuk është çështje që ka të bëjë vetëm me pakicat.
"Nuk mund të kërkohet liri e qarkullimit vetëm për minoritetet, kur dihet se në 23 për qind të territorit, apo në një të tretën e Kosovës, shqiptarët nuk kanë qasje dhe lëvizja e popullatës është problem që duhet të avancohet në gjithë Kosovën", ka thënë z. Daci.