Besnik Mustafaj ka kërkuar mbrëmë në OKB që Kosovës t'i jepet pavarësia e kushtëzuar Besnik Mustafaj ka kërkuar mbrëmë në OKB që Kosovës t'i jepet pavarësia e kushtëzuar

Besnik Mustafaj ka kërkuar mbrëmë në OKB që Kosovës t'i jepet pavarësia e kushtëzuar



Nju Jork, 22 shtator 2005 /TN /QIK - Ministri i Punëve të Jashtme të Shqipërisë ka kërkuar që Kosovës t'i jepet pavarësia e kushtëzuar nga Serbia dhe Mali i Zi.

Statusi përfundimtar i Kosovës duhet të bazohet në vullnetin e lirë të popullit të Kosovës, të shprehur nëpërmjet metodave demokratike, tha Mustafaj,njofton Rojter.
Shefi i diplomacisë shqiptare mbrëmë tha në Asamblenë e Përgjithshme të OKB-së se pavarësia e kushtëzuar për Kosovën do t'i mundësonte bashkësisë ndërkombëtare që për një periudhë të caktuar kohore të vëzhgojë zhvillimin e plotë të institucioneve të Kosovës dhe shoqërisë së saj si garancë për serbët dhe pakicat e tjera.
Duke shfrytëzuar të drejtën për replikë përfaqësuesi i Serbisë tha se ishte i befasuar që Shqipëria ka ndryshuar politikën e saj dhe angazhohet për pavarësinë e Kosovës.

Sipas tij, Kosova është pjesë e Serbisë dhe se bsiedimet për të ardhmen e saj duhet të zhvillohen ndërmjet Beogradit, Prishtinës dhe bashkësisë ndërkombëtare.
Ndihmësministri Miomir Udoviçki tha se deklarata e Mustafajt nuk i kontribuon bashkëpunimit aq të nevojshëm ndërmjet Beogradit dhe Tiranës, por as stabilitetit në rajon.

Besnik Mustafaj: Për fatin e Kosovës nuk vendos as Tirana dhe as Beogradi

Uashington, 22 shtator 2005 /TN/ QIK - "Për fatin e Kosovës nuk vendos as Tirana dhe as Beogradi. Për këtë të jemi të qartë", ritheksoi edhe një herë ministri i Jashtëm shqiptar Besnik Mustafaj, duke u përgjegjur ndaj një reagimi të ministrit serbo-malazez Vuk Drashkoviq rreth deklaratave të zyrtarëve të Shqipërisë për Kosovën.
Duke sqaruar thelbin e takimit që kishte pasur me Drashkoviqin në Nju Jork, Besnik Mustafaj tha se i kishte bërë analizën Drashkoviqit, duke i thënë se "në qoftë se çështja e Kosovës bëhet një problem i brendshëm për Shqipërinë, ose për Serbinë, atëhere do të jetë shumë më e vështirë zgjidhja e tij".
Po ashtu Mustafaj i kishte bërë thirrje Drashkoviqit "për realizëm në veprimet diplomatike dhe në përgjithësi në politikën e jashtme".
"Faktorët kryesorë në Kosovë janë institucionet e Kosovës, UNMIK u, Grupi i Kontaktit dhe institucionet e tjera ndërkombëtare. Midis tyre duhet të zgjidhet çështja e statusit", u shpreh shefi i diplomacisë shqiptare për "Zërin e Amerikës".
Të përkujtojmë se ministri serbo-malazez Drashkoviq kishte thënë se deklaratat e zyrtarëve të Shqipërisë se Kosova duhet të fitojë pavarësinë dhe se nga bisedimet për statusin e ardhshëm të Kosovës të përjashtohet Beogradi, nuk i kontribuojnë marrëdhënieve të mira ndërmjet dy vendeve. Drashkoviq citohet të ketë:
"I kam përkujtuar Mustafajit për faktin se Kosova është krahinë në kuadër të Serbisë e Malit të Zi (SMZ) dhe se statusi i ardhshëm i Kosovës nënkupton evropjanizimin e saj, mbrojtjen e plotë të minoritetit serb e të minoriteteve të tjera dhe respektimin e kufijve aktualë të SMZ me Shqipërinë dhe Maqedoninë".