Goldberg shpreson që procesi i përcaktimit të statusit të Kosovës të fillojë gjatë kësaj vjeshte

Goldberg shpreson që procesi i përcaktimit të statusit të Kosovës të fillojë gjatë kësaj vjeshte

Prishtinë, 22 shtator 2005 /TN /QIK - Shefi i Zyrës amerikan në Prishtinë Filip Goldberg shpreson që procesi i përcaktimit të statusit të Kosovës të fillojë gjatë kësaj vjeshte. Nëse raporti i ambasadorit Kai Aide është pozitiv, tha Goldberg, ai do të mundësojë edhe ecjen drejt procesit të statusit përfundimtar.
Ai bëri të ditur se Shtetet e Bashkuara janë shumë të interesuara që të emërojnë zëvendësin e të dërguarit të sekretarit të përgjithshëm të OKB-së për Kosovën.
Duke folur për mënyrën sesi do të zvillohet procesi i përcaktimit të statusit me ndonjë konferencë apo nëpërmjet "shatëll- diplomacisë", Goldberg tha se shumë çështje në këtë drejtim kanë të bëjnë me vendimet që do t'i marrë i dërguari i posaçëm.
"Mendoj se për momentin është e pamundshme të flitet me saktësi mbi strukturën e këtyre bisedimeve. Ajo që di unë është se në fillim sigurisht do të ketë bisedime me të gjitha palët e përfshira për të vendosur kornizën e bisedimeve", u shpreh diplomati amerikan.
Por në anën tjetër, thotë Goldberg, në Kosovë nuk ka pasur përgatitje serioze për statusin përfundimtar, megjithëse ai është angazhuar fuqimisht "për të këshilluar përgatitjet për këtë moment, i cili do të jetë një prej momenteve më të rëndësishme në historinë e Kosovës".
Duke komentuar pohimet e disa politikanëve që thonë se nuk do të ketë negociata, Goldberg tha se negociata do të ketë.
"Nëse e merrni për bazë një pozicion të caktuar për statusin, për çka ne e dimë se në këtë anë është pavarësia, kurse në anën tjetër është diçka tjetër, mbeten shumë çështje që do të dalin nga këto pozicione", tha Golberg duke numëruar një nga çështjet që do të diskutohen gjatë negociatave, si të drejtat dhe obligimet e komuniteteve, ndikimi i decentralizimit në të ardhmen e Kosovës, veriu i Kosovës, çështjet që kanë të bëjnë me borxhet, me privatizimin dhe çështje të tjera teknike.
Të gjitha këto janë "çështje goxha të ndërlikuara, përfshirë këtu edhe rolin e komunitetit ndërkombëtar këtu pas përcaktimit të statusit përfundimtar, tha mes tjerash shefi i Zyrës amerikane në Prishtinë Filip Goldberg në një intervistë për radion "Evropa e lirë.