U PUBLIKUA PIKTURA ME PORTRETIN E BOKSIERIT LUAN KRASNIQI

Në Gjermani, në prak të meçit të 28 shtatorit

U PUBLIKUA PIKTURA ME PORTRETIN E BOKSIERIT LUAN KRASNIQI

19 shtator 2005 /TN

Çerkin BYTYÇI

Piktori i njohur Arnold VIRO, këto ditë, në prag të maçit të 28 shtatorit që zhvillohet në Hamburg për titullin e kampionit botëror, sipas kërkesës së Shtëpisë së artistëve CC përkatësisht të pronarit të saj Conny Constantin, në Stuttgart të Gjermanisë, publikoi pikturën e tij të punuar me përkujdes të madh në të cilën është portretuar sportisti i njohur Luan Krasniqi, që me rezultatet e arritura në boksin gjerman, atë evropian dhe botëror, gjithsesi është bërë legjendë e njohur që tashmë ka hyrë në historinë e sportit ndërkombëtar.

Një pikturë e ngjashme njëkohësisht është bërë kushtuar edhe Max Schmelingut, ish boksierit dhe kampionit botëror në boks, ditëlindja e 100 e të cilit shënohet më 28 shtator në ditën kur zhvillohet maçi për titullin e kampionit botëror në boks, në mes të Luan Krasniqit dhe Lamon Brewster në Hamburg.

Piktura kushtuar Luanit, me titullin „LUANI“që e karakterizon një dinamizëm dhe angazhim i veçantë artistik, do të reprodukohet në një unikat të madhësisë 120 x 170 cm, që do të nënshkruhet nga prominentët dhe në VIP-Party që organizohet më 28 shtator, pas meqit në Hamburg, do të ofrohet për shitje, përkatësisht përmes ankandit publik.

Shuma e mjeteve që do të realizohet nga shitja e kësaj vepre artistike, i dedikohet SOS-fshatit të fëmijëve të cilin Luan Krasniqi e mbështet në forma të ndryshme. Kohë më parë ky sportist prominent e vizitoi SOS – fshatin e fëmijëve në Prishtinë dhe u informua afërsisht për punën me vlerë të çmueshme të këtij institucioni ku ndodhen fëmijët e braktisur dhe jetim.

- Nga kjo vizitë ende kam kujtime për punën fisnike që zhvillohet në SOS-fshatin e fëmijëve në Prishtinë në njërën anë dhe në anën tjetër, për rrëfimet rrëqethëse për fatin e banorëve më të vegjël, të mençur dhe me sjellje shembullore, në këtë institucion human, që secili në vete paraqet një roman me plot ngjarje që shqetësojnë gjithsesi. Ndaj, angazhimi im për të mirën e këtyre të përvuajturve dhe horizontet e reja të perspektivës jetësore të tyre, do të jenë në vazhdimësi, thotë Luani.