SHISH-i nuk është Kulla Ejfel

OPINIONE

SHISH-i nuk është Kulla Ejfel

17 shtator 2005 / TN

Nga Kabil Bushati

Prej ditësh, mediat shqiptare janë përfshirë në diskutimin se a duhet të bashkohet Shërbimi Informativ Shtetëror me Ministrinë e Brendshme, vendim ky i marrë nga qeveria e Partisë Demokratike në pushtet dhe i shprehur nga Berisha gjatë fushatës elektorale.

Pothuaj të gjitha mediat që ishin nën kontrollin e rozalinjëve humbës, konvergojnë në një pikë, ky shërbim duhet të mbesë më vete. Bile Presidenti i Republikës, Moisiu, "meqenëse nuk gjeti mikrofon e kamera në vendin e tij" shkon dhe e përplas këtë ide në studion e Zërit të Amerikës, duke na nxjerrë hesapet e shtëpisë në pazar. . .

Faktikisht, idenë e bashkimit të shërbimeve inteligjente me strukturat e policisë, e pat bërë publike i ndjeri Azem Hajdari, para 9 vjetësh në Parlamentin Shqiptar. Pra nuk është ndonjë ide e re. Biles Azemi propozoi duke avancuar më tej, që ky shërbim duhet t'i bashkëngjitet policisë kriminale. Gjithsesi ndodhi çfarë ndodhi dhe kjo ide e Azemit nuk u vu në jetë. Mirëpo tani koha veproi në favor të idesë së tij.

Por kemi një kontigjent mediash kundër. Vallë kush i sponsorizon?Patjetër që ish sigurimi i shtetit. Le të shpjegohemi. Gjatë qeverisë së Meksit u arrit që me ligj, gjithë ish punonjësit e ish sigurimit të shtetit të përjashtoheshin nga SHIK-u i atëhershëm.

Pra u bë pastrimi i shërbimit informativ nga mbeturinat e diktaturës. Me ardhjen në pushtet në vitin 97 të socialistëve, ky ligj u shkel me të dy këmbët, në këtë shërbim vërshuan me qindra ish sigurimsa duke marrë në dorë frenat e këtij organi.

Ky kontingjent postdiktorial i ka sjellë dëme të pallogartishme këtij vendi. Mjafton të përmendim dy vrasje që ndodhën në kryeqytetin shqiptar në verën e vitit '98.

U vra në mes të Tiranës, ish ministri i mbrojtjes së Kosovës, kolonel Ahmet Krasniqi.

Javë më pas, tribuni i demokracisë shqiptare, i pa harruari Azem Hajdari, e cilësuar si vrasja e shekullit.

Në këto dy vrasje, sipas të gjitha gjasave ka dorë shërbimi informativ shqiptar me kontigjetet e tij të ish sigurimit të shtetit dhe në atë të kolonel Krasniqit u perfol shumë edhe Xhavit Haliti i Kosovës.

Në këtë shkrim kaq të shkurtër, për arësye vendi në gazetë nuk mund të përshkruajmë me dhjetëra vrasje politike të kryera nga ky shërbim. Dhe nga sa cilësuam më lart, vetëkuptohet që nesër kur të bëhet transferimi i këtij organi në ministrinë e brendshme, në rrjetën e ligjit që i përjashton do të ngelen të tërë këta ish sigurimsa.

Është kjo arsyeja madhore që i shtyn ata dhe mediat afër rozalinjëve të prononcohen kundra këtij bashkimi. Partia Socialiste nuk do të mundet më të kontrollojë dhe të urdhërojë këtë institucion. Le ta themi shqip, SHISH-i ka qenë revolveri me silenciator i Fatos Nanos për 8 vite radhazi.

Nuk ka si shpjegohet ndryshe fakti se për këtë periudhë që drejtoi korrupsionin dhe trafikun kryesocialisti Nano, ky shërbim nuk u ndje fare. U bë "ë"pa zane. Nuk arriti të dërgojë para drejtësisë asnji të korruptuart, asnjë trafikant e asnjë vrasës politik.

At'here për çfarë i vlejti ky shërbim këtij populli. Ai i vlejti vetëm Fatos Nanos. Dhe nuk janë pak por rreth 2 mijë oficerë civilë të emërtuar ndryshe inspektorë. Në këto 8 vite ky shërbim nuk bëri asgjë tjetër veçse ushtroi kontrabandë, gjë për të cilën është akuzuar edhe nga institucionet e specializuara ndërkombëtare. Bile në periudhën kur në drejtim të këtij organi ishte Fatos Klosi, telefoni i gazetës Shkodra ishte në përgjim non stop 24 orë rresht.

Opcioni i qeverisë së re për inkludimin e SHISH-it brenda Ministrisë së Brendshme për mendimin tim është më se i drejtë e më se i studiuar. SHISH-i nuk do të jetë më në dispozicion të një apo dy personave, presidentit dhe kryeministrit që ta kenë si Kullë Ejfel për të përgjuar e survejuar këdo, por do të jetë në funksion të një dikasteri jetik siç është ai i punëve të brendshme.

SHISH-i do të bashkërendojë punën operative me strukturat e tjera të këtij dikasteri dhe do të rrisë në maksimum rezultatet pozitive në drejtim të kapjes dhe parandalimit të korrupsionit, krimit, trafikut etj etj. Pra nëse flasim për eliminimin e korrupsionit në vendin tonë, një veprim i tillë është edhe një argument më shumë se qeveria Berisha do të arrijë rezultatet që presim.