Banka Botërore do të mbështesë Kosovën në ndërtimin e kapaciteteve për prodhimin e energjisë elektrike

Banka Botërore do të mbështesë Kosovën në ndërtimin e kapaciteteve për prodhimin e energjisë elektrike

Prishtinë, 16 shtator 2005/TN /QIK - Në takimin e kryeministrit me përfaqësuesen e lartë të Bankës Botërore, znj. Orsalia Kalanacopulos është biseduar për proceset ekonomike në Kosovë dhe për raportet me Bankën Botërore, me theks të veçantë për bashkëpunimin në sektorin e energjisë elektrike.
Kryeministri Kosumi e ka vlerësuar të rëndësishëm zhvillimin e sektorit të energjetikës në Kosovë, me mundësinë që në të ardhmen në gjenerimin e energjisë elektrike të involvohet edhe sektori privat, që është orientim i Ministrisë së Minierave dhe Energjetikës si dhe Qeverisë në përgjithësi.

"Të gjitha parametrat tregojnë se në shumë sektor mund të investohet dhe për këtë qeveria ka hartuar një infrastrukturë ligjore përmes së cilës synon të krijojë kushte dhe hapësirë për investorët e huaj", theksoi Kryeministri Kosumi.
Ai tha se deri më tani qeveria ka mbështetur financiarisht KEK un, por është koha që kjo korporatë energjetike të ketë një menaxhment më të mirë dhe që të bëjë inkasimin e borxheve.
Z.Kosumi dhe znj.Kalancopulos shprehën mendimin se është i nevojshëm investimi në përmirësimin e infrastrukturës në sektorin e distribuimit të energjisë elektrike, meqë në këtë sektor ka humbje të mëdha teknike.
Në këtë takim, znj.Kalancopulos ka njohur kryeministrin me planet e Bankës Botërore për të mbështetur Kosovën në ndërtimin e kapaciteteve për prodhimin e energjisë elektrike në Kosovë, në kohën kur në disa vende do të ndjehet pakësim në prodhimin e energjisë elektrike pas mbylljes së termocentraleve bërthamore në Bullgari.