Çudirat shqiptare në universitet

OPINIONE

Çudirat shqiptare në universitet

13 shtator 2005 / TN

Valbona Bozgo

E prita me habi vendimin për masivizimin e shkollës së lartë në vendin tonë, ku korrupsioni nuk ka munguar të shfaqet në format më përçartëse. Çfarë nuk më dëgjuan veshët këtë verë: nxënës që mbaronin shkollat e mesme me rezultate të ulëta dhe fitonin konkurset për pranimin në shkollat e larta, kandidatë për studentë duke paguar pedagogët (bëhet fjalë për vitet e kaluara) dhe që po me atë lehtësi (pagesë) arrinin të merrnin provimet e fundvitit; të tjerë që nuk arrijnë të blejnë libra, por i huazojnw nga të tjerët “sa për t’i marrë erë”. Kishte ndodhur edhe e kundërta.

Mosvënia e notës së merituar, ku studenti nuk pranonte të “lyente”, por djersinte ndershmërisht mbi libra.
M’u kujtua përralla e djalit të drunjtë, Pinokut, aq shumë i dëshiruar që “Zana” ta shndërronte në djalë të vërtetë, prej mishi e gjaku, gjë që mund ta arrinte vetëm nëpërmjet një rruge të gjatë provash, të mbushur me vështirësi e sakrifica.

Një nga këto ishte edhe mashtrimi që i bënë dhelpra dhe maçoku, kur e detyruan të mbillte lekët në tokë, pasi ato mund t’i shumëfishoshin mbi pemë, si fruta lëngplote (kujtoni piramidat). Hajdutët ikën bashkë me paratë dhe Pinoku çudërisht u arrestua për protestën. Përgjigjja që mori nga ky kulm padrejtësie, ishte fakti i të mosqenit hajdut! Marrëzitë në mëmëdheun tonë s’kanë të sosur.

Por “kulmi”që më zunë veshët këtë fundverë ishte historia e një ish-të njohure, me logjikë të çalë, që dikur, për t’i mundësuar mbarimin e arsimit të mesëm, prindërit e nderuar e dërguan nga gjimnazi i qytetit, në një nga rrethinat e tij. E pajisur edhe me ndjenja agresiviteti, që i shprehte ndaj njerëzve që e rrethonin, burim i kapriçiove të pazakonta, kjo na paska mbaruar së fundi edhe një nga degët më të preferuara të arsimit të lartë, atë të Drejtësisë.

Madje është bërë edhe funksionare, drejtoreshë në një institucion arsimor!!! Nuk e di se ç’do të pësonin prindërit e mjerë po të çoheshin nga varri dhe ta shikonin atje ku është sot. Thonë se një nga arsyet e largimit të hershëm nga kjo botë ishte marazi ku i kishte futur marrëzia e së bijës. Me siguri, në këtë pozicion të ri, atyre do t’u binte damllaja sërish.

Masivizimi i tanishëm i arsimit të lartë, ku seleksioni mendor i studentit, nën shembullin e vendeve të zhvilluara perëndimore, në një vend me çudira të tilla si yni, ku rëndom studentët simbolizojnë turra kartëmonedhash, duket jo fort i efektshëm. Derisa në qeveritë tona nuk do të mungojnë dhelprat dhe maçokët, Pinoku do të mbetet prej druri, pa u shndërruar në njeri të vërtetë, si simotrat europiane. Dhe të mos habitemi, që Shqipëria një ditë të përmendet jo vetëm për korifeun që fitoi (fituam) “Man Booker”-in, por edhe për përfshirjen në rekordin “Gines” të funksionarëve mediokër!