Kosovarët ia sollën Shqipërisë tetë medalje

Kosovarët ia sollën Shqipërisë tetë medalje

Tiranë, 13 shtator 2005 / TN /QIK - Më 10 dhe 11 shtator në Tiranë u mbajt Kampionati i dhjetë ballkanik i karatesë për kadetë dhe juniorë, në të cilin morën pjesë tetë shtete ballkanike: Shqipëria, Turqia, Greqia, Bullgaria, Rumania, Bosnje dhe Hercegovina, Maqedonia dhe Serbia e Mali i Zi.

Ky kampionat ishte i rëndësishëm për Shqipërinë, ngase kjo ishte hera e parë që iu besua organizimi i një gare ndërkombëtare në karate, por njëkohësisht ishte i rëndësishëm edhe për Kosovën, ngase në përfaqësuesen e Shqipërisë morën pjesë edhe nëntë sportistë kosovarë, kryesisht anëtarë të klubit të karatesë "Iliria" nga Prishtina dhe anëtari i klubit të karatesë "Ippon" nga Peja, Agon Agani, ndërsa në mesin e arbitrave që ndanë drejtësinë gjatë tërë rrjedhës së kampionatit, ishte edhe arbitri kosovar, Safet Ramadani.
Gjatë dy ditëve të garave, garuesit shqiptarë bënë përpjekje maksimale për të arritur rezultate sa më të mira, ngase kampionati ballkanik është garë që organizohet nga Federata Botërore e Karatesë, federatës së vetme ndërkombëtare që e njeh zyrtarisht Komiteti Olimpik Ndërkombëtar, andaj medaljet e fituara në të kanë vlerë shumëfish më të madhe se ato që fitohen në kampionatet që i organizojnë federatat e shumta ndërkombëtare të karatesë.

Shi për këtë arsye edhe klubi i karatesë "Iliria" kishte vendosur që t'i japë përparësi kampionatit ballkanik ndaj kampionatit evropian të WSKF së, që njëkohësisht mbahej në Turqi.

Për karateistët e rinj kosovarë motiv mobilizues paraqiste edhe fakti se Kosova, për shkak të statusit akoma të padefinuar, nuk mund të marrë pjesë në garat e Federatës Botërore të Karatesë, anëtarë të së cilës janë 174 shtete të botës, andaj ky ishte një rast i mirë që ata ta verifikojnë cilësinë e tyre, por edhe cilësinë e karatesë kosovare.

Duhet thënë se në kampionatin e sivjetshëm numrin më të madh të medaljeve për Shqipërinë e fituan karateistët kosovarë.

Kështu, në konkurrencën ekipore,

ekipi shqiptar i juniorëve, i përbërë nga Ermira Statovci, Ardiana Rexhepi, Marigona Beadini dhe Kaltrina Krasniqi, fitoi medaljen e bronztë,

ndërsa në konkurrencën individuale, në kategorinë 57 kg. Tringa Qerreti, fitoi medaljen e artë dhe titullin e kampionit ballkanik në kategori,

ndërsa medaljet e tjera i fituan juniorët: Ardiana Rexhepi të argjendtën (+60 kg) dhe Marigona Beadini të bronztën ( 60 kg), kurse te kadetët Jetmir Rexhepi të bronztën ( 60 kg), Linditrim Gashi të bronztën (+75 kg) dhe Esat Lika të bronztën ( 75 kg).

Garuesit e tjerë të përzgjedhjes së Shqipërisë, që u stolisën me medalje ishin edhe juniorët: Florent Gashi ( 55 kg), që fitoi medaljen e argjendtë, Ledion Hysa të argjendtën ( 60 kg), Eklit Arapi të bronztën ( 60 kg) dhe Taulant Kumbulla të argjendtën ( 65 kg).
S'do mend se ky sukses i përzgjedhjes shqiptare, sikundër edhe organizimi në nivel të lartë i kampionatit të dhjetë ballkanik, kanë hapur shteg që Shqipërisë edhe në të ardhmen t'i besohet organizimi i garave ndërkombëtare të karatesë, që do të ishte mirënjohje më e madhe për organizimin e sivjetshëm të kampionatit ballkanik.