Goditja e korrupsionit kyç i qeverisë së re

Goditja e korrupsionit kyç i qeverisë së re

11 shtator 2005 /TN

Aleksandër Furxhi,
Korrespondent i BBC-së në Tiranë
BBC (10.09.2005)

Kryeministri Sali Berisha ka paraqitur në parlament programin e qeverisë së tij, në qëndër të të cilit është lufta kundër korrupsionit dhe rivendosja e shtetit ligjor në Shqipëri.

Programi dhe përbërja e kabinetit qeveritar po i nënshtrohen një debati përpara se të votohet për besimin ndaj qeverisë.

Partia Demokratike dhe aleatët e saj të djathtë janë të sigurt se kanë në shumicën e vendeve në parlament pas zgjedhjeve të 3 korrikut.

Programi i zotit Berisha përshkohet tërësisht nga angazhimi për të luftuar korrupsionin në administratën shtetërore.

Sipas zotit Berisha, qeveria e tij do të ketë si moto 'shërbimin ndaj qytetarëve'. Në këtë shtrirje zotim i qeverisë është hapja brenda një muaji e zyrave të komunikimit me qytetarët në çdo ministri dhe dikaster qëndror.

Socialistët në opozitë janë shprehur se do të votojnë kundër qeverisë së zotit Berisha dhe programit të saj. Ky program për ta është "një mashtrim", siç tha në parlament Gramoz Ruci, që aktualisht drejton Partinë Socialiste, pas dorëheqjes së kryetarit të saj Fatos Nano.

Nga ana e tij, zoti Berisha e bëri të qartë se nuk do të prekë nëpunësit e ndershëm të administratës, porse nuk ka ndërmend të tolerojë ata zyrtarë të përfolur për korrupsion.

"Luftën kundër dukurise së rryshfetit" zoti Berisha tha se ka ndërmend ta shpallë "emergjence kombëtare".

Kryeministri i ri njoftoi se deputetët e shumicës kanë ndërmend që të heqin dorë vullnetarisht nga imuniteti në mënyrë që të jenë drejtëpërdrejtë të hetueshëm nëse ka dyshime për korrupsion.

Një zotim tjetër që veçohet është ai se në kuadrin e luftës kundër krimit dhe trafiqeve të paligjshme, qeveria Berisha do të synojë inkuadrimin e krimit të trafikut të vajzave dhe qenieve njerëzore si një krim kundër njerëzimit.

Programi ekonomik

Siç edhe pritej, pjesë e rëndësishme në paraqitjen e programit të qeverisë së zotit Berisha ishte edhe zhvillimi ekonomik i vendit, premtimet për ulje të taksave dhe rritje të pagave e pensioneve në disa afate dhe kategori shoqërore.

Por opozita, siç pritej, po shpreh nje skepticizem ekstrem ndaj premtimeve të programit të qeverisë.

Opozita thotë se programi i qeverisë ka ndryshime nga programi elektoral dhe se premtimet e para kanë filluar të rudhen.

Si shembull sillet premtimi se do të përgjysmoheshin taksat per biznesin e vogel që në fillim të mandatit të qeverisë, në një kohë që ministri i ri financave ka bërë të ditur se kjo gjë tani për tani nuk është e mundur.

Debati në parlament pritet të vazhdojë edhe të shtunën deri në mbrëmje kur pritet që qeveria të marre votëbesimin falë shumicës së votave që siguroi e djathta në zgjedhjet e 3 korrikut.

Me pas, kabineti qeveritar do të betohet përpara presidentit të republikës për të shenuar hyrjen zyrtare në fuqi të qeverisë së re, që ka gjasa të ndodhë ditën e hënë.