Mesazhe inkurajuese dhe mbështetjeje nga vendi dhe diaspora për Presidentin Rugova

Mesazhe inkurajuese dhe mbështetjeje nga vendi, bota dhe diaspora për Presidentin Rugova

Prishtinë, 7 shtator 2005 /QIK - Edhe gjatë ditës së sotme Presidentit të Kosovës Ibrahim Rugova, nga organizata e asociacione të ndryshme i kanë arritur mesazhe inkurajuese dhe mbështetjeje nga vendi dhe diaspora për shërim sa më të shpejtë dhe të plotë.
Kështu kryetari i Kryetari i Gjykatës së Lartë të Shqipërisë,Thimjo Kondi shkruan: "Me keqardhje mësova mbi problemet Tuaja shëndetësore, por në të njëjtën kohë më impresionoi pa masë kurajo dhe optimizmi Juaj për të përballuar këtë gjendje të vështirë, për të trimfuar mbi sëmundjen me ndihmën e mjekësisë dhe të Zotit, si dhe vendosmëria e përkushtimi për të përmbushur me sukses detyrën e lartë të Presidentit të Kosovës.
Emri dhe vepra Juaj janë të lidhura ngusht me historinë dhe të tashmen e Kosovës, me arritjet dhe sfidat e saj në rrugën e pakthyeshme të lirisë, demokracisë dhe pavarësisë, drejt të cilave Ju keni prirë dhe vazhdoni të prini përpara si një lider i urtë, i guximshëm dhe largpamës. Shembulli Juaj është burim frymëzimi e optimizmi për popullin shqiptar të Kosovës dhe për mbarë Kombin tonë".
Ministri i Transportit dhe Postë Telekomunikacionit të Kosovës, Qemajl Ahmeti, në telegramin e tij shpreh besimin se Presidenti do ta fitojë edhe këtë betejë që së bashku të rrumbullakësohet procesi i pavarësisë së Kosovës.
Ndërkaq kryetari i BSPK-së Bahri Shabani thotë se mesazhi i Presidentit Rugova nëpërmjet televizonit drejtuar popullit ishte prekës por edhe një kurajo se do ta përballojë edhe këtë sfidë ashtu siç ka përballuar edhe sfida të shumta deri më tani. "Punëtorët e Kosovës shpresojnë në shërimin tuaj sa më të shpejtë dhe se edhe më tutje Ju do të jeni në krye të proceseve të cilat çojnë drejt pavarësisë së plotë të Kosovës", shkruan kreu i BSPK-së.
Kryesia e Komuniteti Shqiptaro Kanadez me seli ne Hamilton, Ontario, shkruan: "Ju qëndruat pranë popullit gjithmonë edhe në momentet më të vështira, andaj edhe sot ne jemi të bindur se do ta përballoni këtë të keqe për ta çuar deri në fund amanetin e popullit për pavarësi dhe zhvillimin e gjithmbarshëm të Kosovës Ne do te lutemi për shëndetin tuaj".
Qendra shqiptare "Besa" në Malme të Suedisë në mesazhin e saj shpreh besimin se Presidenti do ta kapërcejë edhe këtë të keqe, ashtu siç me guxim dhe stoikisht ka kapërcyer edhe sfidat e të deritashme.

"Lutemi që të shëroheni plotësisht sa më parë me dëshirë që me Ju në krye të realizojmë aspiratat e Kosovës", porosisin anëtarët e saj Dr.Sali Bashota, drejtor i Bibliotekës Kombëtare dhe Universitare të Kosovës shkruan: "Në emrin tim dhe të punëtorëve të Bibliotekës Kombëtare dhe Universitare të Kosovës, ju dëshirojmë shërim sa më të shpejtë, me dëshirën që bashkarisht ta jetësojmë projektin tuaj dhe të popullit të Kosovës – pavarësinë e vendit tonë".
"Edhe pse të goditur nga lajmi që me burrëri dhe madhështi e kumtuat, farmacistët e Shoqatës Farmaceutike të Kosovës besojnë në shërimin tënd", thuhet në një mesazh të kësaj shoqate, duke njoftuar se një delegacion i saj gjendet në Kongresin Botëror të Farmacisë në Kairo dhe po e përfaqëson Kosoveë si anëtare e barabartë me të gjitha asociacionet nacionale nga gjithë bota.
"Shpresojmë që në këto momente të rëndësishme për Kosovësn dhe qytetarët e Kosovës, do të arrini ta përballoni edhe këtë sfidë dhe të vazhdoni aktivitetn e Juaj politik për sendërtimin e aspiratave të Popullit të Kosovës", thuhet në mesazhin e kryetarit të Kuvendit të Vushtrrisë, Muharrem Shabani.
Ndërkaq kryetari i Komunës së Bujanovcit Nagip Arifi shprehet se dëshiron fuqishëm që Presidenti Rugova ta kapërcejë këtë sfidë të rëndë personale që t'i kthehet detyrave që e presin si President i Kosovës. "Beosjmë fuqishëm se me vullnetin Tuaj do ta fitoni edhe këtë betejë shumë të rëndësishme si për Ju ashtu edhe për të gjithë qytetarët e Kosovës".
Presidentit Rugova i kanë dhënë mbështeje dhe kurajo edhe disa degë të LDK-së nga nga vendi dhe diaspora: dega e LDK-së në Suedi, dega e dytë dhe tretë në Prishtinë dhe ajo e Drenasit.

Mesazhet e datës 6 shtator 2005
Presidenti Moisiu: Populli kosovar duhet të jetë vërtet krenar me Ju

Tiranë, 6 shtator 2005 /QIK - Presidenti i Alfred Moisiu, i ka dërguar një mesazh Presidentit të Kosovës, Ibrahim Rugova në të cilin thuhet: "Më pezmatoi shumë kur dëgjova nga goja juaj për sëmundjen që do të duhet të përballosh.
I dashur Ibrahim! Kurajoja jote për të parë të keqen drejt në sy dhe për t'u përballuar me të i ka hije një burri malesh dhe një burri shteti si Ju.
Sa e rëndësishme është qëndresa në të tilla raste unë mund ta them edhe nga përvoja ime. Populli kosovar duhet të jetë vërtet krenar me Ju, për qëndrueshmërinë dhe burrërinë e një lideri të sprovuar, për të cilin Kosova ka shumë nevojë, sidomos në këto kohëra të rëndësishme kur përcaktohet e ardhmja e saj.
Bashkë me urimin time vëllazëror, unë dua të shpreh besimin se Zoti do t'Ju ndihmojë e do t'Ju bekojë për të gjithë sa keni bërë Ju për Kosovën martire. Fjalë zemre e shpresë kanë edhe të gjithë shqiptarët për Ju, kudo ku janë", thuhet në fund të mesazhit të Presidentit Moisiu drejtuar Presidentir Rugova.
Solana: Jam tronditur kur kam dëgjuar se Presidenti Rugova është në gjendje të rëndë shëndetësore

Bruksel, 6 shtator 2005 - Përfaqësuesi i lartë i BE-së për Politikë të Jashtme dhe Siguri Havier Solana në deklaratën e lëshuar pas adresimit që Presidenti Rugova bëri në Prishtinë tha se ishte thellësisht i pikëlluar kur dëgjoi se Presidenti Rugova është në gjendje të keqe shëndetësore.
"Jam tronditur kur kam dëgjuar se Presidenti Rugova është në gjendje të rëndë shëndetësore në këto momente dhe dëshiroj t'i përcjell dëshirat e mia më të sinqerta për shërimin e tij dhe t'i shpreh miqësinë time të thellë.
Kontributi i Presidentit Rugova është thelbësor në këtë fazë kruciale për Kosovën, nëpër të cilën po kalon Kosova. Unë jam i bindur se çdokush do ta tregojë solidaritetin me të dhe do të vazhdojë të punojë për unitet, duke pasur parasysh interesat e përgjithshme të Kosovës dhe të gjithë popullit të saj".


Skefer: I shpreh dhimbjen time të thellë Presidentit Ibrahim Rugova

Paris, 6 shtator 2005 - Shqetësimin e tij për shëndetin e Presidentit Ibrahim Rugova e ka shprehur mbrëmë edhe Sekretari i Përgjithshëm i NATO-s Jap de Hop Skefer, i cili gjendet për një vizitë në Paris. Ai në një deklaratë të lëshuar posaçërisht ka thënë se shpreh bashkëndjenjen me Presidentin Rugova në këto momente kur ai përballet me sfidat serioze të shëndetit të tij.
"Do të doja t'i shpreh dhimbjen time të thellë Presidentit Ibrahim Rugova, përderisa ai përballet me këtë sfidë serioze të shëndetit të tij. Vendimi i tij për të mbetur në detyrën e Presidentit gjatë kësaj periudhe të rëndësishme në evolucionin e Kosovës tregon kurajën e tij. Unë u bëj thirrje të gjitha partive që të demonstrojnë pjekuri dhe të vazhdojnë të punojnë drejt një të ardhme paqësore dhe stabile për Kosovën".


Sali Berisha i ka dërguar një mesazh Presidentit Rugova

Tiranë, 6 shtator 2005 - Kryeministri i dekretuar i Shqipërisë Sali Berisha i ka dërguar një mesazh Presidentit Rugova, duke i uruar shërim të plotë.
"Me këtë mesazh dëshiroj t'ju përshëndes shumë përzemërsisht dhe t'ju uroj nga zemra shërim të plotë.

Ndihma e Zotit, guximi me të cilin ju po i qëndroni sëmundjes, mbështetja dhe përkujdesja e madhe familjare dhe më gjerë, mjetet e shkëlqyera të mjekimit, misioni i madh që keni për të përmbushur, kam bindjen se të gjitha këto së bashku do ta mposhtin këtë proces dhe shërojnë atë", thuhet në mesazhin që Sali Berisha i ka dërguar Presidentit Rugova.

Kosumi: Besojmë se Presidenti si gjithmonë do të tejkalojë edhe këtë sfidë

Prishtinë, 6 shtator 2005 - Pas lajmit se Presidenti i Kosovës, Dr. Ibrahim Rugova është diagnostifikuar me kancer të mushkërive, Kryeministri i Kosovës, Bajram Kosumi bëri këtë deklaratë:
"Me shqetësim morëm lajmin se Presidenti i Kosovës është diagnostifikuar me kancer. Dr. Ibrahim Rugova ka luajtur dhe vazhdon të luajë rol të rëndësishëm në zhvillimet në Kosovë për aspiratat e popullit të Kosovës për liri, demokraci dhe pavarësi dhe se paraqitja e Presidentit Rugova përmes mediave na jep shpresë se ai do të vazhdojë t'i kryejë detyrat e tij esenciale si President i Kosovës. Besojmë se Presidenti si gjithmonë do të tejkalojë edhe këtë sfidë si shumë të tjera.
Në emrin tim personal dhe në emër të Qeverisë së Kosovës i dëshiroj shërim të shpejtë dhe besojmë që së shpejti Presidenti do t'u kthehet të gjitha detyrave të tij si President për të mirën e popullit dhe të Kosovës".


F.Goldberg: Me pikëllim mësova për sëmundjen shumë serioze të Presidentit Rugova

Prishtinë, 6 shtator 2005 - Me të mësuar lajmin për sëmundjen e rëndë të Presidentit Ibrahim Rugova, shefi i Zyrës amerikane në Prishtinë, Filip Goldberg ka lëshuar këtë deklaratë.
"Me pikëllim mësova për sëmundjen shumë serioze të Presidentit Rugova, dhe dëshiroj të theksoj këtu kurajon që e shfaqi kur ai e paraqiti këtë në mënyrë publike. Jam krenar që SHBA të ishin në gjendje që të ndihmojnë Presidentin - i cili ka qenë mik i Shteteve të Bashkuara për shume vite në betejën e tij kundër kësaj sëmundjeje. Kjo betejë nuk do të jetë e lehtë, dhe në emër të Qeverisë së SHBA ve, ne ia dëshirojmë të mirën".


Shqetësimin me gjendjen shëndetësore të Presidentit Rugova e ka shprehur edhe shefi i Zyrës britanike

Prishtinë, 6 shtator 2005 - Shqetësimin e tij lidhur me gjendjen shëndetësore të Presidentit Rugova në emër të Presidencës së BE-së në Prishtinë e ka shprehur edhe shefi i Zyrës britanike në Prishtinë Mark Dikinson.

"Ne dëshirojmë t'i bashkohemi shefit të UNMIK-ut Soren Jesen Petersen në shprehjen e simpatisë për Presidentin Ibrahim Rugova dhe familjes së tij duke i uruar shërim sa më të shpejtë. Ne jemi të sigurtë se të gjithë njerëzit në Kosovë me dëshirë të mirë dëshirojnë të unifikohen dhe solidarizohen me Presidentin Rugova në këtë kohë të vështirë nëpër të cilën ai po kalon".

BI: Jemi thellë të bindur se roli juaj për Kosovën në këto momente është tepër i rëndësishëm

Prishtinë, 6 shator 2005 - Kryesia e Bashkësisë Islame të Kosovës i ka dërguar një mesazh Presidentit Rugova, duke e lutur Zotin me dëshirë që të shërohet sa më shpejt. Në këtë mesazh thuhet:
"Që nga momente e para të shkuarjes Tuaj në bazën amerikane në Gjermani, në ankth kemi pritur për lajmet që do të na vijnë nga andej.
Paraqitja Juaj e djeshme në opinion për ne ka qenë një moment i prekshëm dhe i dhimbshëm. Informacionin Tuaj për sëmundjen e pranuam me keqardhje dhe shqetësim të thellë, jo vetëm ne por të gjithë qytetarët e Kosovës dhe njerëzit paqësor në botë.
Jemi thellë të bindur se roli juaj për Kosovën pikërisht në këto momente është tepër i rëndësishëm. I nderuari President!
Kryesia e BI të Kosovës lut Zotin e Gjithëmëshirshëm që edhe në këto momente të vështira t'ju ndihmojë me dëshirë që të shëroheni sa më shpejtë", thuhet në fund të këtij mesazhi të BI të nënshkruar nga Zv/kryetari, Ahmet efendi Sadriu.


AAK i uron shërim të shpejtë e të plotë Presidentit Rugova dhe rikthim të krye të detyrave si president i vendit

Prishtinë, 6 shtator 2005 - Kryesia e Aleancës për Ardhmërinë e Kosovës (AAK) nëpërmjet një komunikate për media thekson se ka përcjellë me shqetësim edhe interesim të thellë trajtimin mjekësor të Presidentit të Kosovës, Dr. Ibrahim Rugova, në Landstuhl të Gjermanisë, pas përkeqësimit të gjendjes së tij shëndetësore.
AAK e mirëpriti lajmin për ardhjen e z. Rugova në Atdhe, pas trajtimit mjekësor, dhe i uron atij shërim të shpejtë e të plotë dhe rikthim të krye të detyrave si president i vendit.
AAK u është mirënjohëse dhe falënderuese të gjithë atyre që u angazhuan në kurimin e Presidentit Rugova, veçanërisht stafit mjekësor në bazën ushtarake amerikane në Landstuhl dhe falënderon, në të njëjtën kohë, të gjithë ata që ndanë shqetësimin me Kosovën dhe popullin e Kosovës, për shëndetin e presidentit të vendit, thuhet në fund të komunikatës.


Shërbimi Policor i Kosovës shënoi 6-vjetorin e themelimit me transferimin e kompetencave

Prishtinë, 6 shtator 2005 - Shërbimi Policor i Kosovës sot me një ceremoni festive shënoi 6-vjetorin e themelimit. Me këtë rast u bë edhe transferimi i kompetencave nga Policia e UNMIk ut te SHPK ja për rajonin e Prishtinës. Në këtë solemnitet morën pjesë përfaqësues të institucioneve ndërkombëtare dhe vendore.
Aktualisht në Kosovë shërbejnë edhe 3 mijë policë të UNMIK ut bashkë me 7 mijë pjesëtarë të SHPK-së. Ndryshe transferimi i kompetencave është pjesë e bartjes së përgjegjësive, ndërkohë që po afrohet koha e zgjidhjes së statusit politik të Kosovës.
Duke folur në ceremoninë e shënimit të këtij përvjetori, shefi i UNMIK ut Soren Jessen Petersen porositi pjesëtarët e SHPK ë që të punojnë në ruajtjen e një mjedisi të lirë dhe të sigurt për të gjithë. Ai lavdëroi punën e deritanishme të SHPK së. "SHPK ja në shumë mënyra duhet të jetë model për institucionet e tjera të Kosovës. Eshtë multietnike, ndoshta edhe më shumë se strukturat tjera prandaj edhe rezultati është efikas", u shpreh Petersen.
Rajoni i Prishtinës numëron 1293 zyrtarë policor të strukturuar në 9 stacione policore. Në ceremoninë e sotme janë graduar edhe 4 kapitenë, 3 majorë, 10 nënkolonelë dhe katër 4 kolonelë.
Gjithashtu një pjesëtari të SHPK së dhe një qytetari iu është ndarë medalje për shpëtim jete.


Sabri Hamiti: Presidentit dhe mikut Ibrahim Rugova i dëshiroj shërim të shpejtë

Prishtinë, 6 shtator 2005 - Shkrimtari ynë i shquar Sabri Hamiti, në cilsinë e mikut, i ka drejtuar Presidentit Rugova një mesazh inkarujues duke i dëshiruar shërim dhe forcim të shpejtë.
"Presidenti i Kosovës, Ibrahim Rugova, foli me kurajo para vendit dhe para botës për problemet që ka me shëndetin.
Pesha e fjalës së tij, edhe me njoftimin e dhembshëm,dha porosinë trimëruese për bashkëpunëtorët e tij dhe për qytetarët e Kosovës që të punojnë për lirinë dhe pavarësinë e vendit, të tubuar rreth tij dhe në frymën e tij.
Presidentit të Kosovës dhe mikut tim Ibrahim Rugova idëshiroj shërim dhe forcim të shpejtë, duke shfaqur njëherësh simpatinë për familjen e tij dhe duke njohur dëshirat e shpresat e qytetarëve të Kosovës".


Mark Krasniqi: Unë kam besim z. President se do të përballoni edhe këtë sfidë

Prishtinë, 6 shtator 2005 - Akademik Mark Krasniqi, kryetar i Partisë Shqiptare Demokristiane të Kosovës i ka dërguar një mesazh Presidentit Rugova me këtë përmbajtje:
"Historinë e shkruajnë njerëzit e mëdhenj. Historinë e bëjnë njerëzit e mëdhenj. Burrat e mëdhenj e shkruajnë dhe e bëjnë historinë e vet, me veprat e tyre, me burrninë e tyre. Ka një decenie e gjysmë që një burrë i madh i Kosovës nisi ta shkruajë historinë e re të Kosovës, historinë e ndërtimit të Shtetit të Pavarur të Kosovës. Ai burrë i madh i Kosovës është dr.Ibrahim Rugova.
Kosova dhe populli i saj ka fatin e madh që ky burrë i madh i saj po e kurorëzon me sukses historinë e re të Kosovës. Ky kurorëzim ka vetëm një emër, vetëm një vullnet që është shprehur nga populli i Kosovës dhe që është inicuar së së pari nga mendja e burrit të madh të Kosovës, dr. Ibrahim Rugovës, e kjo është Pavarësia e Kosovës.
Historinë nuk mund ta ndalë askush. As burrin e madh të Kosovës nuk mund ta ndalojë askush në udhëtimin e tij drejt kurorëzimit të vullnetit të tij e të popullit të Kosovës. As sëmundja jo!
Unë kam besim të madh te Zoti dhe të fuqia Juaj e madhërishme shpritërore e fizike se do të përballoni edhe këtë sfidë shëndetësore, Z.President Ibrahim Rugova!
Unë i lutemi Zotit për shëndetin Tuaj z. President!
Unë i lutem Zotit që Ju sa më parë të merrni veten dhe t'i ktheheni detyrës Tuaj të shenjtë të zgjedhur nga vota e popullit, z. President!
Unë i lutem Zoitit, që Ju sa më parë të nënshkruani zyrtarisht Shtetin e Pavarur të Kosovës, z. President! Unë besoj në Zot! Unë besoj në fuqinë Tënde, dr. Ibrahim Rugova"!


Mesazh i liderit të PPD-së

Tetovë, 6 shtator 2005 - Kryetari i Partisë për Prosperitet Demokratik Abdiladi Vejseli i ka dërguar një mesazh urimi Presidentit Rugova me urimet më të mira për shërim sa më të shpejtë.
"Kënaqësi e veçantë është ajo se Ju premtuat se me bekimin e Zotit do të mundoheni t'i kryeni detyrat si President i Kosovës dhe aq më tepër se do të negocioni për statusin final të Kosovës që për Ju gjithmonë ka qenë dhe do të jetë pavarësia e saj".
Mesazhe drejtuar Presidentit Rugova nga vendi dhe nga Perëndimi

Prishtinë, 6 shtator 2005 - Presidentit të Kosovës Ibrahim Rugova vazhdojnë t'i arrijnë mesazhe urimi nga vendi dhe jashtë me dëshirat më të mira për shërimin e tij sa më të shpejtë, por edhe pikëllimi dhe shqetësimi për shëndetin e Presidentit.
Asociacioni i Komunave të Kosovës shpreh shqetësim të thellë pas fjalës së Presidentit të Kosovës Ibrahim Rugova drejtuar kombit lidhur me gjendjen e tij shëndetësore. Njëherit komunat e Kosovës shprehin përkrahjen e plotë dhe bindjen se Presidenti do të përballojë me sukses edhe këtë betejë për të vazhduar në rrugën drejt njohjes formale të Pavarësisë së Kosovës.
Kryesia e Forumit të Gruas së LDK-së, e shqetësuar për shëndetin e Presidentit të Kosovës, dr.Ibrahim Rugova, i lutet Zotit për shërimin sa më të shpejtë të prijësit tonë. Njëkohësisht falënderon Shtetet e Bashkuara të Amerikës dhe ekipin mjekësor për përkujdesjen intensive mjekësore. FG beson se Presidenti Rugova do ta fitojë edhe këtë betejë, ashtu siç i ka fituar edhe shumë beteja të tjera gjatë udhëheqjes së vendit që nga themelimi i LDK-së.
Ndërkaq Dega e LDK-së në Zvicër shprehet: "Besojmë në energjinë tuaj, në kujdesin e mjekëve dhe në Zotin, se ju do ta kaloni ketë sëmundje më sukses që të na udhëhiqni deri në njohjen e pavarësisë, që edhe shumë e shumë vite ta gëzojmë së bashku Kosovën e lirë, demokratike dhe sovrane".
Në telegramin e Degës së LDK-së në Britani thuhet: "Jemi optimistë dhe të bindur se Presidenti Rugova do të vazhdojë palodhshëm të udhëheqë Kosovën drejt pavarësisë", duke falënderuar Qeverinë amerikane dhe bazën ushtarake amerikane për ndihmën dhe përkujdesjen e treguar ndaj Presidentit Rugova.
"Ashtu siç besoni Ju, i nderuari President dhe ekipi mjekësor, edhe ne besojmë se me ndihmën e Zotit dhe energjisë suaj edhe kësaj radhe do ta sfidoni dhe do ta mundni të keqen me të mirë", thuhet në mesazhin e Degës së LDK së në Norvegji.
Shoqata miqësore Shqiptaro Suedeze shprehet se anëtarët e saj janë prekur shumë për lajmin e mësuar dhe luten për shërimin sa më të shpejtë të Presidentit Rugova.
"Lajmi se jeni i sëmurë nga kanceri na erdhi shume i rëndë. Dëshira jonë është që sa më shpejtë të shëroheni. Ju keni kaluar prova me te mëdha, të gjitha ato i keni kaluar me sukses, ne besojmë e i lutemi zotit që edhe këtë sëmundje ta tejkaloni dhe të shëroheni plotësisht", thuhet në mesazhin e Bashkësisë Shqiptare në Zvicër.
"Me shumë keqardhje dje e morëm lajmin për keqësimin e gjendjes suaj shëndetësore. Shumë vite me radhë i keni kaluar shumë pengesa, besojmë që edhe ketë betejë do ta fitoni me sukses, shumë shpejt do të shëroheni e do t'u ktheheni punëve dhe obligimeve të Kryetarit të Kosovës. Në periudhën e ardhshme Kosovën dhe banorët a sajë i presin sfida të rëndësishme. E ne besojmë që me udhëheqjen Tuaj këto sfida do të përfundojnë me sukses", thuhet në mesazhin e Grupit Parlamentar 6+ në përbërje te të cilit janë KDTP dhe VAKAT.
Mesazhe në adresë të Presidentit Rugova për shërimin e plotë kanë arritur edhe nga shumë individë nga Kosova dhe Perëndimi.
Kështu në mesazhin e Prof. Bujar Hoxhës nga Tirana mes tjerash thuhet: "Përpjekjet dhe sakrificat tuaja për krijimin e shtetit të pavarur të Kosovës ju radhit ndër atdhetarë më të shquar të kombit tonë".


Rojters: Ibrahim Rugova ikonë e aspiratave 15-vjeçare të shqiptarëve të Kosovës për pavarësi

Prishtinë, 6 shtator 2005 - Agjencia britanike e lajmeve Rojters shkruan gjerësisht për Presidentin e Kosovës Ibrahim Rugova, me të njoftuar lajmi se vuan nga një sëmundje e rëndë.
- Presidenti i Kosovës, Ibrahim Rugova, ikonë e aspiratave 15-vjeçare të shqiptarëve të Kosovës për pavarësi, deklaroi dje se tek ai është diagnostifikuar kanceri në mushkëri, vetëm disa javë para fillimit të bisedimeve për pavarësimin e Kosovës.
Por, Rugova, i cili javën e kaluar qëndroi në një spital ushtarak amerikan në Gjermani, theksoi se mjekët atje i kanë thënë se gjendja e tij shëndetësore është duke u përmirësuar dhe se ata janë optimistë se ai do të këndellet. Ai nuk përmendi mundësinë e dorëheqjes së tij eventuale nga funksioni i kryetarit.
"Mjekët kanë thënë se unë kam një kancer të lokalizuar të mushkërive", tha Rugova 60-vjeçar, dukshëm i thyer, në fjalimin televiziv drejtuar opinionit në Kosovë, i cili ishte xhiruar më herët.
"Me vullnetin e Zotit, unë do ta tejkaloj edhe këtë betejë dhe do të vazhdoj të punoj për njohjen e shtetit tonë, Kosovës", shtoi ai më tutje.
Si një person i zgjedhur katër herë për kryetar të Kosovës dhe udhëheqës i partisë më të madhe politike në këtë vend, Rugova është një figurë e fuqishme politike për 2 milionë shqiptarët e Kosovës, të cilët po angazhohen për pavarësim nga Serbia.
Pritej që Rugova të marrë përsipër rolin kryesues në drejtimin e rivalëve politikë shpesh të përçarë në Kosovë, në negociatat e sponsoruara nga OKB-ja, të cilat mund të fillojnë në tetor.
Rugova nuk ka ndonjë pasardhës të tij të qartë në LDK-në e tij të përçarë nga fraksionet, në rast se gjendja e tij shëndetësore përkeqësohet.
Një mjek nga Kosova theksoi se kthimi i Rugovës në Kosovë, ditën e shtunë dhe paraqitja e tij në televizion, paraqesin një shenjë të mirë.
Rugova, një profesor i letërsisë, i edukuar në Sorbonë, ka qenë arkitekt i rezistencës pasive dhjetëvjeçare kundër dominimit serb që nga viti 1989, kur ish-diktatori jugosllav, Sllobodan Millosheviqi, shfuqizoi autonominë e Kosovës.
Por, pas shpërthimit të luftës në territoret e ish-Jugosllavisë, në vitet e 90-ta, shumë shqiptarë të Kosovës ishin të mendimit se shkëputja e Sllovenisë, Maqedonisë, Kroacisë dhe Bosnjës ishin shenjë se rezistenca pasive ka dështuar dhe mbështetja e tyre u rreshtua përkrah Ushtrisë Çlirimtare të Kosovës.
Lufta guerile e kësaj organizate në vitet 1998 dhe 1999 dhe përgjigjja brutale e ushtrisë së Millosheviqit, tërhoqi NATO-n në luftën e parë humanitare të kësaj organizate, për të dëbuar nga Kosova forcat serbe, të cilat akuzoheshin për spastrim etnik të shqiptarëve.
Konflikti errësoi doktrinën e rezistencës pasive të Ibrahim Rugovës. Por, pasi që u zgjodh dy herë president në zgjedhjet e viteve të 90-ta, të cilat nuk u njohën jashtë kufijve malorë të Kosovës, ai sërish bëri një kërcim, duke ia arritur që të zgjedhet dy herë me radhë për kryetar të përkohshëm të Kosovës.
Në dukje të parë i dridhshëm, por tejet dashamirës, me shallin e tij karakteristik të mëndafshit në qafë, ai konsiderohet si figurë atësore nga shumë shqiptarë të Kosovës.
"Procesi i pavarësimit të Kosovës, i cili është inicuar nga Rugova, do të kompletohet nga ai, madje edhe nëse ka dhjetë kancera", tha pensionisti kosovar Ali Vitia.
Sëmundja e Rugovës paraqet goditjen e dytë për shqiptarët e Kosovës, të cilët "humbën" kryeministrin e tyre në mars të këtij viti, kur ish-udhëheqësi i kryengritësve shqiptarë, Ramush Haradinaj, iu dorëzua Tribunalit të OKB-së që zhvillon hetime për krimet e luftës në ish-Jugosllavi, me seli në Hagë të Holandës.


Pjesëtarët e SHK-së shprehin pikëllim dhe solidaritet me Presidentin Rugova

Prishtinë, 6 shtaror 2005 - Kolonel Sheremet Ahmeti, në emër të Shërbimit Policor të Kosovës, i ka dërguar Presidentit Rugova një mesazh në të cilin shprehet pikëllimi dhe solidariteti nga të gjithë pjesëtarët e Shërbimit Policor të Kosovës.
"Duke festuar sot gjashtëvjetorin e themelimit të organizatës sonë, si dhe pavarësimin e Regjionit të Prishtinës, ne pjesëtarët e Shërbimit Policor të Kosovës, qëndrojmë të bashkuar dhe dinjitoz në solidarizimin tonë me personalietin Tuaj më të ndritshme.

Ju siguroj se Shërbimi Policor i Kosovës do të vazhdojë me vendosmëri në përmbushjen e detyrave të saj për të përkrahur në mënyrë të plotë misionin dhe synimet tuaja madhore për Kosovën tonë të dashur.
Jemi të vetëdijshëm për rolin Tuaj shumë të rëndësishëm në këto momente që po kalon Kosova, ndaj, roli i Juaj si president dhe si personalitet është i pamshmangshëm për fazën përfundimtare të përcaktimit të statusit të Kosovës".


A.Xhaferi: Mesazhi juaj transparent drejtuar qytetarëve të Kosovës nga preku shumë

Tetovë, 6 shtator 2005 - Kryetari i PDSH Arbër Xhaferi i ka dërguar Presidentit Rugova një telegram në të cilin i shpreh urimin për shërim sa më të shpejtë.
"Me brengë të madhe e morëm lajmi për gjendjen Tuaj të rënduar shëndetësore. Mesazhi juaj transparent drejtuar qytetarëve të Kosovës nga preku shumë, por njëherësh na inkurajoi optimizmi Juaj.

Duke iu bashkuar optimizmit dhe përkushtimit Tuaj që edhe në këtë rrethana të jepni kontributin Tuaj të çmueshëm për pavarësinë e Kosovës, Ju uroj, në emrin tim dhe të PDSH-së shërim sa më të shpejtë".


"Zëri": Roli i Presidentit të Kosovës në çështjen madhore të statusit të vendit është i pazëvendësueshëm

Prishtinë, 6 shtator 2005 - Në numrin e sotëm gazeta "Zëri" botoi një editorial pas fjalës së Presidentit Rugova drejtuar qytetarëve të Kosovës.
Dr.Ibrahim Rugova, Presidenti i Kosovës në fjalën e tij drejtuar qytetarëve të Kosovës këtë të hënë, më 5 shtator, qartësoi gjendjen e tij shënetësore duke iu dhënë kështu fund spekulimeve dhe thashethemeve të shumta të ditëve të fundit.

Kryepolitikani i Kosovës që nga fundvitet e tetëdhjeta, me t'u kthyer nga Qendra mjekësore ushtarake amerikane në Landshtul të Gjermanisë, ku qëndroi për t'i kryer analizat mjekësore, bëri me dije që rezultatet e këtyre ekzaminimeve kanë konstatuar që ai vuan nga një lloj i kancerit të lokalizuar të mushkërive.

Presidenti Rugova theksoi poashtu që shpreson që me ndihmën e Zotit do të përballojë edhe këtë betejë, që do të shërohet dhe që "do të vazhdojmë së bashku dhe më të fuqishëm në njohjen e pavarësisë së vendit tonë - Kosovës, sa më shpejtë.
Sëmundja e Presidentit Rugova ka ardhur në çastin më të keq të mundshëm për rrjedhat politike në Kosovë, pikërisht në javët kur pritet të inicohet procesi i zgjidhjes së statusit politik të kosovës. Tashmë, siç u pa edhe nga takimi jozyrtar i fundjavës i diplomatëve të shteteve anëtare të Bashkimit Evropian, qëndrimi që së shpejti do të fillohet me adresimin e statusit të Kosovës, ka përkrahjen e plotë në Perëndim.

Pengesa e vetme që duhet të kapërcehet në ditët e ardhshme është Raporti i ambasadorit Kai Aide, Emisarit Special për evaluimin e standardeve. Ndërsa, prononcimet e tij të ditëve të mbrama, duke përfshirë këtu edhe fjalët e Aides me të mbërritur në Aeroportin e Prishtinës, këtë të diel (më 4 shtator), shquajnë më shumë përparimin se sa të metat në përmbushjen e agjendës parastatusore prej kosovarëve.
Prononcimi i presidentit Rugova, pos tjerash, pararaljmëroi që ai do të përpiqet të dyzojë ushtrimin e postit të presidentit të Kosovës me vazhdimin e trajtimit mjekësor, fakt ky shumë i rëndësishëm për mbarëvajtjen e procesit të zgjidhjes së statusit të Kosovës. Roli i presidentit të Kosovës në çështjen madhore të statusit të vendit është i pazëvendësueshëm.

Për këtë shkak, do të ishte me rëndësi të madhe nëse në javët e ardhshme, edhe para se të kuptohet se çfarë ka rekomanduar ambasadori Aide në Raportin e tij, presidenti Rugova do t'u prijë përpjekjeve për të siguruar një konensus organizativ dhe konceptual të politikanëve kryesorë të vendit, i cili pastaj do të materializohej me negociata të suksesshme me ndërmjetësuesit ndërkombëtarë që pritet të caktohen në muajin tetor.
Do të ketë me siguri propozime konfidenciale, në mos edhe publike, të Beogradit zyrtar, drejtuar kryeqendrave perëndimore që sëmundja e dr.Rugovës të shfrytëzohet si pretekst për shtyrje pë disa muaj të gjithë procesit të zbardhjes së statusit të Kosovës.

Njëkohësisht, do të ketë edhe diplomatë perëndimorë që do të vlerësojnë të kundërtën: Që edhe për shkak të problemeve shëndetësore të presidentit Rugova, duhet të përshpejtohen përgatitjet ndërkombëtare për inicimin e procesit që pretendon të rrumbullaksohet në vitin e ardhshëm.

Sidoqoftë, edhe në vijim të rrethanave të të vështirësuara politike në Kosovë të cilat janë konsekuencë e sëmundjes së dr.Rugovës, në ditët e ardhshme duhet të shpresojmë që do të jemi dëshmitarë të një vendosmërie politike të të gjithë politikanëve të rëndësishëm të vendit për të qartësuar strategjinë e përbashkët për statusin e Kosovës".