Befasi të Berishës apo ministra të papërshtatshëm

OPINIONE

Befasi të Berishës apo ministra të papërshtatshëm

07 shtator 2005 / TN
Çerçiz Loloçi

Periudha e gjatë e dhënies së përfundimeve të zgjedhjeve parlamentare të tre korrikut, ka qenë njëheri edhe një kohë tepër e mjaftueshme për liderin demokrat në ndërtimin e kabinetit qeveritar.

Me një shpejtësi maratonë dhe për të fituar kohën që u humb nga procesi i zvargur i situatës postzgjedhore, Berisha ka bërë të gjitha veprimet që duhet të bëjë një kryeministër duke paraqitur publikisht kabinetin e ri por edhe duke përfunduar edhe detyrimet ligjore me institucionin e presidencës.

Dhe pikërisht ky kabinet qeveritar ka edhe befasitë e veta. Ndër të parët që ka kontestuar qeverinë e re Berisha, ka qenë shkrimtariu i njohur Ismail Kadare.

Pak para përfundimit të zgjedhjeve por edhe dje në të përditshmen “Shekulli”, Kadare e ka quajtur të papërshtatshëm kandidaturën e ministrit të Jashtëm.

Zëra të tjerë i konsiderojnë gjithashtu të papërshtatshëm kandidaturat e ministrit të Bujqësisë, të ministrit të Kulturës dhe të Turizmit, të Drejtësisë dhe të Integrimit.

Nga pjesa cilësore dhe me “jetë partie” po aq sa Zoti Berisha, janë lënë jashtë qeverisë së re nënkryetari Bamir Topi, nuk ka pushtet ekzekutiv edhe një figurë qëndrore si zonja Jozefina Topalli, ndërsa personalitete të tjera janë anashkaluar pa ndonjë arsye të spikatur.

Nga ish KOP-i i përfolur janë mënjanuar prof. Ylli Pango, rivalizuesi i liderit socialist, urbanisti Besnik Aliaj dhe teknicieni Neritan Sejamini, ndërsa nuk mendohet se është në postin e domosdoshëm Lulëzim Basha. Pakënaqësi janë shprehur edhe për postet e aleatëve ku disa kapacitete mund të jepnin më shumë në sektorë të tjerë dhe jo në ato që i ka parapëlqyer Berisha.

Natyrisht qeveria e re është pronë ekskluzive e forcës politikë që fiton mazhorancën në zgjedhjet parlamentare dhe Partia Demokratike e ka legjitime këtë të drejtë. Po aq të drejtë ka edhe dr. Berisha si kryeministër që të zgjedhë vetë ekipin me të cilin do të drejtojë vendin për një mandat katërvjeçar.

Asnjë qeveri e re, edhe në një vend shumë të emancipuar dhe me standarde, nuk mund të kënaqë maksimalisht dëshirat e anëtarësisë së partisë. Edhe një qeveri më cilësore se kjo që ka paraqitur kryeministri Berisha, do të kishte patjetër kontestet e veta si dhe pakënaqësitë që vijnë nga të gjitha anët. Por ajo që të bën përshtypje është se edhe kreu demokrat ka rënë disi nën sidromin e emërimeve socialiste.

Vetëm në Shqipëri mund të gjesh emërime të tilla spektakolare (si kur është në pushtet e majta ashtu edhe kur rivjen me mundim e djathta) që, individë jashtë profesionit bazë, të kenë guximin të drejtojnë dikastere që nuk kanë kurrfarë lidhje me aftësitë dhe personalitetin e tyre.

Lideri socialist Fatos Nano, për inat të kundërshtarit politik Berisha, arrinte të bënte ministra edhe persona të papërshtashmën, individë që nuk gëzonin reputacion edhe brenda anëtarësisë së majtë. Nga ky defekt qeverisës duket se nuk ka shpëtuar as kryeministri Berisha që, për disa dikastere, të caktojë personat e papërshtatshëm.

Kjo vjen sepse as Nano si ish kreu i qeverisë dhe as Berisha si kreu i qeverisë aktuale, nuk marrin në konsideratë faktin se kushdo shqiptar kërkon një qeverisje më të mirë, dëshiron të mos përsëriten më gabimet e së shkuarës dhe që të gjithë ta respektojnë si kryeministër të tyre.