Flet shkrimtari i madh Ismail Kadare, menjëherë pas shpalljes zyrtare të listës së qeverisë

Flet shkrimtari i madh Ismail Kadare, menjëherë pas shpalljes zyrtare të listës së qeverisë

6 shtator 2005 / TN

Kadare: “Ja çfarë mendoj për qeverinë Berisha”

"Gazeta Shekulli"

TIRANE – Shkrimtari i madh shqiptar Ismail Kadare, shprehet se kandidatura e ministrit të Jashtëm, Besnik Mustafaj, në qeverinë “Berisha”, është e papërshtatshme. Duke komentuar kabinetin e ri qeveritar, Kadare shprehet se nuk është shmangur tribalizmi. Lidhur me kandidaturën e Mustafajt, Kadare shprehet se ai nuk mund të garantojë integrimin e Shqipërisë në strukturat atlantiste.

A do t’i uronit punë të mbarë qeverisë së re që porsa u shpall?

Natyrisht. Madje me gjithë zemër. S’kam asnjë arsye për të kundërtën. Dua të them se edhe në qoftë se kam vërejtje, jam krejtësisht kundër atyre që mezi çpresin të nisin fushatë denigruese kundër ekipit të ri qeverisës dhe me zell kërkojnë mungesat dhe të këqijat në çdo gjë e për gjithçka.

Para pak kohe në dy intervista tuaja i keni bërë një sugjerim kryeministrit të ardhshëm, për të shmangur tribalizmin në caktimin e posteve kyçe në qeverinë e tij. A është marrë parasysh ky sugjerim?
Jo, nuk është marrë parasysh. Më saktë, kam përshtypjen se është bërë e kundërta. Kjo është histori e vjetër në këtë vend. Ka shpesh ankesa për mospjesëmarrjen e intelektualëve të njohur në çështjet publike. Por, kur vjen puna që këta të fundit angazhohen në to, zakonisht nuk dëgjohen.

A shkakton kjo gjë një ndjenjë negative te ju?

Nga njëra anë po. Por nga ana tjetër, kur nuk dëgjohet një këshillë që ka lidhje me gjërat publike, ato që quhen “res publicae”, kjo, përpara se të jetë problem i atij që parashtron këshillën, është problem i atij që nuk e dëgjon atë. Këshilla ime lidhej me shmangien e tribalizmit, tipar që s’ka asgjë të përbashkët me qytetërimin demokratik e europian, ndaj dhe refuzohet në mënyrë të prerë prej këtij.

Me sa është kuptuar, ka qenë fjala për postin e ministrit të Jashtëm, që ka një rol kyç për afrimin e Shqipërisë me Evropën dhe NATO-n, apo jo?

Është e saktë. Ka vite që të dy krahët e politikës shqiptare e afishojnë si merakun e tyre kryesor çështjen e integrimit në Evropë dhe në Aleancën Atlantike. Flasin për të me përkushtim, madje me mallëngjim prekës.
Nuk jam i sigurt se është ashtu. Në qoftë se vërtet do të preokupoheshin kaq shumë, do të ishin më seriozë në zgjedhjen e këtij posti kyç.

E quani të papërshtatshme zgjedhjen e ministrit të Jashtëm?

Pikërisht. Nga kandidaturat që u përmendën, mendoj se kjo është një ndër më të papërshtatshmet.
Edhe kjo është një fatkeqësi e njohur e Shqipërisë. Në radhën e ministrave të Jashtëm të papërshtatshëm, madje ndonjëherë qesharakë, u shtua një rast tjetër.
Për një vend të vogël problematik si Shqipëria, në kushtet për të cilat folëm, dimensioni qytetar, evropianist e atlantist i ministrit të Jashtëm, është një ndër tiparet e domosdoshme. Për të mos folur për të tjerat.

Ka lidhje me këto deklarata e tij e djeshme në shtyp?

Deklarata e tij është mëse shqetësuese. Në të përsëritet mendimi se Mustafaj qenka në radhë të parë shkrimtar, (unë jam shkrimtar që merrem edhe me politikë) duke lënë të kuptohet qartë se politika, pra posti i lartë që po merr, është diçka e dorës së dytë.

Kjo deklaratë e përsëritur shumë herë prej tij, përveç që është një reklamë e pahijshme për veten, është shprehje që dëshmon papërgjegjshmëri dhe mungesë të plotë të konceptit qytetar për shtetin. Sipas saj, më tepër se drejtimi i diplomacisë shqiptare, paskan prioritet librat e tij. Le ta themi pa shumë diplomaci se shkrimtarë të nivelit të Mustafajt Shqipëria ka mjaft, kurse posti i ministrit të Jashtëm është një dhe jashtëzakonisht i rëndësishëm për vendin.

Kuptohet që nuk jeni optimist për afatet e bisedimeve për integrim në Evropë. Do të donit që ky parashikim i juaj të dilte?

Kurrsesi. Do të doja që të isha i gabuar. Madje po shtoj, se në qoftë se pas gjashtë muajsh do të jetë bërë ndonjë hap serioz drejt Evropës, me kënaqësi do të kërkoja ndjesë për këtë parashikim jo të gëzueshëm.
Besoj se në rast të kundërt, kam të drejtë të pres që qeveria e sotme t’i kërkojë ndjesë qytetarëve shqiptarë.

Pyetje e fundit, për opozitën. Si e mendoni rolin e saj?

Mendimi im mbetet i pandryshueshëm. Do apo nuk do opozita është pjesë e qeverisjes së një vendi. Pjesë e sukseseve po aq sa e dështimeve. Është fjala për një opozitë të denjë, thënë ndryshe, të vërtetë. Tjetra, ajo që shpesh kemi parë këto 15 vjet, nuk është veçse histori e vjetër ballkanase, me daulle e me kaçakë, që s’ka asgjë të përbashkët me rendin republikan.