Luani që ushtron nën ritmin e muzikës shqipe

Kur qëllimi e mposht lodhjen

06 shtator 2005 / TN

Nga Çerkin BYTYÇI

ROTTWEIL, (Gjermani) shtator 2005

Luan Krasniqi, boksieri shqiptar me shtetësi gjermane, është emri më i përfolur këto ditë në Gjermani dhe më gjerë. Më 28 shtator të këtij viti, në sallën impoznate Color Line Arena në Hamburg, me 16 mijë vende për shikuesit, do ti kryqëzoj dorëzat për titullin e kampionit botëror në boks me Lamon Browsterin amerikan.

Do të jet ky meç më i rëndësishmi në karrierën e tij që do ti mundësoj realizimin e ëndërrës jetësore. I vetëdijshëm për këtë, me zell e vullnet të madh i është çasur përgatitjeve për të qenë në nivelin që e kërkon dueli i rradhës, për të kënaqur shikuesit dhe pritjen e Gjarmanisë, vendit shtetësinë e të cilit e mban por edhe të trevave shqiptare nga e ka prejardhjen.

Ushtrimet aktualisht Luani i zhvillon në Gym Sallën e tij në Rottweil. Në te, përkundër punës intensive, vërehet rregull. Çdo gjë është aty ku duhet. Paisjet, rekuizitat, dorëzat. Edhe ringu i improvizuar.

Nga pasqyrat e mëdha që kanë mbuluar disa anë të mureve të sallës, shihet më së miri çdo lëvizje e bokserit dhe ofrohet mundësia për të analizuar në detaje çdo pozicion, secila lëvizje e tij, e grushtave që priten të jenë, si gjithnjë deri më tash të mrekullueshëm edhe në ringun e Hamburgut. Ndërkaq, fotoset, plakatat e meqeve të deritashme dhe mirënjohjet e shumta që pasqyrojnë sukseset e tij tejet të mëdha, sallën e ushtrimeve e bëjnë ti ngjaj një muzeu personal të bokserit të madh.


Për dy ditë u shiten një mijë bileta

Dueli i ardhshëm i Luan Krasniqit me Lamon Browsterin amerikan, është shpallur padyshim “Luftë e vitit”. Mu për këtë interesimi i sportdashësve është tejet i madh. Në sallën impoznate Color Line Arena në Hamburg me 16 mijë vende për shikuesit, do të jet më 28 shtator, siç thuhet një vapë e madhe-luftë interesante fizike për aktorët dhe luftë nervash për shikuesit.

Për këtë meq me rëndësi të madhe, biletat kanë filluar të shiten që para dy javësh. Vetëm në dy ditët e para, u shitën një mijë sosh që dëshmon për interesimin që s`mbahet mend ndojëherë në Gjermani për duelet e boksit, lajmëroi Christoph Rybarczyk, përfaësues i Universum-Boksit nga Hamburgu.

Ndërkaq, nga Rottweili, Schwarzwaldi dhe Baden Württembergu, ku jeton Luani, që tash planifikohen trena dhe autobus të jashtzakonshëm të cilët në Hamburg do të transportojnë tifosët e flaktë të boksit. Kuptohet se bashkatdhetarët, po organizohen të udhëtojnë edhe nga Zvicra, Franca e disa shtete të tjera.


Në portin e Hamburgut-plakati i i meçit të ardhshëm

Ndërkaq, Hamburgu, këto ditë jeton me atmosferën e meçit të 28 shtatorit. Në këtë ditë, kur shënohet 100-vjetori i lindjes së legjendës së boksit Max Schmeling, zhvillohet meçi historik, dueli vendimtar për mundësinë e kthimit të titullit të kampionit botëror në boks nga Luan Krasniqi, shqiptari junikas i albeve gjermane.

Ndaj, të gjitha përgatitjet po zhvillohen si duhet. Vizitorëve të shumtë të këtij metropoli, në portin e këtushëm gjithsesi u bie në sy plakati i madh që paralajmëron manifestimin sportiv më të rëndësishmin të zhvilluar deri më tash. Në te shihen aktorët e tij-bokseri shqiptar me shtetësi gjermane Luan Krasniqi dhe amerikani Lemon Browster, bartës aktual i titullit të kampionit botëror.

Që të dy janë paraqitur ashtu si edhe janë dëshmuar me rezultatin sportiv-impozant dhe me dëshirën për të ngadhnjyer. Por se cili do të jet më i miri, mbetet të presim 28 shtatorin. Për Luanin deri atë ditë mbetet të bëhet një punë e mundimshme, angazhim dhe diciplinë e madhe. Në Gym-sallën e Rottweilit, Luani ushtron dhe ushtron. Është i pathyeshëm dhe me bindjen se do të triumfoj gjithsesi.


Ushtrime intensive nën drejtimin e Tortsten Schmitz

Në ditën kur e vizituam në ushtrimet që zhvilloheshin në Gym Sallën në Rottweil, u bindëm se mbretëronte atmosferë e punës si në hallë prodhimi. Djersët i shkonin rrëkaj dhe nuk i pengonin fare për të zbatuar komandën e Torsten Schmitz, trajnerit vetëmohues i cili gjithsesi dëshiron ta sheh Luanin pas Max Schmelingut, të dytin në Gjermani me titullin e më të mirit të botës. Ritmin e ushtrimeve të këtij bokseri të talentuar e mbanin tingujt e një kënge shqipe që vinte nga radiokasetofoni i vendosur në dritaren e sallës. Me këtë muzikë dinamike, ushtronte njëkohësisht edhe bokserja e njohur gjermane Regina Halmich, e cila, si kliente e trajnerit Schmitz, ndodhet poashtu në bashkushtrime me Luanin.

- Këtu i kam të gjitha kushtet idelae për përgatitje sa më të mirë për duelin më të rëndësishëm të karrierës sime, thot Luani.

Në muret e sallës së ushtrimeve, lexojmë artikujt nga gazetat e ndryshme të cilët rikujtojnë sukseset e mëdha të këtij 34-vjeçari. Përballë, ndodhet i vendosur posteri i mikut të tij të madh Lenox Luis, kampionit botëror, i cili sikur e motivon dhe e porositë të mos ndalet, të ec mëtej, të mos pushoj, për tu përgatitur sa më mirë. Luani është i vetëdijshëm se vetëm me punë intensive mund ti përballet Lamon Brewsterit të fortë. Në sandukun e vogël të ndihmës së parë vërejmë mbishkrimin e ngjitur me një thënje që na bën përshtypje:

“ Kush sot shmanget, me dëshirën për të qenë më i miri, nesër nuk është më ai që dëshiron”. Për Luanin, kjo është moto që e respekton.


Përkundër presionit mbetem ai që jam-nuk i përkulem lodhjes

- Presioni më shtohet nga dita në ditë, por unë mbetem ai që jam. Nuk përkulem nga lodhja dhe intensiteti i ushtrimeve. Dëshira dhe qëllimi për të dal fitimtar janë mbi të gjitha, më thot Luani i djersitur posa mbaroi ushtrimet e ditës. – Si të duket kjo, më thot. Mua më bëhet zemra mal që shoh kaq të avansuar bashkëkombasin, drejt të cilit, në këto çaste janë drejtuar objektivat e dhjetra kamerave dhe fotoaparateve të medijave gjermane që janë ftuar nga Boks Universumi dhe ZDF.

Është kjo orë e takimit me përfaqësuesit e mediave për të cilat Luani ka respekt sepse me objektivitet pasqyrojnë përditshmërinë e tij. Është orë historike dhe secili nga fotoreporterët e kamermanët mundohet të zë sa më shumë detaje nga këto çaste të ushtrimeve të mundimshme të këtij personaliteti të madh, drejt të cilit janë orientuar sytë dhe vemendja e miliona gjermanëve dhe shqiptarëve, me dëshirën për ta patur Luanin kampion të ardhshëm botëror.

- Regina, tashti ti e ke rradhën!, i drejtohet Luani koleges Halmich e cila poashtu ndodhet në përgatitje për meqin e saj të rradhës. Me durim priste Regina që Luani të mbaroj programin që u realizua nën dirigjimin e Torsten Schmitz, për të filluar pastaj ajo me të njejtin intensitet.


Përgjigjet, humori, miqtë dhe talenti i sportistit poliglot

Luani pastaj përgjigjej në pyetjet e shumta të gazetarëve që kishin mbushur sallën dhe shpesh shpërthente gazi nga humori i tij i herëpashershëm. Ç’forcë tregon ai pas gjithë kësaj lodhjeje. Në derë u duk edhe shoku e miku i sinqert i tij Mario, pronari i restorantit “Delfino” që përgatitë ushqimin e këtyre ditëve për te, me të cilin Luani filloi komunikimin në gjuhën italiane.

Më parë, me mua fliste shqip, kurse në pyetjen e një gazetari për takimin me Muhamed Aliun, e vazhdoi në anglishten e rrjedhshme. Rrëfente pastaj edhe për studimet që i bën meçeve të Muhamed Aliut sepse i çmon lëvizjet e tij dhe dëshiron të përfitoj diç nga ato. Edhe kësaj here erdhi në shprehje dhe u dëshmua vlera e talentit të tij gjuhësor, e këtij sportisti poliglot. Mëse 50 gazetar, fotoreporter e kamerman ia kishin gjithsesi lakmi kësaj shkathtësie të çmueshme.

- Luani ka një çerdhe të cilën e çmon me zemër-Rottweilin, thot Volker Grill, i cili është kurdoher pran tij, në përgatitje dhe në ring. Pranë tij ishte dhe mbeti në ditët e suksesit dhe ato që thuhet se ishin të vështira. Ndaj Luani edhe e çmon sepse ky nuk ishte si disa të tjerë që atëherë kur kishte më së shumti nevoj, siç thot, ia kthyen shpinën.

Sot, në këtë ditë të ushtrimeve të vrullshme para kamerave dhe syve të botës, Wolker i jep forcë, e motivon që grushtat e tij të jenë edhe më të fuqishëm. – Këtu tok me mua janë kurdoherë edhe Agimi, vëllau im dhe bokseri e shoku im Firat Arsllan, të cilët nuk kursejnë asgjë që ushtrimet të zhvillohen mbarë e sipas planit, tregon Luani dhe i falënderon të gjithë që në forma të ndryshme e mbështesin për meçin e ardhshëm.

Meqë fanula i ishte bërë qullë nga djersët, Luani e ndërpret për pak çaste rrëfimin dhe e zëvendëson atë me një tjetër, nga vitrina, që kishte ngjyrë kafe të qeltë.Ç’koecidencë. Nga shpejtësia e mori mu atë që e ruante si suvenir në kujtim të turneut të vitit 1994, zhvilluar në boks në qytetin Bayroth, në mes të SHBA dhe Gjermanisë. Ishte ky turnir nga u kthye fitimtar. E fitoi atëherë edhe Browsterin, me të cilin tashti do ti kryqëzoj dorëzat për titullin e më të mirit të botës. Dhe kur njëri nga gazetarët, pasi lexoi tekstin e këtij turniri, në fanulë të veshur, e pyeti për duelin e atëhershëm me Browsterin, Luani u përgjigjë: - Ishte luftë interesante që më kujtohet mirë.

-A do të jetë interesante edhe lufta e ardhëshme, pason pyetja tjetër? – Gjithsesi dhe unë sërish do të dal fitimtar, u shpreh ky bokser i spikatur.

Ndërkaq, Torsten Schmitz, i pyetur për këtë, duke mos e mshehur kënaqësinë se e ka rastin të punoj me këtë bokser të mrekullueshëm, tha: Luani duhet të boksoj si në luftën me Witakerin, të vë në funksion lëvizjet e këmbëve dhe taktikën e të djathtës, dhe padyshim do të jet kampion.


Premtimi i dhënë do të bëhet realitet

Meqi i ardhshëm për titullin e kampionit botëror në boks, zhvillohet në Hamburg mu në ditën e 100-vjetorit të lindjes së legjendës së boksit dhe kampionit të parë nga Gjermania Max Schmeling. Për këtë jubile dhe në përkujtim të Schmelingut, ditë më parë në Gjermani u dha në qarkullim pulla postale me portretin e tij.Tirazhi prej 12,5 milion pullave postare e nderon këtë legjendë prej sportisti të spikatur.

Në solemnitetin e rastit mori pjesë edhe Luani i cili në ditlindjen e 100 të legjendës do të ketë rastin për tu bërë kampion i dytë nga Gjermania në boks. Kjo ishte dëshirë e madhe e Schmelingut për ta parë Luanin të tillë. Premtimi dhënë në takimin me të, Luani si duket do ta bëjë realitet dhe kështu do ta rikthej titullin e kampionit të botës në Gjermani pas plot 75-vjetësh.

Si do që të jetë, Luan Krasniqi, edhe pas këtij meqi do të vazhdoj për të qenë më i mirë. Sepse moto të përhershme e ka atë mbishkrim që e mban në sallën e ushtrimeve: “ Kush sot shmanget, me dëshirën për të qenë më i miri, nesër nuk është më ai që dëshiron”.