R.Ismajli: Nëna Tereze u shërbeu njerëzve duke përhapur idenë e dinjitetit e respektit për veten dhe për ta

R. Ismajli: Nëna Tereze u shërbeu njerëzve duke përhapur idenë e dinjitetit e respektit për veten dhe për ta

Prishtinë, 5 shtator 2005 /TN /QIK - Me rastin e 95-vjetorit të lindjes së Nënës Tereze, Kuvendi i Kosovës sot mbajti një seancë solemne kushtuar jetës dhe veprës së saj. Për figurën dhe jetën e humanistes së madhe shqiptare Nëna Tereze, para deputetëve folën kryetari i Akademisë së Shkencave dhe Arteve të Kosovës, Rexhep Ismaili dhe veprimtari e biografi i Nënës Tereze, dom Lush Gjergji.
"E lindur Gonxhe Bojaxhiu Nënë Tereze, humanistja e madhe e shekullit 20 të kontrasteve, të përparimit të madh por edhe të brutaliteteve, personalitet krejtësisht i veçantë, me të gjallë të saj mori mirënjohjet më të mëdha të njerëzimit që nga India e deri në Shtetet e Bashkuara të Amerikës, që nga Kuba e deri në Shqipëri.

Humanizmi i saj në vepër, konkret dhe në mbrojtje të dinjitetit njerëzor, në mbrojtje të jetës, u vlerësua lart edhe me Çmimin Nobel për Paqe më 1979", tha në fillim të fjalës së tij akademik Rexhep Ismajli.
Nënë Tereze, tha në vazhdim akad.Ismajli, për të gjallë të saj dhe më vonë u cilësua luftëtare e madhe e stolisur me tiparet e bashkëdhimbjes, të besimit, të dashurisë, të vetëbesimit, të persistencës, të guximit.

U shërbeu njerëzve duke përhapur idenë e dinjitetit të tyre, idenë e respektit për veten dhe për ta; iu afrua atyre që kishte mundur jeta, luftoi kundër përjashtimit, kundër veçimit të njerëzve. Më tutje ai tha se humanizmi i saj ishte konkret dhe dëshmohej në jetë dhe në angazhimin jetësor e frymëgjatë e mbi të gjitha me tolerancën.
Duke për folur për jetën e Nënës Tereze, Akad.Ismajli tha se Gonxhe Bojaxhiu është cituar të ketë thënë për veten: "Me gjak jam shqiptare. Me shtetësi indase. Me besim katolike. Me vokacion i përkas botës. Me zemër i përkas tërësisht zemrës së Jezuit".
E lindur në Shkup më 1910 në një familje shqiptare nga Prizreni, e rritur në ato mjedise dhe me ato mendësi, Gonxhe Bojaxhiu qe brumosur me shumë nga vlerat që, në zhvillimet e saj të mëtejme, në rrugët e formimit dhe të veprimtarisë rruzullore, do të bëhen tipare të personalitetit e pse jo edhe të mënyrës së realizimit të çështjeve të ndjekura, duke tejçuar vlerat rruzullore të mjedisit të saj nëpër gjithë botën.
"Vlerat si toleranca njerëzore, fetare, etnike e tjetër, që lidhen me dashurinë për njeriun dhe Zotin, burimet apo rezonancat mund t'i kenë, së paku për një pjesë, edhe në ato që mori ajo me vete nga vendi e populli i vet i përshtatur tashmë nëpër shekuj me përvoja bashkëjetese me të tjerët, me më shumë besime e etni, me tradita të gjata të vlerësimit dhe të respektit për tjetrin të ndryshëm dhe të ndryshmen", tha në fjalën e tij kryetari i ASHAK.
Akad. Ismajli përkujtoi se më 1990, kur Kosova po kalonte kohë të vështira, simboli i bashkëvuajtjes, i dashurisë, i solidaritetit, laureatja e Çmimit Nobel për paqe, për vlerat që sublimonte dhe simbolizonte jeta dhe vepra e saj, u zgjodh anëtare nderi e Akademisë së Shkencave dhe të Arteve të Kosovës. Kjo Akademi, tha ai, ndjehet e privilegjuar për këtë fakt, ashtu siç ndjehen shqiptarët krenarë dhe të privilegjuar për faktin që kanë pasur mundësi t'i jepnin botës një figurë të shenjtë.
Po ashtu ai përkujtoi se në vitin 2003 Nëna Tereze u lumturua nga Papa Gjon Pali II, i cili po ashtu ka luajtur një rol me peshë të veçantë në botën e pjesës II të shekullit XX.
Akad.Ismajli tha në vazhdim se humanizmi i Nënës Tereze nuk është abstrakt, duke cituar në mendim të saj se "gjërat e vogla janë vërtet të vogla, por të besosh në gjërat e vogla është gjë e madhe". "Vlerat si solidariteti, humanizmi, synimi i lirisë dhe i paqes, dashuria dhe kërkesa për dinjitet e respekt njerëzor kanë mundur të hetohen në çdo rast dhe vijimisht në ato që ndodhnin në shoqërinë kosovare, megjithë vështirësitë jashtëzakonisht të mëdha që e kishin kapluar vendin.

Përtej derdhjes së pashembullt të urrejtjes militare e paramilitare, policore e tjetër të Serbisë mbi këtë vend të vogël, vështirësi këto që u superuan me qëndresën vendore dhe me ndihmën e solidaritetin shumë të çmuar ndërkombëtar, megjithë vështirësitë jo të vogla të rindërtimit të vendit, populli i Kosovës vazhdon të ushqejë vlerat e solidaritetit, të humanizmit, të bashkëjetesës me fqinjtë", nënvizoi akad.Ismajli, duke shprehur besimin se "vlera të tilla synohen në institucionet e dala nga vota e lirë e popullit të Kosovës".
Kryeparlamentari Nexhat Daci tha se ajo që Nënën Tereze e veçon në veprimtarinë e saj është se ndihma e angazhimi i saj ishte i përhershëm dhe i pakursyer deri në sakrificë, që duke u nisur nga parimet kristiane të mëshirës, të solidaritetit dhe të ndihmës ndërmjet njerëzve, që janë parime edhe të gjitha besimeve tjera, e që gjithashtu janë parime bazë të civilizimit të sotëm.
Nëna Tereze në rrugëtimin e saj, tha Daci, u ngrit në simbol të bamirësisë e përkushtimin në gjithë botën. "Nderimi i Nënës Terezë në këtë Kuvend të popullit të Kosovës, është nderim i vetë Kuvendit, është nderim i vetë neve që e përkujtojmë sot e do ta përkujtojmë gjithmonë, këtë Bijë tonën dhe të civilizimit, duke u vënë emrin e saj, rrugëve shesheve, shkollave dhe institucioneve të tjera, duke nderuar kështu veprën e saj e cila është kthim kah njeriu dhe kah njerëzorja, është kthim në cilësitë e vetitë më të mira si individ, si popull dhe si civilizim", tha Nexhat Daci.
Në këtë mbledhje solemne foli edhe dom Lush Gjergji, biografi më i njohur i Nënës Tereze.