Solana dhe Ollbrajt i urojnë shërim të shpejtë Presidentit Rugova

Solana dhe Ollbrajt i urojnë shërim të shpejtë Presidentit Rugova

3 shtator 2005 /TN Prishtinë, 2 shtator 2005 /QIK - Përfaqësuesi i Lartë për Siguri dhe Politikë të Jashtme të BE së Havier Solana nëpërmjet një mesazhi drejtuar Presidentit Ibrahim Rugova, pasi i shpreh shqetësimin e tij për problemet shëndetësore, me dëshirat e sinqerta uron për shërim të shpejtë dhe të plotë.
"E kam marrë me shqetësim njoftimin për problemet tuaja të tanishme shëndetësore. Më lejoni t'ju shpreh dëshirat e mia të sinqerta për shërim të shpejtë dhe të plotë.
Kontributi juaj për të ardhmen e Kosovës dhe popullit të saj është mëse jetik, sidomos në dritë të kohëve sfiduese që kemi përpara. Unë, prandaj, shpresoj se ju do të mund të ktheheni së shpejti në Prishtinë dhe t'u ktheheni punëve tuaja të rëndësishme.
Me mendime jam me ju gjatë këtyre ditëve të vështira", shkruan zoti Solana.
Ndërkaq në një mesazh nga ish-sekretarja amerikane e Shtetit Medlin Olbrajt, e cila tani drejton Institutit Demokratik Kombëtar (NDI) thuhet se është e pikëlluar thellë me të mësuar lajmin për sëmundjen e Presidentit Rugova.
"Në emër të Institutit Demokratik Kombëtar (NDI), kryesueses së tij Madeleine K. Albright, presidentit Ken Wollack (Uollak) dhe drejtorit rajonal Robert Benjamin (Benxhamin), dhe veçanërisht në emër të stafit të NDI së në Kosovë, do të doja t'ju shpreh dëshirat tona më të mira për shërimin tuaj të shpejtë.
Shpresojmë se do të ktheheni së shpejti në Kosovë, më shëndet dhe fuqi të rimarrë. Ka shumë sfida me të cilat ballafaqoheni ju dhe populli juaj në këtë periudhë me rëndësi vendimtare në historinë e Kosovës. Ju keni qenë me popullin tuaj në kohë shumë të vështira. Tashti ata tani luten dhe mendojnë për ju. Ju dëshirojmë shërim të shpejtë dhe të ktheheni shëndosh e mirë në shtëpi.

Mezi presim të vazhdojmë bashkëpunimin me ju gjatë viteve në vijim", thuhet në këtë mesazh të nënshkruar nga Tomas Bridle, drejtor i NDI së për Kosovë.
Një mesazh për shërimin sa më të shpejtë të Presidentit Rugova kanë dërguar edhe minatorët e sindikatës së Stantërgut:
"Ne me padurim kemi pritur rifillimin e prodhimit për të cilin kontributi Juaj ka qenë i veçantë, andaj ne Ju dëshirojmë shërim sa me të shpejtë dhe kthim sa me parë ne detyrat e shumta që ju presin, në mënyrë që bashkërisht t'i korrim rezultatet e fillimit të prodhimit që shpresojmë se po bëhen në të njëjtën kohë me njohjen e të drejtës se popullit tonë për liri dhe pavarësi, që duhet të ndodhë këtë vit, për qka Ju investuat pjesën më të mirë të jetës".
Ndërkaq në një mesazh të tij Riza Halimi, kryetar i Partisë për Veprim Demokratik dhe i Komunës së Preshevës shkruan:
"Me shqetësim të madh e morëm lajmin për problemet shëndetësore me të cilat aktualisht jeni duke u ballafaquar. Më lejoni që nga zemra t'Ju uroj shërim të shpejtë dhe vazhdimin e angazhimit Tuaj të çmueshëm në krye të institucionit më të lartë të Kosovës"
Nga dega e LDK-së në Nju Jork ka arritur ky mesazh: "Me pikëllim e brengë të thellë mësuam për sëmundjen e Presidentit Rugova. Shpresojmë dhe duam të besojmë se kjo sëmundje është e përballueshme për Presidentin tonë Dr. Ibrahim Rugova.

Ne besojmë se Presidenti Rugova, ashtu siç i përballoi sfidat e tjera të shumta e të ndryshme, me të cilat e takoi jeta qoftë para luftës qoftë pas luftës, do ta përballojë edhe sëmundjen dhe nga thellësia e zemrës dhe e shpirtit i lutemi Zotit të përkujdeset për shëndetin dhe mirëqenien e tij".