Dëmet materiale të uraganit Katrina

Dëmet materiale të uraganit Katrina

02 shtator 2005 / TN

Zëri i Amerikës (01.09.2005) Mil Arcega

Numri i të vdekurve shkaktuar nga uragani Katrina vazhdon të rritet, ndërkohë që dëmet e jashtëzakonshme bëhen gjithnjë e më të dukshme. Kryetari i Bashkisë i New Orleansit i tha agjencisë Associated Press se numri i viktimave mund të arrijë në qindra, mbase edhe në mijëra vetë. Por pasojat e kësaj katastrofe natyrore, ndër më të rëndat që godasin Shtetet e Bashkuara po ndjehen edhe në tregjet botërore të energjisë.

Mendohet se Katrina është që nga stuhitë që ka shkaktuar më shumë dëme materiale në historinë amerikane, që mund të kapërcejnë 25 miliardë dollarë.

Zyrtarët thonë se mund të duhen 12 deri në 16 javë që banorët të lejohen të shohin shtëpitë e tyre të përmbytura, ose të dëmtuara, por kjo katastrofë, më e madhja që prek zonat urbane në Shtetet e Bashkuara, po shkakton gjithashtu shqetësime të mëdha në tregjet e energjisë botërore.

Ndërsa 20 sonda nafte të Gjirit të Meksikës, nuk dihet se ku kanë përfunduar dhe prodhimi i naftës në këto zona ka rënë me afro 95 për qind, spekullimet mbi rritjen e kërkesës, po sjellin si rezultat një blerje të shfrenuar. Ira Eckstein është një tregëtar në bursën e New Yorkut.

“Nuk e kam parë kurrë një gjë të tillë gjatë gjithë karrierës sime. Çmimi i naftës së papërpunuar ka arritur në 70 dollarë e 85 cent, një rekord krejt i ri”.- thotë ajo.

Dhe ndërkohë që çmimet e karburantit po arrijnë një mesatare prej 3 dollarësh në shkallë vendi, Senatori amerikan Charles Schumer thotë se ka ardhur koha për një ndërhyrje të vendosur.

“Po sjell pasoja në jetën e njerëzve, po sjell pengesa në ekonomi. Tani është momenti që të përdoret rezerva strategjike e naftës”.- tha Senatori.

Rezerva strategjike amerikane e naftës përbëhet nga afro 700 milionë fuçi me naftë të papërpunuar, të magazinuara në galeri të nëndheshme dhe është e mjaftueshme për të plotësuar nevojat e Shteteve të Bashkuara për një muaj, në rast të një emergjence kombëtare. Shumë thonë se ky moment urgjent është tani dhe njëri prej tyre është Presidenti George Bush që i kërkoi Departamentit të Energjisë që t’ia vërë në dispozicion rezervat strategjike të naftës, rafinerive.

“Një pjesë e madhe prodhimi të papërpunuar, është ndërprerë për shkak të stuhisë. Unë kam udhëzuar Sekretarin Samuel Bodman që të punojë me rafineritë, me njerëzit që kanë nevojë për naftë të papërpunuar që të lehtësohen mangësitë, përmes huave”.-tha Presidenti.

Çmimet për naftën e papërpunuar ranë, pas kësaj deklarate, por analistët e naftës thonë se kjo nuk do të zgjasë shumë. Kjo sepse, kompanitë e energjisë thonë se problemi nuk qëndron tek furnizimi, por tek aftësia e reduktuar e përpunimit. Agjencia për mbrojtjen e mjedisit, po heq dorë nga disa nga standardet kundër ndotjes, në mënyrë që të vihet në dispozicion gaz më pak i shtrenjtë. Drejtori i Agjencisë, Steve Johnson:

“Kjo masë është e domosdoshme për të siguruar që të ketë karburant në dispozicion në gjithë vendin, për të zgjidhur probleme të lidhura me shëndetin publik dhe nevojat për automjetet”.- tha zoti Xhonson.

Pasojat e uraganit të fundit pritet që të vazhdojnë për shumë kohë. Katrina ka ndërprerë gjithashtu prodhimin e gazit natyral, duke sjellë si rezultat mungesa të jashtëzakonshme në prodhim. Analistët e çmimeve të naftës thonë se nëse rafineritë nuk rifillojnë prodhimin gjatë javëve të ardhshme, mund ta bëjë më të kushtueshëm gazin për ngrohje këtë dimër.

Uragani Katrina: vazhdon evakuimi i banorëve

Zëri i Amerikës (01.09.2005)

Në Shtetet e Bashkuara, autoritetet po përpiqen të evakuojnë dhjetra mijë njerëz të mbetur në qytetein e përmbytur New Orleans të shtetit Louisiana, tri ditë pas goditjes së tij nga Uragani Katrina.

Njoftimet nga ky qytet flasin për një gjendje gjithnjë e më të dëshpëruar. Aty shikon refugjatë që flenë nëpër rrugë dhe njerëz të dobësuar nga mungesa e ushqimit dhe e ujit. Shumë njerëz vazhdojnë të jetë të bllokuar në çatitë e shtëpive dhe në ndërtesat e larta duke pritur të shpëtohen.

Një operacion i madh evakuimi vazhdon në stadiumin e mbyllur superdome të Nju Orleans-it, megjithë njoftimet se aty ka patur të shtëna si dhe zjarre që u viheshin kazanëve të plehrave.

Policia dhe trupat e Gardës Kombëtare janë stacionuar për të mos lejuar plaçkitësit të cilët vjedhin jo vetëm ushqim dhe ujë por edhe mallra si televizorë apo armë.

Plaçkitje në shkallë të gjerë njoftohen edhe në shtetin Misisipi, ku gjithashtu ka patur dëme nga uragani.

Presidenti u ka kërkuar ish-Presidentëve Bill Clinton dhe George Herbert Walker Bush që të vihen në krye të një fushate për mbledhje fondesh për viktimat e uraganit.

Më parë Presidenti Bush tha se qeveria amerikane ka ndërmarrë operacionin më masiv të ndihmave në historinë e vendit për të ndihmuar viktimat e uraganit.

Presidenti ka në plan të vizitojë nesër zonat e goditura nga uragani.

Katrina, ky "cunam amerikan"

Gary Thomas

Trupat e Gardës Kombëtare vërshuan në New Orleans sot ndërsa qyteti - dikur krenar – vazhdonte të zhytej më tepër në kaosin e shkaktuar nga uragani Katrina. Krisma armësh dhe plaçkitje filluan në disa zona të qytetit, ndërkohë që banorët që qëndruan në qytet e gjetën veten në kushte tejet të dëshpëruara. Mungesa të mëdha të artikujve bazë si ushqimi dhe uji i pijshëm i kanë bërë njerëzit të kalojnë në dëshpërim.

Uragani Katrina pati ndikim vdekjeprurës në Luiziana, Misisipi dhe Alabama kur goditi tokën ditën e hënë. Komunitete të tëra bregdetare u zhdukën. Përmasat e shkatërrimeve kanë bërë që disa komentatorë amerikanë ta quajnë atë “cunami amerikan” për shkak të ngjashmërisë me tragjedinë e vitit të kaluar në Azi.

Situata u keqësua shumë edhe në stadiumin e mbyllur të New Orleans, ku rreth 25 mijë vetë të strehuar nga stuhia, presin në kushte të vështira të evakuohen për në Houston të Teksasit. Keith Simon nga ekipi i ndihmës Ambulanca Acadia, i cili meret me ndihmën shëndetësore për njerzit që po evakuohen, i tha Zërit të Amerikës se personeli i tij mjekësor kishte kërkuar të largohej nga stadiumi për arsye se situata po bëhej e tmerrshme.

"20 mjekët, infermierët dhe anëtarët e ekipit të ndihmës së shpejtë që ishin në stadiumin e mbyllur kërkuan që të largoheshin. Kështu që i larguam njerzit tanë prej andej.”

Zoti Simon tha se ekipi i tij do të kthehet kur trupa të tjera të Gardës Kombëtare do të vinin për të vendosur rendin. 10 mijë trupa shtesë të gardës po dërgohen në New Orleans dhe në zona të tjera të prekura nga stuhia, përveç 18 mijë të tjerëve që kanë shkuar atje më përpara.

Presidenti Bush shprehu zemërim të thellë në lidhje me mungesën e rendit dhe qetësisë. Në një intervistë me rrjetin televiziv ABC, presidenti Bush tha se nuk duhet të bëhet asnjë lëshim ndaj njerëzve që plaçkisin dhe shfrytëzojnë fatkeqësitë e të tjerëve. Presidenti do të bëjë nesër një vizitë në zonat e prekura nga uragani.

Kolona të tëra me furnizime emergjence u dërguan në New Orleans. 80 përqind e qytetit ndodhet nën ujë. Megjithatë banorët e mbetur në qytet u ankuan se ndihmat nuk po u arrinin shpejt.

Sekretari i Sigurisë Kombëtare Michael Chertoff tha sot se qeveria federale vazhdon përpjekjet për të shpëtuar njerëzit e izoluar nga përmbytjet dhe për të siguruar ndihma emergjente.

“Departamenti i Sigurisë Kombëtare do të vazhdojë të punojë me partnerët federalë, shtetërorë dhe lokalë për të mbështetur përpjekjet në Alabama, Luiziana, Misisipi dhe Florida. Ne po punojmë pa u lodhur për t’u siguruar që burimet federale të shkojnë në zonat që kanë më shumë nevojë në Gjirin e Meksikës.”- tha zoti Chertoff.

New Orleansi u përmbyt kur pjesë të digave që mbanin ujërat rreth qytetit u çanë. Hugh Kaufman, analist politik në Agjencinë për Mbrojtjen e Mjedisit, i cili ka një përvojë të gjatë në përgjigjet ndaj tragjedive natyrore, tha se uji i ndenjur paraqet një rrezik të madh për shëndetin dhe mjedisin.

“Është një sasi e madhe uji që përmban ujëra të zeza, mbetje industriale, materiale të rrezikshme si vaj, gaz dhe materiale të tjera që ka përmbytur të gjithë zonën e New Orleans dhe që duhet pastruar.”- tha analisti.

Zyrtarët thonë se nuk mund të fillojnë të llogarisin dëmet në njerëz dhe ato materiale derisa të hiqet i gjithë uji.