Berberi: «Universiteti ushtarak që u siguron punë të gjithë të diplomuarve»

Intervistë me Rektorin i Universitetit Ushtarak “Skënderbej”, prof. Pëllumb Berberi

Berberi: «Universiteti ushtarak që u siguron punë të gjithë të diplomuarve»

1 shtator 2005 / TN Intervistoi: Çerçiz LOLOÇI

Rektori i Universitetit Ushtarak “Skënderbej”, prof. Pëllumb Berberi, flet ekskluzivisht për gazetën “Albania” duke dhënë disa nga përparësitë që ka kjo shkollë e lartë, në krahasim me universitetet e tjera në Shqipëri

Pyetje : Zoti Berberi, çfarë vendi zë UU “Skënderbej” në rrjetin universitar të vendit tonë?

P. BERBERI: Universiteti Ushtarak “Skënderbej” është i vetmi universitet në vendin tonë, misioni i të cilit është të përgatisë oficerë për të drejtuar forcat tona të armatosura.

Kalimi nga Akademia Ushtarake në Universitet Ushtarak nuk është thjesht një ndryshim emërtimi por një ndryshim rrënjësor në filozofinë e arsimimit të oficerëve të ardhshëm. Në mënyrë të koncentruar mund të përmblidhet: përgatitja e një lideri ushtarak të kulturuar në vend të një drejtuesi ushtarak. Këtij qëllimi i shërben kombinimi i shkollimit ushtarak me atë akademik të nivelit universitar. Nuk jemi të parët, por vetëm po mundohemi të ndjekim prirjet e përparuara të vendeve partnere.

Pyetje : A mund të na thoni më konkretisht se sa fakultete janë në universitetin tuaj dhe cili është profili i tyre?

P. BERBERI: Vitin qe shkoi u fillua me shkollim akademik në degën e menaxhimit, sivjet dhe me një degë të re, atë të elektronikës. Vitin që shkoi ishim me një fakultet, Fakulteti i Menaxhimit, sivjet dhe me një fakultet të dytë, Fakultetin Teknik.

Pyetje : Ndryshe nga shkollat e tjera të larta, universiteti juaj ka lidhje të dyfishtë: edhe me ministrinë e Arsimit, edhe me ministrinë e Mbrojtjes; përse kjo strukturë?

P. BERBERI: Universiteti Ushtarak “Skënderbej” përgatit oficerë, pra kuadro që do të punësohen në strukturat e Forcave të Armatosura. Nga ana tjetër Universiteti Ushtarak “Skënderbej” është një institucion i arsimit të lartë dhe jo një njësi ushtarake, ndaj dhe duhet të udhëhiqet nga të njëjtit parime cilësore që veprojnë në shkollat e larta civile. Këto struktura janë në vartësi të MASH-it. Ligjërisht Universiteti Ushtarak “Skënderbej” mbështetet në të njëjtin ligj të Arsimit të Lartë. Në të njëjtën kohë studentët tanë diplomohen në dy fusha: oficerë me gradën e nëntogerit dhe specialistë të lartë në fushën e menaxhimit dhe elektronikës.

Pyetje : A mund të na thoni për lidhjet që ka UU “Skënderbej” me universitetet brenda dhe jashtë vendit?

P. BERBERI: Universiteti Ushtarak “Skënderbej” ka lidhje të drejtpërdrejta me Universitetin e Tiranës, (Fakultetin Ekonomik) dhe me Universitetin Politeknik, (Fakultetin Elektrik). Kjo lidhje është brenda vendit. Ndërkohë universiteti ynë ka një sërë lidhjesh me disa universitete jashtë vendit, mes të cilave me Akademinë Ushtarake të West Point në ShBA, me Akademinë e Forcave Tokësore në Turqi, me Akademinë e Modenas në Itali, me Akademinë Ushtarake të Drezdenit në Gjermani, me Akademinë Ushtarake në Greqi, etj.

Pyetje : Po për procesin e mësimdhënies dhe nivelin e trupës mësimore, çfarë mund të thuhet?

P. BERBERI: Programi mësimor që ofrohet në Universiteti Ushtarak “Skënderbej” ka dy shtylla të rëndësishme: programin akademik në fusha e menaxhimit dhe elektronikës, që është plotësisht i njëjtë me ato të ofruar nga Fakulteti Ekonomik dhe Fakulteti Elektrik dhe programi ushtarak që siguron kulturën ushtarake, përgatitjen fizike me elementë të kulturës së përgjithshme qytetare. Vendi që zën secila është në raportin 80 % me 20%. Në këto kushte ngarkesa mësimore e studentëve tanë është rreth 130 % më e lartë se ajo e studentëve në universitetet civile.

Pyetje : Me sa dimë shumë nga kuadrot e këtij universiteti e kanë të siguruar vendin e punës…

P. BERBERI: Jo shumë por të gjithë.

Pyetje : Ju sapo keni përfunduar procesin e konkurrimit për vitin e ri akademik 2005-2006; cilat janë risitë e konkurrimit të sivjetshëm?

P. BERBERI: Cilësia e studentëve që konkurruan është shumë e mirë. Nota mesatare e të 700 studentëve që konkurruan në të dy degët ishte rreth 7.0 nga 5.9 që ishte vitin e kaluar. Në veçanti femrat janë më të mira se sa djemtë. Mesatare e notës se tyre është 7.8.

Pyetje : Pas shpalljes së rezultateve, a mendoni se do të keni konteste nga kandidatë apo nga prindër konkurrentësh?

P. BERBERI: Këtë vit patëm rreth 20 kontestime, por asnjeri nuk ishte për faj të procedurave, por për gabime të konkurrentëve. Përmendim që kontrolli i përgjigjeve këtë vit u realizua në mënyrë elektronike dhe përfundoi e u afishua vetëm dy orë mbas mbylljes së konkursit.