Kujt duhet t’i ruhet kryeministri Berisha?

OPINIONE

Kujt duhet t’i ruhet kryeministri Berisha?

28 gusht 2005 / TN
Çerçiz LOLOÇI
Kur socialistët kanë mundur të pranojnë humbjen e zgjedhjeve të përgjithshme të 3 korrikut të këtij viti dhe kur Partia Demokratike ka arritur të krijojë një maxhorancë parlamentare që miraton jo një qeveri por që mund të shkaktojë edhe ndryshime të tjera të rëndësishme, kryeministri i ri Berisha ndodhet nën trysninë e gjithfarshme që gjallon gjithnjë e më shpesh selinë blu.

Kjo situatë i ka ndodhur pak a shumë Berishës edhe tetë vjet më parë ku, një fitore e përgjithshme vinte e përthyhej me kërkesa frontale për të pasur një post të rëndësishëm ministri, ambasadori, drejtori të përgjithshëm dhe zyra të tjera. (Në të njëjtën situatë ka qenë disa herë edhe Nano kryeministër apo kryetar partie, që ka pasur në dispzicion më shumë vite për të vënë dhe rivënë drejtues të të gjitha niveleve).

Nuk është sekret të thuhet se në Shqipëri, i vetmi sektor ku mund të hapen vende të reja të punës është ai shtetëror dhe premtimet për fusha të tjera janë thjesht demagogji. Nuk është gjithashtu dukuri e panjohur të pranohet se yshtja për të pasur një punë shteti nis që nga rojet e institucioneve, te ruajtësit e titullarëve, te magazinierët e furnitorët, në një pjesë të konsiderueshme të emërtesave sepse kushdo prej këtyre vendeve konsiderohet jo si shërbim ndaj qytetarëve por si mundësia më efikase ku mund të fitohet më tepër dhe ku nuk të ndëshkon askush.

Nga kjo tërheqje, për fat të keq, nuk ndahen shumë të majtët dhe të djathtët, pasi shembuj të përvetësimit abuziv gjenden në të dy qeverisjet. Pavarësisht se shkalla më e lartë korruptive arriti gjatë viteve të fundit, nuk mund të mohohet se njerëz pranë Berishës (dmth pranë Partisë Demokratike), nën mbrojtjen apo emrin e tij, kanë krijuar kapital që nuk mund ta fitonin në rrugë të tjera. Kjo frikë egziton sërish.

Sepse ligji për ministrat dhe deputetët, për gjyqtarët dhe prokurorët, për këshilltarët dhe drejtorët e përgjithshëm, për ministrat dhe rektorët, për drejtorët e SHISH-it dhe për nëj sërë funksionesh të tjera, pra ky ligj lejon të përfitosh abuzivisht dhe të mos kesh drojë nga ndonjë gjykatë e pavarur apo nga ndonjë akuzë shteti.

Në Shqipërinë e qeverisur prej Nanos dhe në atë të mëparshme të Berishës, mund të gjesh me dhjetra shembuj ku njerëz, pa kurrfarë aftësie dhe profesionaliteti, por vetëm me një kostante përvujtënie dhe servilizmi, kanë arritur të fitojnë padrejtësisht. Por ndërsa nuk mund të thuash gjë për kryeminsitrin e ikur, këto s’mund të mos ia përmendësh kryeministrit të ri që “ndotet” qoftë edhe prej një
ministri të përzgjedhur prej tij.