Papa Benedikti: “Të krishterët dhe myslimanët duhet të punojnë së bashku për të mposhtur terrorizmin”

Papa Benedikti: “Të krishterët dhe myslimanët duhet të punojnë së bashku për të mposhtur terrorizmin”

22 gusht 2005 / TN / Zëri i Amerikës

Sabina Kastelfranko / Këln / Gjermani

Këln / Gjermani, 21 gusht 2005 - Papa shfrytëzoi takimin e tij me udhëheqës myslimanë nga komuniteti turk i Gjermanisë për të theksuar shqetësimet rreth përhapjes së terrorizmit. Ai tha se terrorizmi po mbjell vdekje e shkatërrim dhe po shkakton pikëllim e dëshpërim për shumë njerëz.

Udhëheqësi shpirtëror i Kishës Katolike tha se nuk ka dyshim se ata që nxisin dhe planifikojnë sulme të tilla, dëshirojnë të helmojnë marrëdhëniet midis të krishterëve dhe myslimanëve.

Ai theksoi se nëse dëshirojnë të jenë të kenë rezultat në përpjekjet për të kthyer prapa valën e terrorizmit, të krishterët dhe myslimanët së bashku duhet të zhdukin mëllefin e inatin dhe të kundërshtojnë mungesën e tolerancës e dhunën.

Papa Benedikti i Gjashtëmbëdhjetë tha se kjo është një detyrë shumë e vështirë, por jo e pamundur. Ai theksoi se udhëheqësit myslimanë kanë përgjegjësinë e madhe të edukojnë siç duhet brezat e tyre të rinj.

Ai tha se ata duhet ta udhëheqin brezin e ri drejt besimit të vërtetë islam. “Këtu, tha Shenjtëria e Tij, nuk ka vend për plogështi apo mosangazhim, e, madje, edhe më pak për anësi dhe sektarizëm.” “Ne nuk duhet të gjunjëzohemi para frikës e shtypjes, por duhet të kultivojmë optimizmin dhe shpresën.”

Udhëheqësit myslimanë shprehën kënaqësi pas takimit. Kryetari i Bashkimit Islam Turk tha se pjesëmarrësit në takim shprehën mbështetje për qëndrimin e papës. “Me këtë platformë të përbashkët, tha ai, ne mund ta luftojmë terrorizmin së bashku.”

Gjermania është një nga vendet me popullsinë më të madhe myslimane në Evropë, me rreth 3 milionë e 500 mijë. Papa tha se dëshironte të takohej me udhëheqës të komunitetit mysliman në Gjermani, ku ai ishte lindur, kishte studiuar dhe kishte kaluar një pjesë të mirë të jetës së tij.

Kardinali gjerman, Karl Lehman, tha pas takimit se gjatë bisedimeve midis Papës dhe udhëheqësve myslimanë të Gjermanisë mbretëroi një klimë paqësore e miqësore: “Ati i Shenjtë, tha Kardinali Lehman, e bëri të qartë se ky dialog ndërfetar dhe ndërkulturor midis të krishterëve dhe myslimanëve është me rëndësi jetike.”

Takimi i Papës Benedikti i Gjashtëmbëdhjetë gjatë ditës së katërt të vizitës në vendlindjen e tij, e para e papatit të tij, ishte pjesë e përpjekjeve të tij për t’u shtrirë dorën e bashkëpunimit besimeve të tjera fetare.

Këln: Papa thotë meshë para 1 milionë të rinjve

21 gusht 2005 / Zëri i Amerikës

Papa Benedikti i dha fund të djelën vizitës së tij Gjermani me një meshë në jashtë, në një shesh pranë Këlnit.

Papa e tha meshën në 5 gjuhë të ndryshme duke dënuar “mënyrën e të vepruarit pa ndihmën e Zotit” duke theksuar me këtë rast mësimet që duhen ndjekur. Vëzhguesit e Vatikanit thanë se Papa nuk iu drejtua të rinjve me kërkesën për përmbajtje seksuale, ashtu sikurse bënte paraardhësi i tij, Papa Gjon Pali.

Mesha e sotme u zhvillua me rastin e Ditës Botërore të Rinisë, që këtë vit u mbajt në vendlindjen e Papës, në Gjermani. Papa bëri të njohur se Dita e Ardhshme e Rinisë do të zhvillohet pas tre vjetësh në Sidney të Australisë.

Para se të nisej për në Romë, Papa u tha peshkopëve gjermanë se Kisha Katolike duhet të luftojë laicizmin në rritje kohët e fundit në Evropë dhe u bëri atyre thirrje t’i shtojnë përpjekjet për të tërhequr një numër më të madh të rinjsh në radhët e priftërinjve. //az//