Ministri Veliu pranoi futbollët e paqes të Sven Eriksson dedikuar shkollave në Kosovë

Ministri Veliu pranoi futbollët e paqes të Sven Eriksson dedikuar shkollave në Kosovë

22 gusht 2005 / TN

Ministri i MASHT Agim Veliu, pranoi sot në Parkun e Paqes në Podujevë 1 mijë topat e futbollit dërguar nga trajneri i mirënjohur anglez Sven Goran Eriksson dhe të dashurës së tij Nancy Dell'Olio e cila në dhjetor të vitit të kaluar nisi kampanjën për dërgimin e këtyre topave në Kosovë. Në këtë ceremoni rasti përveç fëmijëve të shumtë, familjes Bugujevci dhe anëtarëve të MaK nga Anglia, morën pjesë edhe udhëheqja komunale e Podujevës e prirë nga kryetari Agim Kikaj.

Në një atmosferë gëzimi e hareje të qindra fëmijëve dhe pjesëmarrësve nga Podujeva dhe anëtarëve të organizatës “Ndihma e Mançesterit për Kosovën” nga Mançesteri, Londra, Irlanda e vende tjera të Mbretërisë së Bashkuar, zonja Pam Dawes dhe Genc Bogujevci i dhuruan topat e paqes Ministrit Agim Veliu.

“Ju falënderoj nga zemra për gjithë atë që keni bërë e po bëni këtu në Parkun e paqes, veçantë për futbollët e paqes të cilët do të shpërndahen gjithandej shkollave të Kosovës”, tha Ministri Veliu. Ai tha se donacioni i tillë për fëmijët e Kosovës që vjen nga trajneri i mirënjohur anglez Sven Erikson, e dashura e tij Nensi Dell’Ollio dhe organizata e tyre “Truce international” ka kuptimin e paqes dhe tregon se Kosova ka miq të shumtë nëpër botë.

Veliu falënderoi familjen Bogujevci dhe fëmijët që mbijetuan masakrën e 28 marsit 1999; Sarandën, Fatosin, Lirien, Jehonën dhe Gencin, por edhe të gjithë ata që po kontribuojnë për Kosovën. Z. Pam Daus tha se “Truce international” dhe trajneri Sven Erikson dhe e dashura e tij Dell’Ollio i kanë dhuruar MaK-ut një mijë topa futbolli në vlerë rreth 2 mijë funta për të inkurajuar harmoninë dhe shërimin në Kosovë.

“Dorëzimi i topave të paqes në Parkun e Paqes të Mançesterit që po ndërtohet në Podujevë është një simbolikë sepse parku do të jetë një memorial për të rënët, mirëpo fokusohet në jetën e re dhe shpresën për ardhmërinë e Kosovës”, ka pohuar z. Daus për të shtuar që futbollët të cilët janë përcjellur edhe nga Sekretari i OKB-së Kofi Anan, pastaj ish kryetari i SHBA-ve Bill Kllinton dhe udhëheqës tjerë botërorë, do t’u shpërndahen shkollave në gjithë Kosovën.

Ndërsa menagjeri i projektit të Parkut të Paqes Paul Guest tha se topat e “Truce” i shërbejnë qëllimit për çka po ndërtohet Parku i paqes. Sipas tij projekti ka për qëllim promovimin e lidhjeve të komuniteteve, e Parku i Paqes i Mançesterit simbolizon miqësinë në mes të gjitha komuniteteve në Kosovë.

Organizata e Nancy Dell'Olio dhe e Sven Eriksson “Truce international” ka për qëllim që të mbështesin Deklaratën e Kombeve të Bashkuara për “Ditën ndërkombëtare të armëpushimit” dhe të mobilizojë fuqinë e futbollit nëpër botë. Futbolli ka fuqi të inspirojë rininë që mund të ndikojnë në liderët botërorë dhe që tjju jap shtytje ndërprerjes së konflikteve. Nensi Dell’Ollio në dhjetor të vitit të kaluar ka nisur kampanjën për dërgimin e topave të paqes në Kosovë duke i dhuruar ata fëmijëve të familjes Bogujevci.

Sipas informatës së Muzeut Mbretëror të Mançesterit – Veriu, kampanja e inicuar nga trajneri i kombëtares angleze Sven Goran Eriksson dhe e dashura e tij Nancy Dell’Olio ka përfshirë dorëzimin solemn të këtyre topave më 8 dhjetor ku ishin fëmijë të Kosovës që aktualisht jetojnë në këtë qytet dhe nxënës tjerë të shkollave angleze.

Kjo ngjarje ka përfshirë fjalimet dhe prezantimin e topave të futbollit në ekspozitën “Loja më e madhe” nga Nensi Dell Ollio në Muzeun Mbretëror të Luftës të Mançesterit, fotoalbume, intervista dhe vizitën e galerisë “Fëmijët dhe Lufta” që përmbanë edhe tregimin e luftës dhe të masakrës në familjen e tyre, të fëmijëve Fatos, Saranda, Genc, Lirie, Jehona Bogujevcit nga Podujeva, të cilët humbën më të dashurit e tyre, por edhe vetë ishin viktima në ditën e 28 marsit 1999 dhe aktualisht vazhdojnë shërimin e plagëve në Mançester.

K’të ngjarje e kanë shënuar shumë media angleze, ndërkaq që BBC në një shkrim ka pohuar se e dashura e Sven Eriksonit është paraqitur në ceremoni për të promovuar fuqinë e sportit dhe për të inkurajuar paqen. “Nensi Dell Olloi u ka dhënë topat e futbollit fëmijëve nga Wilslow të Çeshirit, në Muzeun Mbretëror të Luftës – Veriu në Mançester, të cilët pastaj do tu përcillen fëmijëve të Kosovës së shkatërruar nga lufta”, ka njoftuar BBC për të shtuar që 1000 topa futbolli do të shpërndahen në Kosovë.

Me këtë rast zonjusha Dell Ollio ka deklaruar se ishte shumë e rëndësishme që ajo ishte në atë ngjarje për të prezantuar fushatën e “Truce International” dhe për të treguar mbështetjen e saj. “Unë besoj fuqishëm se sporti ka fuqi të jashtëzakonshme ti sjell njerëzit së bashku, veçanërisht futbolli”, ka deklaruar Nensi dell Ollio që beson se sporti ka fuqi të thyejë barrierat dhe të bëhet gjuhë ndërkombëtare.