|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

- Arkivat e Shqipërisë dhe holokausti

Shqiptarët duhet të ndihen krenarë për të shkuarën e tyre

4 korrik 2005 / TN

 

Marcie RIES (ambasadorja e Sh.B.A. në Tiranë)
 

Amerikanët janë të përkushtuar që të punojnë me kombet vullnetmira dhe Shqipëria është sigurisht një nga këto vende, për të lehtësuar ata që vuajnë në kohën tonë dhe për të përhapur bekimin e lirisë dhe demokracisë. Veprat vetëmohuese të mirësisë dhe kurajës së shqiptarëve që ndihmuan në mbrojtjen dhe strehimin e refugjatëve hebrenj në arrati, gjatë Luftës së Dytë Botërore nuk duhen harruar kurrë.

 

Pasardhësit e atyre që u shpëtuan do të jenë përjetë mirënjohës. Shqipëria ndihet me të drejtë krenare për të shkuarën e saj në mbrojtje të hebrenjve të këtij vendi. E ardhur vetë nga një familje hebrenj, unë ndiej një mirënjohje të veçantë për ata që morën mbi vete rreziqe dhe që ishin të gatshëm të rrezikonin jetët e tyre për të tjerët. Askush të mos gabohet: rritja e ekstremizmit kudo është një kërcënim për këdo, kudo.

 

Ne nuk mund dhe nuk duhet të lëkundemi në luftën kundër ekstremizmit dhe intolerancës në të këtushmen dhe të tashmen. Qofshin paragjykimet fetare të çdo lloji, racizmi apo ultra-nacionalizmi, sido që intoleranca të manifestohet, është e rëndësishme që të qëndrojmë të bashkuar për ta mposhtur atë dhe sëmundjen që ajo përhap.

 

Duke u bashkuar në këtë përpjekje, ne forcojmë lidhjet që na bashkojnë dhe u japim një goditje atyre që dëshirojnë të na ndajnë duke mbjellë urrejtje, injorancë dhe mosbesim.

 

Detyra është e qartë: të mbrojmë ata, dinjiteti dhe liria, apo edhe jeta e të cilëve mund të kërcënohen, jo për shkak të asaj që kanë bërë, por për shkak të asaj që janë.

 

Ne duhet të jemi vigjilentë dhe duke mbrojtur dokumentet e së shkuarës ne mund të sigurojmë që brezat e së ardhmes të jenë më mirë të armatosur kundër ideologjive që mbështeten në urrejtje dhe përjashtim.

 

Një ndër mësimet që mund të nxjerrim nga holokausti është që ndonjëherë është e nevojshme për të gjithë ata që janë kundër tiranisë dhe që ndajnë së bashku një respekt të përbashkët për të drejtat e çdo individi, të bashkohen në të njëjtën kauzë për të mbrojtur ata individë kushdo dhe kudo që të jenë.

 

Përpara se të mbaroj, dëshiroj të ndaj me ju diçka të veçantë që mora sot në mëngjes. Është një letër nga Eliot Engel, anëtar i Kongresit të Shteteve të Bashkuara, i cili tregon interes shumë të veçantë në çështjet që kanë të bëjnë me Shqipërinë dhe shqiptarët.

 

Ai vetë është nga shteti i Nju- Jorkut, dhe besoj se disa prej jush e dinë që ai na bëri një vizitë këtu pak kohë më parë. Do t'ju lexoj pak nga letra e tij:

 

 

“E dashur ambasadorja Ries”!

 

“Dëshiroj të shpreh mbështetjen time të fortë për marrëveshjen që nënshkruhet sot midis Muzeut të Shteteve të Bashkuara në Kujtim të Holokaustit dhe Arkivit Qendror të Shtetit të Shqipërisë.

 

Synimi i Muzeut të Shteteve të Bashkuara në Kujtim të Holokaustit është të çojë përpara dhe të përhapë njohuri për holokaustin, të ruajë kujtimin e atyre që kanë vuajtur, si dhe të nxisë reflektimin mbi çështjet morale dhe shpirtërore që dalin nga ngjarjet e holokaustit, si dhe për përgjegjësinë e vetë njerëzve kur ndodhin të tilla tragjedi.

 

Unë e kam vizituar muzeun dhe mund të dëshmoj që fuqia e mesazhit të tij shprehet nëpërmjet koleksionit të tij mbresëlënës, programeve shumëplanëshe, edukuese dhe ekipit të ekspertëve që ka. Edhe njëherë, dëshiroj të ndaj me ju mbështetjen time të plotë për marrëveshjen që firmoset sot.

 

Me një shkëmbim të tillë informacioni, të kuptuarit ndërkombëtar mbi holokaustin vetëm do të rritet dhe nëpërmjet kësaj njohurie, ne mund të rikonfirmojmë se tmerre të tilla nuk duhet të ndodhin kurrë më."

 

Nënshkruar, Eliot Engel, anëtar i Kongresit.

 

Unë dëshiroj t'ju falënderoj personalisht të gjithëve ju, për t'u bashkuar me ne në këtë nënshkrim që ka një rëndësi kaq të madhe për njerëzit në Shqipëri, në Shtetet e Bashkuara dhe për të gjithë njerëzit nga e gjithë bota që do të vizitojnë muzeun dhe që do të kenë akses në disa prej informacioneve që ruhen atje.

 

  
(Nga fjala e ambasadores Marcie B. Ries, në ceremoninë e nënshkrimit të marrëveshjes së Bashkëpunimit mes DPA-së dhe Drejtorisë së Memorialëve në SHBA)