Pse u lejua një politizim kaq i madh në UP?

OPINIONE

Pse u lejua një politizim kaq i madh në UP?

29 korrik 2005 /TN /QIK

Shkruan: Samet DALIPI,mr.sc

- Është e vërtetë se shumicës së personelit të UP, arsimtarëve dhe studentëve nuk u intereson se kush udhëheqë me UP-në. Ata dëshirojnë një universitet i cili u ofron një mirëqene, prosperitet dhe rezultate shkencore e jo politizim të tij. Është e ditur se “ardhmëria e njerëzimit më së shumti varet nga zhvillimi kulturor, shkencor dhe teknik”(Magna Karta Universitatum)

- Nëse vazhdohet me (keq) përdorimin e studentit vetëm kur i nevojitet dikujt për të realizuar qëllime individuale apo klanore, ecja jonë do të mungoj ose do të humb rëndësinë që ka ky universitet për qytetarët e do të orientohen kah zgjidhjet alternative si janë universitetet private

Duke pasur parasysh gjendjen e rëndë të krijuar në UP dhe qene e bindur për thellimin e mëtejmë të situatës, Qeveria ka miratuar udhëzimin administrativ Nr.37/2005 “Për rivendosjen e qeverisjes së ligjshme në Universitetin e Prishtinës”.
Pa dashur të hyjë në shkaqet e ardhjes deri te kjo gjendje në UP, dëshiroj të ndalem tek vrapi i qarqeve të ndryshme për të manipuluar me opinionin publik të lodhur me akuza e kundër akuza të ndërsjella në mes të “Rektoratit” dhe MASHT-it.

Është e vërtetë se shumicës së personelit të UP, arsimtarëve dhe studentëve nuk u intereson se kush udhëheqë me UP-në. Ata dëshirojnë një universitet i cili u ofron një mirëqene, prosperitet dhe rezultate shkencore e jo politizim të tij. Është e ditur se “ardhmëria e njerëzimit më së shumti varet nga zhvillimi kulturor, shkencor dhe teknik”(Magna Karta Universitatum).
UP ndau fatin e njëjtë të gjendjes së përgjithshme e cila po zotëron në Kosovë. Të ardhurat e arsimtarëve kanë qenë, dhe ende janë jo të dinjitetshme për profilin akademik. Kushtet për vendosje dhe strehim të studentëve janë përmirësuar dukshëm dhe vazhdojnë trendin e përmirësimit të mëtejmë. Përkundër të arriturave të pamohueshme në UP janë vërejtur dobësi në menaxhim dhe në mungesë koordinimi në mes të MASHT dhe UP.

Po ashtu, ka munguar veprimtaria kërkimore shkencore (me të drejt dikush do të thoshte si do të bëhej kjo në mungesë të mjeteve materiale). Ka ekzistuar një nivel i ulët i mësimdhënies në krahasim me universitetet e regjionit, edhe pse proklamohej se po zbatohen reformat pikërisht aty kishte ngecje. Ka qenë evidente mungesa e kuadrit për profile të ndryshme, izolimi dhe mungesa e bashkëpunimit me universitetet perëndimore.

Ka munguar edhe një infrastrukture e cila do ti lehtësonte studimet të rinjve, avancimi i kuadrove të me prapavijë politike të caktuar, nisma jo të mjaftuara për vjelje të donacioneve nëpërmjet projekteve të financuara nga donator të jashtëm me çka do të shtoheshin të hyrat për arsimtarët… etj.
Pothuaj një dekadë u zhvillua një garë se cili fraksion do të “marr në dorë” UP-në. Pse pikërisht në institucionin me më së shumti kuadro të përgatitura? Si nuk pati forca brenda universitetit të pengojnë ndarjet në vend se aty të zhvillohet politikë integruese në favor të shkencës dhe kulturës? Pse në kohën kur Serbia nuk gjendet me politikën e saj brenda universitetit?
Është në pyetje papjekuria politike dhe intelektuale apo mos guximi intelektual për të thënë dhe angazhuar për të vërtetën.
Udhëzimi Administrativ të cilin e nxori qeveria nuk është i natyrës apo karakterit siç u publikua në disa media dhe siç u kuptua nga disa studentë dhe profesorë. E tërë esenca e udhëzimit në fjalë është paraqitur në pjesën e pare normative të udhëzimit, ku thuhet: “Procesi i implementimit të Statutit të UP kthehet prapa në datën 1 dhjetor 2004”. Me fjalë tjera këtu nënkuptohet vetëm përsëritja e procedurës për zgjedhjen e rektorit të ri.

Derisa në Shqipëri mediat po shënojnë ecje të hetueshme drejt informimit objektiv, duket se në Kosovë ende po vazhdon kultivimi i shkrimeve sensacionale me brendësi të thata e jo analitike. Një gjë e tillë është duke i shkaktuar dëme ecjeve të shoqërisë kosovare.

Shumica e mediave elektronike informuan se u shkarkua rektori, dekanët, senati, apo si do të thoshte gazetari i Express-it, “U shkarkua rektori Arsim Bajrami (për disa ai kurrë nuk ishte rektor) bashkë me të gjithë dekanët e fakulteteve dhe të shkollave të larta, si dhe u shpërnda senati i UP-së. Spastrim akademik”.

Zbulim se jo mahi. Kah i morën këto “informata”? Është kjo ndonjë paragjykim apo mënyrë e ”zakonshme dhe e paanshme” e funksionimit të disa mediave tona. Të mbetet në ndërgjegjen e tyre, por efekti që u krijua në opinionin publik ishte jo i pakët, por fatmirësisht ishte jetëshkurtër. Më së paku politik.
Me rektor të cilit nuk i shkojnë pas përkthyes të rinj. Një udhëheqje e cila ka vizion zhvillimin dhe aplikimin e shkencës moderne dhe kulturës drejt ecjes me vendet e përparuara të Evropës e botës. Aplikimin e metodave të reja të mësimdhënies interaktive me studentin në epiqendër, si zhvillohet gjithkund në këto vende.

Nëse vazhdohet me (keq) përdorimin e studentit vetëm kur i nevojitet dikujt për të realizuar qëllime individuale apo klanore, ecja jonë do të mungoj ose do të humb rëndësinë që ka ky universitet për qytetarët e do të orientohen kah zgjidhjet alternative si janë universitetet private.
Shpresojmë se të gjithë jemi mbushur mend e kemi mësuar nga kjo përvojë e keqe. Nëse jo e meritojmë agoninë,vendnumërimin dhe rritjen e distancës akademike me botën.
Autori është këshilltar i lartë politik në zyrën e Kryeministrit
(qëndrimet janë personale e jo të institucionit ku punon)