|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Çfarë përmban Udhëzimi Administrativ për rivendosjen e qeverisjes së ligjshme në Universitetin e Prishtinës?

Prishtinë, 27 korrik 2005 /TN /QIK - Për rivendosjen e qeverisjes së ligjshme në Universitetin e Prishtinës, Ministri i Arsimit, Shkencës dhe Teknologjisë, në përputhje me autorizimet që i janë dhënë nga Qeveria e Kosovës për të krijuar një gjendje të rregullt ligjore në Universitetin e Prishtinës, në mbledhjen e datës 26 korrik 2OO5, nëpërmjet një Udhëzimi Administrativ vendos si më poshtë:

Procesi i implementimit të Statutit të Universitetit të Prishtinës kthehet prapa në datën 1 dhjetor 2004; Zgjedhjet e kryera pas kësaj date në UP shpallen të pavlefshme; Këshilli Drejtues i Universitetit (më tutje në këtë dokument "Këshilli") do të plotësohet me katër anëtarë të emëruar nga MASHT brenda tri ditësh nga data e hyrjes në fuqi të këtij udhëzimi;

 

Këshilli do të konstituohet pa vonesë, do të zgjedh kryetarin dhe zëvendësin e kryetarit, si dhe do të miratojë rregulloren e punës në pajtim me dispozitat e Statutit.
 

Mbledhjen konstitutive të Këshillit e thërret Sekretari i Përgjithshëm i UP së.

Kompetencat administrative të Rektorit, do t'i barten përkohësisht, deri në zgjedhjen e rektorit të ri, një ekipi të përbërë prej tre zyrtarëve të lartë të Universitetit të Prishtinës: kryetarit të Këshillit Drejtues, Zëvendësit të Kryetarit të Këshillit Drejtues dhe Sekretarit të përgjithshëm të UP së.

Zyrtari më i lartë i Universitetit, deri në zgjedhjen e rektorit të ri, do të jetë Kryetari i Këshillit; Zëvendëskryetari i Këshillit dhe Sekretari i përgjithshëm do të jenë zëvendës të Zyrtarit të Lartë të Universitetit.

Zyrtari më i Lartë i Universitetit dhe zëvendësit e tij do të vendosin me vendime unanime; Në të gjitha rastet kur ka konflikt të kompetencave ndërmjet obligimeve të "zyrtarëve të lartë ngarkuar" dhe obligimeve të Këshillit, do të mbizotërojë qëndrimi i Sekretarit të përgjithshëm.

"Zyrtarët e lartë të ngarkuar" nuk do të involvohen në masa të natyrës strategjike të lidhura me funksionin e Rektorit, përkitazi me funksionimin e Universitetit në tërësi apo të ndonjë njësie të caktuar akademike. MASHT në afat prej tri javësh do të formojë një grup ekspertësh me pjesmarrje ndërkombëtare, i cili do të monitorojë dhe do të këshillojë "zyrtarët e lartë të ngarkuar" në udhëheqjen e procesit të paraqitur në këtë dokument
 

Ky grup do të zgjedh një kryesues nga anëtarët e vet. Raporte të rregullta për procesin e implementimit do t'i dorëzohen Qeverisës së Kosovës, MASHT it, PSSP së, AEU së, Këshillit të Evropës dhe grupit të donatorëve.

Grupi i ekspertëve do të përbëhet prej: një ekspert i emëruar nga MASHT; një ekspert i emëruar nga Këshilli i Universitetit dhe një ekspert i emëruar nga AUE; Një ekspert i emëruar nga një OJQ vendore arsimore; një ekspert i emëruar nga OSBE.

Sekretari i përgjithshëm do të shërbejë si lidhje e këtij grupi nga "zyrtarët e lartë të ngarkuar". Rëndësi e veçantë do t'i kushtohet rekomandimeve të grupit ndërkombëtar të ekspertëve lidhur me ri zgjedhjet. Të gjitha vendimet paraprake të Këshillit prej pesë anëtarëve do të shqyrtohen dhe konfirmohen sërish nga Këshilli i Universitetit.

 

Senati do të zgjedhë një Kryesues të Përkohshëm në përputhje me Statutin, i cili do të kryesojë punën e Senatit deri në zgjedhjen e Rektorit të ri. Të gjitha vendimet e Senatit dhe të Këshillave të Fakulteteve, të cilat janë miratuar para datës 1 dhjetor 2004, mbesin në fuqi si të vlefshme.

 

Të gjitha vendimet unanime të Senatit dhe të këshillave të fakulteteve, të cilët janë miratuar pas datës 1 dhjetor 2004, mbesin në fuqi si të vlefshme. Të gjitha vendimet e kontestuara të Senatit dhe të këshillave të fakulteteve pas datës 1 dhjetor 2004, duhet të hyjnë në procedurë të shqyrtimit dhe miratimit të sërishëm.

 

Rizgjedhjet do të organizohen nga "zyrtarët e lartë të ngarkuar" dhe do të zhvillohen në të gjitha rastet kur është vërtetuar mospërputhja me kornizën ligjore në fuqi, pa vonesë dhe menjëherë pas kthimit të studentëve, do të monitorohen dhe do të përfundohen në afat prej 12 javësh në përputhje me procesin e mëtejmë të implementimit të Statutit të UP së.

 

Posti i Rektorit do të shpallet nga ana e "zyrtarëve të lartë të ngarkuar" në bashkërenditje me Senatin dhe duke u bazuar në tekstin e parë të shpallur në mediat e shkruara; kërkesat e mëparme do të mbesin të vlefshme dhe do t'i shtohen listës së kërkesave të reja për postin e rektorit.

 

Këshilli do të ndërmarrë të gjitha masat e domosdoshme për të zhvilluar zgjedhje të përgjithshme studentore në pajtim me dispozitat e Statutit dhe në afat prej tre muajsh nga data e hyrjes në fuqi të këtij udhëzimi. Rezultatet e këtyre zgjedhjeve studentore do të implementohen në procedurën e rizgjedhjeve të dekretuara nga "zyrtarët e lartë të ngarkuar".

Rektori dhe prorektorët do të zgjedhen nga Këshilli në pajtim me procedurat e përshkruara në Statut. Mandati i "zyrtarëve të lartë të ngarkuar" do të përfundojë ditën e zgjedhjes së Rektorit të ri. I tërë procesi i parparë me këtë rregullore duhet të përfundojë brenda një periudhe jo më të gjatë se gjashtë muaj prej datës së hyrjes në fuqi të këtij udhëzimi. Në rast se disa procedura mbesin të papërfunduara pas kësaj date, MASHT do të nxjerr një udhëzim tjetër administrativ, i cili do të parashoh masat e duhura për përfundimin e procesit.

Ky udhëzim hyn në fuqi në momentin e nënshkrimit nga Ministri, - thuhet në këtë Udhëzim Administrativ të nënshkruar nga më 26 korrik 2005 nga Agim Veliu, minister i Arsimit, Shkencës dhe Teknologjisë.

 

 

MASHT: Me angazhim të të gjithëve, Universiteti i Prishtinës mund t'i kthehet misionit të vet të mirëfilltë

 

Prishtinë, 27 korrik 2005 - Udhëzimi Administrativ i Ministrisë së Arsimit, Shkencës dhe Teknologjisë (MASHT) dhe Vendimi i Qeverisë së Kosovës për ndërmarrjen e masave për rivendosjen e ligjshmërisë në Universitetin e Prishtinës është një zgjidhje kompromisi që synon krijimin e parakushteve për përpjekje të përbashkëta në rehabilitimin dhe konsolidimin e rrjedhave në UP, - thuhet në një konunikatë të lëshuar sot nga MASHT-i një ditë pas masave të ndërmarra në Universitetin e Prishtinës.

Kjo zgjidhje përfshin preferencat e shprehura nga pothuajse të gjitha palët e involvuara në një proces të gjatë të konsultimeve qoftë nga zyrtarë të MASHT it, qoftë nga ndërmjetësi i autorizuar ndërkombëtar - Zyra Ndërlidhëse Austriake.

Ky kompromis ofron vetëm bazën e domosdoshme për kthimin e ligjshmërisë së dëmtuar rëndë gjatë dhe pas zgjedhjeve të vitit të kaluar në Universitetin e Prishtinës. Pos kësaj, besohet se me angazhim të të gjithëve, Universiteti mund t'i kthehet misionit të vet të mirëfilltë: punës akademike dhe shkencore, po ashtu të dëmtuara rëndë gjatë disa viteve të fundit.

MASHT ka mirëpritur mbështetjen e fuqishme të të gjitha institucioneve relevante vendore dhe ndërkombëtare për tejkalimin e problemeve në udhëheqjen e UP së në këtë kontekst.

MASHT është e vetëdijshme se për rivendosjen e plotë të ligjshmërisë në UP duhej vendosur një administratë të përkohshme si dhe të parashihen zgjedhje të plota në të gjitha nivelet. Megjithatë, MASHT ka vlerësuar se përfshirja sa më e gjerë në këtë proces të të gjitha palëve dhe faktorëve relevantë është po aq e rendësishme duke pasur para sysh rëndësinë e Universitetit për shoqërinë kosovare.

 

Prandaj, kjo zgjidhje kompromisi nuk i siguron të gjitha mekanizmat e nevojshme për rivendosjen e ligjshmërisë, por siguron përkrahje dhe përfshirje të gjerë për rehabilimitimin e UP së me përpjekje të përbashkëta të të gjithëve.

MASHT e sheh të nevojshme t'i informojë mediat dhe, përmes këtyre, opinionin publik se nuk parashihet shkarkim i Këshillit Drejtues të Universitetit por plotësim i tij, sipas Statutit të UP së.

As Udhëzimi Administrativ i MASHT, as Vendimi i Qeverisë nuk parashohin as shkarkimin e dekanëve e as të senatorëve. Këto vendime janë të mbështetura në ligj dhe në statutin e UP së - tekefundit, qëllimi i këtyre masave individuale është rivendosja e ligjshmërisë së shkelur gjatë procesit të implementimit të Statutit të ri të UP së, e jo përsëritja e sjelljeve të një grupi të vogël të mësimdhënësve të UP së, - thuhet në këtë komunikatë.

Në fund, MASHT edhe një herë konfirmon qasjen e vet për rehabilitimin e gjendjes në UP përmes gjithëpërfshirjes në vend të përjashtimit, përmes respektimit të ligjshmërisë në vend të dhunimit të ligjit, profesionalizmit në vend të politizimit, dhe të vënies së interesave institucionale dhe të përgjithshme para interesave klanore, - thuhet në fund të kësaj komunikate të MASHT-it.

 

 

Vendimi i Qeverisë së Kosovës me të cilin miratohet Udhëzimi Administrativ i Ministrisë së Arsimit

 

Prishtinë, 27 korrik 2005 - Në mbështetje të nenit 9.3.16 të Rregullores së UNMIK ut mbi Kornizën Kushtetuese për Vetëqeverisje të Përkohshme në Kosovë dhe të nenit 1 të Rregullores së UNMIK ut nr.2001/19 mbi Degën e Ekzekutivit të Institucioneve të Vetëqeverisjes në Kosovë si dhe të nenit 4, pika 3 të Rregullores së Punës të Qeverisë së Kosovës, në mbledhjen e mbajtur më 26 korrik 2005, mori këtë vendim:

 
1. Miratohet Udhëzimi Administrativ nr.37/2005 i Ministrisë së Arsimit Shkencës dhe Teknologjisë për Rivendosjen e qeverisjes së ligjshme në Universitetin e Prishtinës.

 
2. Obligohet Ministria e Arsimit Shkencës dhe Teknologjisë të fillojë menjëherë zbatimin e këtij Udhëzimi Administrativ.
 

3. Vendimi hyn në fuqi ditën e nënshkrimit.

 
Ky vendim është nënshkruar nga Kryeministri i Kosovës

 
Bajram Kosumi më 26 korrik 2OO5.

 

 

UNMIK dhe OSBE mirëpritën vendimin e Qeverisë së Kosovës për vendosjen e ligjëshmërisë në UP

 

Prishtinë, 27 korrik 2005 - UNMIK u nëpërmjet një komunikate ka përshëndetur Qeverinë e Kosovës për hapin e marrë për vendosjen e ligjëshmërisë në Universitetin e Prishtinës. Ndërkaq zëvendës shefi i UNMIK ut, Lari Rosin, vendimin e vlerëson të drejtë i cili për Universitetin të Prishtinës do të jetë hap i parë drejtë inkuadrimit të tij në Bashkësinë e Universiteteve Evropiane.

Rosin thotë vendosja e ligjeve në universitet është një hap me rendësi sepse mundësomn vendosjen e ligjit dhe njeherit është nismë e shtrimit të rrugës për zbatim të reformave të reja, të cilat janë të domosdoshme për integrim të tij në familjen e madhe të universiteteve Evrpoiane.

Po ashtu edhe OSEB e mbështet këtë vendim të qeverisë së Kosovës i cili i mundëson UP zhvillim më të shpejtë.

 

 

Senati i UP Udhëzimin admnistrativ e quan të papranueshëm dhe e hedh poshtë

 

Prishtinë, 27 korrik 2005 - Senati i Universitetit të Prishtinës sot në një mbledhje të jashtëzakonshme shqyrtoi Udhëzimin administrativ të Qeverisë së Kosovës.

 

Në një komunikatë lëshuar nga kjo mbledhje thuhet se pas një debati gjithëpërfshirës dhe transparent, njëzëri me vetëm një votë abstenuese, nxori disa konkluzione, duke e konsideruar "Udhëzimin administrativ nr. 37/2005 të Qeverisë së Kosovës për ndërhyrje në UP si të paligjshëm, që shkel autonominë e UP, pengon zhvillimin e reformave dhe mbarëvajtjes së punës në UP dhe si i tillë është i papranueshëm dhe hidhet poshtë".

Po ashtu Senati konsideron se Qeveria e Kosovës nuk ka përfillur gatishmërinë e udhëheqësve të UP për biseda dhe angazhime serioze të zgjidhjes së problemeve dhe ka marrë vendim të njëanshëm, por thotë se edhe një herë shpreh gatishmërinë për bisedime me Qeverinë e Kosovës për tejkalimin e kësaj gjendjeje.

Senati kërkon nga strukturat udhëheqëse të Universitetit që të vazhdojnë punën dhe të sigurojnë funksionimin e plotë të punës në UP, ndërkaq nga anëtarët e Këshillit Drejtues dhe sekretari i përgjithshëm kërkon që t'i respektojnë vendimet e Senatit të UP dhe të veprojnë në përputhje me to.