|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

  Kryeministri Kosumi në një interpelancë tha se qeveria është e përkushtuar që të luftojë korrupsionin

Naser Osmani akuzoi shefin e grupit parlamentar të PDK-së Jakup Krasniqi dhe liderin e Oras, Veton Surroi se iu kanë shmangur pagimit të tatimit në pronë.

 

Prishtinë, 26 korrik 2005 /TN / QIK - Kryeministri Bajram Kosumi dje në orët e pasditës në interpelancën e parë në Kuvendin e Kosovës, tha se qeveria është e përkushtuar që të luftojë korrupsionin dhe familjarizimin në institucionet vendore. Duke folur për 1OO ditët e qeverisë së tij Kosumi foli në detaje për përpjekjet e qeverisë për të zbatuar ligjet sidomos ato për shërbimet publike, për menaxhimin e financave publike dhe për prokurimin publik.

"Në mandatin 100 ditor është treguar një kujdes i veçantë në respektimin dhe zbatimin e dispozitave ligjore, veçanërisht në zbatimin dhe mbrojtjen e ligjit për shërbimet publike dhe për institucionin e konkursit. Në të gjitha rastet e pranimit të stafit civil është respektuar procedura e paraparë.

 

Dua të theksoj se kryeministri dhe askush nga stafi i zyrës së kryeministrit nuk ka ndërhyrë dhe nuk bëjnë ndërhyrje në asnjë rast gjatë procedurës së pranimit të punonjësve në punë në zyrën e kryeministrit", tha Kosumi. Njëherit ai theksoi lufta kundër nepotizmit dhe korrupsionit është ndër prioritetet e programit të tij qeveritar.

"Angazhimi kundër korrupsionit dhe nepotizmit është pjesa esenciale e një qeverisjeje të mirë dhe sfidë për të gjitha qeveritë. Korrupsioni dhe nepotizmi në Kosovë nuk kanë depërtuar aq thellë sa t'i bëjnë të kota përpjekjet tona për luftimin e këtyre fenomeneve? tha Kosumi.

Partia Demokratike mbeti e pakënaqur nga përgjigjet e tij. Shefi i grupit parlamentar, Jakup Krasniqi tha se kryeministri nuk ka dhënë përgjigje në asnjërën nga pyetjet e parashtruara. Me përgjigje nuk ishte i kënaqur as Veton Surroi nga Ora. Po ashtu deputetët e opozitës adresuan shumë pyetje nga lëmi të ndryshme, për të cilat thanë se kryeministri mban përgjegjësi dhe duhet t’i përgjigjet Kuvendit.

 

Këtu përfshiheshin çështje që nga ekonomia, arsimi e deri tek ndërrimi i destinimit të mjeteve nga Ministria e Shërbimeve Publike për blerjen e veturave të kryetarit të Kosovës. Kosumi tha se gjithçka në këtë rast është bërë sipas procedurave.

"Shuma prej një milionë euro është ridestinuar për blerjen e veturave për presidencë.

 

Është parë e arsyeshme që të bëhet ky destinim për shkaqe sigurie, sidomos pas shpërthimeve të marsit që kanë ndodhur këtë vit në Kosovë. Duhet theksuar fakti se këto vetura nuk janë dedikuar për persona privatë, por për institucione dhe autoritete të larta shtetërore", tha Kryeministri.

Mirëpo, opozitarët u shprehën të pakënaqur nga këto përgjigje.

Më pas Kosumi ka dhënë edhe disa përgjigje në vazhdim të seancës, edhe pse me rregulloren e Kuvendit në interpelancë mund të jepen përgjigje vetëm për pyetjet që parashtrohen me shkrim dhe sipas procedurës së rregullt.

Ndërkaq deputeti i LDK-së Naser Osmani akuzoi shefin e grupit parlamentar të PDK-së Jakup Krasniqi dhe liderin e Oras, Veton Surroi se iu kanë shmangur pagimit të tatimit në pronë.