BARDHYL, TË VRANË SEPSE TA KISHIN FRIKËN..!

OPINIONE

DY LOTË NË VEND TË NGUSHËLLIMIT PËR ISH KOLEGUN BARDHYL AJETIN

BARDHYL, TË VRANË SEPSE TA KISHIN FRIKËN..!

2 korrik 2005 / TN / Rexhep EELEZAJ

Ngushëllimi për Ty, o Bardhyl, na vije sot si rrufe nga qielli, si dritë dhe shpresë e pafund se fjala e lirë, mendimi i dëlirë, puna e pandërprerë për atdheun, janë virtytet që të dalluan, të lartësuan dhe përjetësuan.

Prandaj, vrasjen tënde mizore, prej gazetari filiz, veç sa kishe hyrë në luftë me jetën dhe lirinë së saj, e kuptoj fortë mirë, sepse ata që të vranë nuk mund t’i duronin më fjalët tua si shigjetë, sepse ata nuk ishin të denjë që të ballafaqohen me të vërtetat që ua hudhje në fytyrë, nuk e kishin kurajën t’i pranonin fajet, as të sillnin kundër argumente ndaj fakteve që Ti ua thoshe si burrat. Prandaj, të vranë barbarisht se ta kishin frikën.

Tani pas vrasjes Tënde le të më thotë dikush se ndër shqiptarët nuk ka kriminelë?! Nuk i besoj më askujt në këtë virtyt me të cilin dikur krenoheshim para botës. Bile, kurrë nuk kam besuar se kriminelët nga mesi ynë janë aq dinakë, aq të kriminalizuar, aq perfid, por se janë edhe kaq frikacakë këtë nuk e kam besuar.

Se shqiptari nuk të vret nga pusia, por ballë për ballë, pasi që ta ka bërë me dije se nuk ta ka vazhduar më besën. E dij Bardhyl, se ti nuk kishe nevojë që t’iu kërkoje besë, megjithatë të vranë në pabesi.

Dhe ja, ish kolegu im i dashur, se kohë të gjatë kemi shkruar së bashku në të njëjtën gazetë, në “Bota Sot”, dhe nuk e harroj përjetë kur ti më merrje në mbrojtje mua dhe disa kolegë tjerë, e asokohe kurrë nuk më ka shkuar mendja se

Ty do të të vrasin para nesh, sepse ti ishe shumë më i ri në moshë. Dhe, sot kur ke ikur në përjetësi, lotët që më shkojnë përfaqe, iu lutëm më të afërmve tu me të cilët e ndaj dhimbjen e madhe për ty, që të mi pranojnë në vend të luleve që do t’i veja mbi varrin tënd, sepse Ti, tani më je shndërruar në pishtar të gazetarisë dhe demokracisë së Kosovës, për të cilën edhe u flijove.

Të qoftë i lehtë dheu i Kosovës martire !

Rexhep Elezaj, më 27.06.2005