|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

  Nikolas Bërns deklaroi sot në Prishtinë se viti 2005 do të jetë vendimtar për Kosovën

Prishtinë, 8 qershor 2005 - Nënsekretari amerikan i Shtetit për çështje politike, Nikolas Bërns, deklaroi sot në Prishtinë se viti 2005 do të jetë vendimtar për Kosovën. Ndërkaq Bërns takimin e parë e pati me shefin e UNMIK-ut Soren Jesen Petersen.

Nënsekretari amerikan i Shtetit tha se ndodhet në Kosovë për të diskutuar të ardhmen e saj sepse ky vit është vit i vendimmarrjes. Ai shfaqi mendimin se ky vit duhet të jetë vit i ndryshimeve për Kosovën, duke shtuar se status kuoja është e paqëndrueshme. Bërns siguroi se SHBA-të do të mbështesin tërësisht njerëzit e këtij rajoni për të përcaktuar të ardhmen e tyre.

 

Nënsekretari amerikan i shprehu mbështetje të plotë shefit e UNMIK ut. Njëherit ai theksoi se Amerika ka besim të plotë në ambasadorin Kai Aide, i cili do ta udhëheqë procesin e vlerësimit të standardeve në emër të sekretarit të përgjithshëm të Kombeve të Bashkuara.

"Pikëpamja jonë është se nëse gjërat shkojnë në drejtimin e duhur, do të kemi diskutimet për statusin. Shtete e Bashkuara i mbështesin tërësisht njerëzit e këtij rajoni që të përcaktojnë të ardhmen e tyre", tha Bërns.

Në mesditë nënsekretari i shtetit Nikolas Bërns në një takim të përbashkët bisedoi me Presidentin Ibrahim Rugova, Kryeministrin Bajram Kosumi dhe Kryeparlamentarin Nexhat Daci.

Presidenti Rugova takimin e vlerësoi shumë të frytshëm. Ai tha se e kishte njoftuar zotin Bërns me progresin që është bërë në Kosovë dhe se po punohet në vlerësimin e progresit që sipas rrugës ndërkombëtare do të hapen bisedat për të ardhmen - për pavarësinë e Kosovës, u shpreh ai.

"Ndërsa unë insistoj për njohjen direkte nga SHBA-të, nga BE-ja që do ta njihnin edhe fqinjët tanë", tha Presidenti Rugova pas takimit. Zoti Bërns krerëve më të lartë të institucioneve të Kosovës i kishte siguruar për përkrahjen që do ta kenë nga SHBA-të në këtë proces.

Kryeministri Kosumi tha se në këtë takim me nënsekretarin Bërns është diskutuar për zvillimet e fundit në Kosovë. Kosumi vlerësoi se ka progres dhe rezultate shumë të mëdha në Kosovë dhe se dalëngadalë vendi po hyn në fazën e përgatitjes për statusin final. Ai beson se ky proces do të fillojë në shtator.

 

"Nuk do të ketë ndonjë proces të pakufishëm, por ai do të zgjasë më pak se një vit dhe do të përcaktohet statusi final i Kosovës", u shpreh Kosumi.

Nënsekretari Bërns takoi edhe liderët e opozitës Hashim Thaçin dhe Veton Surroin.

Në fund të vizitës nënsekretari amerikan i Shtetit do të mbajë një konferencë shtypi, ku do të flasë për vizitën e tij në Prishtinë. Bërns në fund pritet të vizitojë disa familje serbe në komunën e Kastriotit.

Bërns: Populli i Kosovës e meriton të dijë se cila do të jetë e ardhmja e tij

Londër, 8 qershor 2005 - Status kuoja gjashtëvjeçare e Kosovës është thjesht e paqëndrueshme, tha nënsekretari amerikan i Shtetit Nikolas Bërns dje në Londër para nisjes në turneun e shkurtër ballkanik. Kur është fjala për rrugën që duhet ndjekur për statusin e ardhshëm të Kosovës, diplomati amerikan tha se Evropa dhe SHBA-të qëllimisht nuk kanë dëshiruar të përcaktojnë statusin e Kosovës para se palët e interesuara të ulen pranë tryezës së bisedimeve.

"Ato duhet të përcaktojnë të ardhmen e vendit të tyre, por një gjë e dimë: status kuoja që aktualisht mbretëron në Kosovë absolutisht nuk është e qëndrueshme", tha Bërns. "Gjashtë vjet pas përfundimit të luftës, populli i Kosovës e meriton të dijë se cila do të jetë e ardhmja e tij dhe ne mund t'i ndihmojmë.

Kombet e Bashkuara, kur të vijë koha, do të konvokojnë bisedimet në të cilat duhet të kyçet edhe Evropa edhe SHBA-të. Tashmë kemi thënë se Ballkani ka kohë që kanë qenë në plan të dytë sepse në ndërkohë vëmendjen e vendeve tona e kishin preokupuar ngjarje të shumta dramatike në botë.

Tani është momenti që të kthehemi në Ballkan dhe t'i japim fund punës që aq mirë e filluam në mesin e viteve nëntëdhjetë", tha Bërns.

Bërn vlerësoi se progresi që është arritur në përmbushjen e standardeve në Kosovë përfundimisht hap dyert e ndryshimit të politikës së gjertanishme, njofton BBC.

"Mendoj se tani është realizuar një progres i mjaftueshëm në realizimin e standardeve të caktuara dhe se tema të cilën duhet trajtuar është: standardet dhe statusi".

Sipas fjalëve të nënsekretarit Bërns, Uashingtoni tashmë ka marrë vendimin për shkallën e përmbushjse së standardeve në Kosovë.

"Qeveria ime konsideron se në përmbushjen e standardevee është arritur progres i mjaftueshëm dhe nëse Kai Aide vjen në përfundim të njëjtë, do ta inkurajojmë sekretarin e përgjithshëëm Kofi Anan që diku gjatë vjeshtës të konvokojë bisedimet për statusin", tha Bërns.