Gjykata e Hagës miraton lirimin me kusht të ish kryeministrit Ramush Haradinaj

Gjykata e Hagës miraton lirimin me kusht të ish kryeministrit Ramush Haradinaj

7 qershor 2005 / TN / Zëri i Amerikës, më 6.06.2005)

Gjykata e Hagës autorizoi lirimin e përkohshëm të ish kryeministrit të Kosovës, Ramush Haradinaj. Gjykata e Hagës e autorizoi lirimin e zotit Haradinaj sot, por e pezulloi këtë vendim menjëherë për t’u dhënë prokurorëve 24 orë kohë që ta apelojnë vendimin e gjykatës.

Gjykata shpreh besimin se nëse lirohet, zoti Haradinaj do të kthehet për gjyq dhe se nuk ka shenja që ai të përbëjë ndonjë rrezik për viktimat, dëshmitarët ose persona të tjerë. Gjykata kërkon që zoti Haradinaj të qendrojë gjatë gjithë kohës në territorin e Kosovës, në Prishtinë ose Gllogjan dhe të mos flasë në publik. Po ashtu atij nuk i lejohet të mbajë ndonjë pozitë qeveritare të çdo niveli në Kosovë.

Zoti Haradinaj dha dorëheqje nga posti i tij në muajin mars dhe iu dorëzua Gjykatës së Hagës pasi kjo gjykatë ngriti padi kundër tij. Ish kryeministri i Kosovës i mohon akuzat, duke thënë se veprimet e tij ishin në përputhje me ligjin ndërkombëtar.

Prokuroria e Tribunalit të Hagës nuk është ankuar ndaj vendimit për lirimin e përkohshëm të Ramush Haradinajt

Hagë, 7 qershor 2005 - Prokuroria e Tribunalit të Hagës nuk është ankuar ndaj vendimit të Gjykatës për lirimin e përkohshëm të ish Kryeministrit të Kosovës, Ramush Haradinaj.

Pas konfirmimit nga ana e Prokurorisë se ka vendosur të mos parashtrojë ankesë, vendimi i trupit gjykatës tash mund të zbatohet. Se kur do të lirohet dhe kthehet në Kosovë zoti Haradinaj, varet nga aranzhimet e Tribunalit me Policinë e Holandës dhe autoritetet e UNMIK ut.

Sipas vendimit të trupit gjykues, Policia e Holandës, në një aeroport të vendit, duhet t'ia dorëzojë zotin Haradinaj një personi zyrtar që caktohet nga UNMIK u.