KUSH KEND E KËSHILLON NË “FORUM”?

KUSH KEND E KËSHILLON NË “FORUM”?

KOMUNIKATË NGA KONFERENCA PËR MEDIA E PARTISË SË DREJTËSISË
PRISHTINË, 6 maj 2005 / TN
Tentimi për instalimin e organit politik jashtinstitucional, që nuk ka mbështetje në aktin më të lartë ligjor të vendit, me potencial të lartë paralizues për institucionin më të lartë vendimmarrës politik, Kuvendin e Kosovës, paraqet goditje të rëndë synimeve për ndërtimin e shtetit sovran dhe të pavarur të Kosovës. Krijimi i këtij mekanizmi politik do të ngushtojë edhe më shumë hapësirën për debate të mirëfillta politike në Kuvendin e Kosovës, me arsyetim se “Shefat” janë marrë vesh ose nuk janë marr vesh në “Forum” dhe gjithë ç’duhet bërë është, që “këshillave” të tyre, deputetët e dëgjueshëm në Kuvendin e Kosovës, t’ia bëjnë “aminin”.

A dëshirohet me këtë tentativë, që të legjitimohet teoria shumë herë e proklamuar mbi institucionet e Kosovës si teatro ku aktrohet në mënyrë joprofesionale?

Sa kemi respekt për institucionet e dala nga vota e popullit? Prej nga ky mosbesim i hapur dhe injorim i papresedencë i qytetarëve, që votuan për ndërtimin e institucioneve demokratike të Kosovës dhe jo të organeve jashtinstitucionale politike, në të cilat nuk dihet se kush kend e këshillon. Ata të cilët e inskenuan këtë situatë e dijnë mirë se në Kuvendin e Kosovës ka edhe deputetë, që iu dhemb për Kosovën më shumë se sa për partinë e tyre. Kjo është ajo që i frikon më së shumti: zëri autokton i popullit që nuk njeh interesat meskine, zë ky i cili mund të kumboj atëherë kur për disa mund të tingëllojë shumë rëndë.

Kjo mënyrë e veprimeve politike do të përforcojë vazhdimësinë e mungesës së demokracisë në Kuvendin e Kosovës si dhe vazhdimësinë e mungesës së mirëkuptimit ndërpartiak dhe nivelit të pjekur politik.

Ka mjaft kohë, që shumë politikanë parlamentarë, detyrohen që t’i shprehin mendimet e tyre në forume jashtinstitucionale, në vend që kjo të bëhet në vendin meritor për këtë, para përfaqësuesve të zgjedhur të popullit. Kujt i shërbehet kësisoj? Secili subjekt institucional duhet të identifikojë përgjegjësinë personale dhe partiake për krijimin e situatës së tanishme të mpirjes politike të cilën PSSP tenton që ta tejkalojë në mënyrë tejet pragmatike, në pajtim me interesat politike të institucionit të cilin e udhëheqë, por duke e dëmtuar në mënyrë substanciale procesin e ndërtimit të institucioneve demokratike, njërin prej standardeve të cilin vetë e ka përcaktuar.